¹ Yehowa tonɛ Mɔse kudo Aarɔn , yinu be: ² Mitonɛ Izraɛlviwo, be: Nusuɖe tsinɛ le evomɛkɔsi, yo dɔ leɔ lɔ, etsan le makɔmakɔ. ³ Evomɛkɔsia ŋtsi yile makɔmakɔ ɖo: Nɛ yo voa le esi kɔɔ alo ŋdele kɔɔ lɔ, ele makɔmakɔ. ⁴ Aba ɖesiaɖe tsinɛdji yilamlɔn lɔ, lanɔn makɔmakɔ, yi enusianu tsinɛ dji yilanɔn lanɔn makɔmakɔ. ⁵ Amɛtsinɛ latɔ alɔ yo aba lanyan yo awuwo, lale esi, yilanɔn makɔmakɔ sɔnan woetrɔgbɔ. ⁶ Amɛtsinɛ lanɔn enutsinɛ dji yinɔn lanyan yo awuwo, lale esi, yilanɔn makɔmakɔ kakavanan woetrɔgbɔ. ⁷ Amɛsiamɛ tsinɛ latɔ alɔɛ lanyan yo awuwo, lale esi, yilanɔn makɔmakɔ kakavanan woetrɔgbɔ. ⁸ Nɛ etutan ɖo amɛtsinɛ kɔ ŋtsi lɔ, amɛa lanyan yo awuwo, lalesi, yilanɔn makɔmakɔ sɔnan woetrɔgbɔ. ⁹ Esɔ alo esɔakɛtɛ ɖesiaɖe tsinɛ dji yilanɔn lɔ, lanɔn makɔmakɔ. ¹⁰ Amɛsiamɛ tsinɛ latɔ alɔ nuɖekpekpe tsinɛ yilea lanɔn makɔmakɔ kakavanan woetrɔgbɔ. ¹¹ Amɛsiamɛ tsinɛ latɔ alɔɛ , yi ŋda klɔ asi Olɔ, lanyan yo awuwo, laklɔ alɔ le esimɛ, lanyan yo awuwo, lale esi, yilanɔn makɔmakɔ sɔnan woetrɔgbɔ. ¹² Eze sia eze tsinɛ yilatɔ alɔ lɔ, wolagban ezea, yi wolaklɔ atsigban ɖekpekpe le esimɛ. ¹³ Nɛ evomɛkɔsia vɔnii lɔ, elahlĩn ŋkeke anŋdrɛ sɔnan yo kɔkɔɛnyɛnyɛ lɔ; elanyan yo awuwo, yi yila lesi le etɔmɛn, yilanɔn kɔkɔɛ. ¹⁴ Le ŋkeke enyigɔngbe lɔ, elasɔ peplelu eve alo ahɔnɛ eve, sɔyiɖo Yehowa yo ŋkumɛ, le Mawu yo agbadɔa ŋkumɛ, yi yilasɔnan nunɔnla . ¹⁵ Nunɔnla lasɔɛ savɔ, ɖeka sɔnan nuvuĩɖeɖeɖa, yi evegɔn nɛ numɛmɛvɔsa; yi nunɔnla lale avuŋ nii le Yehowa yo ŋkumɛ, sɔkuɖo yo vomɛkɔsia ŋtsi. ¹⁶ Nɛ nusuɖe yo vomɛ le esi kɔɔ lɔ, elale esi, yi yilanɔn makɔmakɔ sɔnan woetrɔgbɔ. ¹⁷ Awu ɖekpekpe kudo agbaze ɖekpekpe tsinɛ laxɔɛa lale esi, yilanɔn makɔmakɔ kakanan woetrɔgbɔ. ¹⁸ Nɛ nyɔnu ɖe dɔn kudo lexa yo nusu lɔ, woamɛ evea wolale esi, yi wolanɔn makɔmakɔ sɔnan woetrɔgbɔ. ¹⁹ Nɛ nyɔnu ɖe ɖo asianyi, yi ehun le kɔkɔɔ le ŋtsi lɔ, elanɔn makɔmakɔ sɔnan ŋkeke anŋdrɛ. Amɛsiamɛ tsinɛ latɔ alɔɛa lanɔn makɔmakɔ kakavanan woetrɔgbɔ. ²⁰ Abatsi sia abatsi tsinɛdji yimlɔn le yo asiɖoanyia mɛan lanɔn makɔmakɔ, yi enu sia enu tsinɛdji yilanɔn lɔ, lanɔn makɔmakɔ. ²¹ Amɛsiamɛ tsinɛ latɔ alɔ yo abatsia lanyan yo awuwo, lale esi le tɔmɛ, yi latsi makɔmakɔ kakavanan woetrɔgbɔ. ²² Amɛsiamɛ tsinɛ latɔ alɔ enuɖekpekpe tsinɛdji yinɔn lɔ, lanyan yo awuwo kakavanan woetrɔgbɔ. ²³ Nɛ enuɖe le abatsia dji alo enutsinɛdji yinɔn lɔ, amɛtsinɛ latɔ alɔɛa lanɔn makɔmakɔ kakavanan woetrɔgbɔ. ²⁴ Nɛ nusuɖe dɔn kudo nyanu tsinɛ ɖo asianyi yi yo ehuan kɔɖo ŋtsi lɔ, elanɔn makɔmakɔ kakavanan ŋkeke anŋdrɛ, yi abtsi sia abatsi tsinɛdji yilamlɔn lɔ lanɔn makɔmakɔ. ²⁵ Nyɔnu tsinɛ lanɔn asiaɖoanyi mɛ kakavanan ŋkeke gbogboɖe tovonɛ yo ŋkeke ŋtɔŋtɔalɔ, alo lanɔn makɔmakɔ gbesiagbea, sigbebe yo asiaɖoanyia mɛan. ²⁶ Abatsi ɖekpekpe tsinɛdji yilanɔn le yo asiɖoanyia mɛan, kudo enusianu tsinɛdji yilanɔn lɔ, lanɔn makɔmakɔ sigbebe le yo asiɖoanyi mɛ nɛnɛ. ²⁷ Amɛsiamɛ tsine latɔalɔɛ lanɔn makɔmakɔ; elanyan yo awuwo, lale esi le etɔmɛ, yi lanɔn makɔmakɔ sɔnan woetrɔgbɔ. ²⁸ Nɛ yo asiɖoasia vɔlɔ, elahlĩn ŋkeke anŋdrɛ, yi yo ŋgbodomɛ yintsi lakɔ. ²⁹ Le ŋkeke enyigɔngbe lɔ, elasɔ peplelu amɛve alo ahɔnɛ amɛve, yi yilasɔwo sɔvanɛ nunɔnla lɔ, le Mawu yo gbedoxɔa yo ŋkɔ. ³⁰ Nunɔnla lasɔɛ sɔwɔ nuvuĩnɖeɖeɖa yo avɔsa nii le Yehowa yo ŋkumɛ, sɔkuɖo yo ehun tsinɛ le kɔkɔɔ yiwɔɛ be ele makɔmakɔ ta. ³¹ Milaɖe Izraɛlviwo ɖoɖa le wo makɔmakɔ mɛ, kudo vɔvɔn be woŋgbe ku le wo makɔmakɔ mɛɔn, be woŋgbe ɖu ekɔ nɛ axĩn texoe tsinɛ le miadomɛɔn. ³² Nɛnɛyinyi ese sɔkuɖo ametsinɛ ɖo evomɛ kɔsi alo le makɔmakɔ mɛ, ³³ nɛ nyɔnu tsinɛ le asiɖoanyi mɛ, le nusu alo nyɔnu tsinɛ esi ɣe le kɔkɔɔ, kudo nusu tsinɛ dɔn kudo nyɔnu le yo asiɖoanyi mɛ nɛ.