¹ Yehowa xonuxo nɛ Mɔse, yinu be: ² Eyɛ yilanyi ese nɛ ekpodɔnɔ le gbetsigbe wolakɔ ŋtsi ke. Wolakplɔɛ sɔva nunɔnla gbɔ. ³ Nunɔnla latole ekpamɛ, gbɔxoe laglo kponɔnlɔ kpɔ. Nɛ ekponɔnlɔ yo abi ku nii lɔ, ⁴ nunɔnla lado ese be woasɔ xevi agbeagbe eve tsinɛ kɔ sɔva nɛ ametsinɛ wodjakɔa ŋtsi, sedɛl yo anake, aklala djĩn kudo aflatoman. ⁵ Nunɔnla laɖegbe be wonɛwu xevia domɛtɔ ɖeka ɖo kɔgban ɖeka tsimɛ esi le dji. ⁶ Elasɔ xevi evegɔn tsinɛ le agbea, sedɛl yo anakea, aklala djĩnlɔ kudo aflatoman ; yi yilasɔɛ zinɖo xevi tsinɛ wowua yo huan mɛ. ⁷ Elasɔɛ hlĩntrɔdo kpotɛnɔn tsinɛ ŋtsi wodja kɔa ze anŋdrɛ. Yi yilanu be ele kɔkɔɛ, yi yila ɖatsi xevi tsinɛ le agbe ɖo gbeamɛ. ⁸ Amɛtsinɛ ŋtsi wolakɔa lanyan yo awuwo, laxlɔ yo fun kpata, yi yila lesi; yi yilanɔn kɔkɔɛ. Yo ŋgbodomɛ gbɔxoe yilatɛnŋ guĩnɖo asara mɛ, vɔlɔ, elanɔn yo xɔ godo nɛ ŋkeke anŋdrɛ. ⁹ Le ŋkeke anŋdrɛgɔn gbe lɔ, elaxlɔ yo efunwo kpata; lanyan yo awuwo, yi yila lesi, yi yilanɔn kɔkɔɛ. ¹⁰ Le ŋkeke enyigɔn gbe lɔ, elasɔ alĩn eve tsiŋtsi kɔ kudo alĩn tsinɛxɔ exoe ɖeka tsiŋtsi kɔ, ewɔmɛmɛ etre etɔn, tsinɛ wolablu kudo ami, asɔwɔ nuɖuɖuvɔsa, sɔkpeɖo ami trevi ɖeka ŋtsi. ¹¹ Nunɔnla tsinɛ lakɔ amɛa ŋtsi laklɔ amɛtsinɛ ŋtsi wolakɔ kudo yo nuwo kpata va Yehowa yo ŋkumɛ, le Mawu yo agbadɔa yo ŋkɔ. ¹² Nunɔnla lasɔ alĩnwo domɛtɔ ɖeka kudo ami trevi ɖeka ŋtsi , yi yilasɔ wɔ nuvuin yo vɔsa; elahunhun enua ɖo ɖusi kudo amiɔnmɛ le Yehowa yo ŋkumɛ. ¹³ Elawu alĩnvia le texoe kɔkɔɛ tsinɛmɛ wowunɔn nuvuinvɔsa kudo numɛmɛvɔsa le; ɖo, le nuvuinvɔsa , sigbebe nuvuinɖeɖeɖa vɔsa mɛlɔ, nunɔnla tɔyɔ; nukɔkɔɛ yo nukɔkɔɛ yi yinyi. ¹⁴ Nunɔnla lasɔ nuvuinvɔsa yo hun; elasɔɛ sisiɖo amɛtsinɛ ŋtsi wodjakɔa yo eto ɖusimɛ, ɖo yo alɔ ɖusi kudo ɖusimɛ yo dɛnglɛnfɛnsua dji. ¹⁵ Nunɔnla lasɔ ami trevi ɖeka tsinɛ yilasɔkɔɖo yo alɔmɛgloglo emiɔntɔ mɛ. ¹⁶ Nunɔnla lasɔ alɔvi ɖusimɛtɔ sɔdo ami tsinɛ le yo miɔnmɛ lɔamɛ, yi yilasɔ alɔvia hunhun zeadrɛ ɖo Yehowa yo ŋkumɛ. ¹⁷ Nunɔnla lasɔ ami tsinɛ kpɔtɔ le alɔmɛ niia ɖo ɖusimɛ to nɛ ametsi ŋtsi wokɔa, ɖo yo alɔ ɖusi dji kudo yo dĩnglĩnfɛnsu ɖusimɛtɔ dji, ɖo nuvuĩvɔsa yo tamɛ. ¹⁸ Nunɔnla lasɔ ami kpɛtɛlɔ tsinɛ le yo alɔmɛan kɔɖo tamɛ nɛ amɛtsinɛ ŋtsi wokɔa; yi nunɔnla lawɔ nuvuĩnɖeɖeɖa yo vɔsa nii le Yehowa yo ŋkumɛ. ¹⁹ Yi nunɔnla lawɔ nuvuĩɖeɖeɖa yo avɔsa; yi yilaɖe nuvuĩn ɖoɖa nɛ amɛtsinɛ wole avuŋlɔ leɔ na. Yoŋgbodomɛ lɔ elawu numɛmɛvɔsa lɔ. ²⁰ Nunɔnla lasɔ numɛmɛvɔsa kudo nuɖuɖuvɔsa sɔva avɔsakpea dji; yi yilawɔ nuvuĩɖeɖeɖa nɛ amɛa , yi yila kɔ. ²¹ Nɛnyi woamɛnɔn yi enu ŋdelesi Olɔ, elasɔ alĩnvi ɖeka tsinɛ wolasɔ wɔ nuvuĩɖeɖeɖa yo avɔsa nii, le gatsinɛmɛ wola hunhun avɔsa ɖo akpaɖe kudo evegɔnlɔ. Elasɔ ewɔ mɛmɛ etre ɖeka tsinɛ wolafɔtɔ kudo ami sɔnan nuɖuɖuvɔsa lo, kudo ami trevi ɖeka. ²² Elagbesɔ peplelu eve alo ahɔnɛ eve, tsinɛ ŋtsi yikpea, ɖeka sɔnɛ nuvuĩnɖeɖeɖa yo vɔsa, evegɔnlɔ nɛ numɛmɛvɔsa. ²³ Le ŋkeke enyigɔn gbe lɔ, elasɔ enutsɛwo kpata lasɔva nɛ nunɔnla, le Mawu yo agbadɔa yo ŋkɔ, le Yehowa yo ŋkumɛ. ²⁴ Nunɔnla lasɔ alĩnvia nɛ nuvuĩnɖeɖeɖa yo avɔsa, kudo ami trevia ; yi yila hunhunwo ɖo akpaɖe kudo evegɔnlɔ le Yehowa yo ŋkumɛ. ²⁵ Elawu nuvuĩɖeɖeɖa yo alĩnvia. Nunɔnla lasɔ nuvuĩnvɔsa yo hun; elasɔe ɖo ɖusimɛ to nɛ ametsinɛ ŋtsi wodja kɔa, ɖo yo ɖusi alɔta kudo nusi dĩnglĩnfɛnsua ta. ²⁶ Nunʊnla lakɔ ami ɖo yo emiɔn lɔa mɛ. ²⁷ Nunɔnla lasɔ yo ɖusi lɔa hlĩn amia zeanŋdrɛ le Yehowa yo ŋkumɛ kudo yo emiɔn lɔa. ²⁸ Nunɔnla lasɔ ami tsinɛ le yo alɔmɛ ɖo ɖusi toa dji nɛ amɛtsinɛ ŋtsi wodja kɔa, ɖo yo dĩnglĩnfɛnsu ɖusia dji kudo ɖusi afɔvisua dji, le texoe tsinɛ dji yikɔ nuvuĩnvɔsa yo ehunlɔ ɖo. ²⁹ Nunɔnla lasɔ ami tsinɛ kpɔtɔ le alɔme niia ɖo etadji nɛ ametsinɛ ŋtsi wodja kɔa, benɛ yawɔ nuvuĩnɖeɖeɖa yo avɔsa nii le Yehowa yo ŋkumɛ. ³⁰ Yi yilawu pelpeluawo domɛtɔ ɖeka alo ahɔnɛa yo domɛtɔ ɖeka tsinɛ yikpɔa, ³¹ ɖeka sɔnɛ nuvuĩnɖeɖeɖa , yi ɖetɔlɔ nɛ numɛmɛvɔsa, kudo nuɖuɖuvɔsa lɔ; yi nunɔnla lawɔ avɔsa nɛ amɛtsinɛ djawɔ nuvuĩnɖeɖeɖa yo avɔsa le Yehowa yo ŋkumɛ. ³² Nɛnɛyinyi ese nɛ dɔnɔn tsinɛ le ekpodɔ yi wola kɔŋtsi nɛ kudo amɛtsinɛ si enu ŋde leo. ³³ Yehowa xonuxo nɛ Mɔse kudo Aarɔn, yinu be: ³⁴ Nɛ miɖo Kanan yo duamɛ , tsinɛ ŋdasɔ nami lɔ; nɛ ŋnabe ekpodɔ va axoeɖe tsimɛ milaɖo lɔ, ³⁵ amɛtsinɛ tɔyi axoea nyia layi nunɔnla gbɔ yi yilanui nii, be: Ŋle edɔɖe kpɔɔ le axĩn xomɛ. ³⁶ Gbɔxoe nunɔnla laguĩnɖo axoeamɛ lɔ, elanu be woatole exoeamɛ, benɛ axoea ŋgbenyi numakɔmakɔ O. Le yo ŋgbodomɛ lɔ, nunɔnla laɖo axoemɛ benɛ yakpoɛ. ³⁷ Nunɔnla laglo ekpodɔa kpɔ. Nɛkpɔbe nutsi le axoea yo gliadji do gbemumuŋ alo le djĩn, alo lesigbe enutsinɛ nyɛɖo emɛ sɔwu eglialɔ lɔ, ³⁸ elatole axoemɛ, yi, nɛ eɖo xɔamɔnu lɔ, elatu axoea nɛ ŋkeke anŋdrɛ. ³⁹ Nunɔnla latrɔyi axoeamɛ le ŋkeke anŋdrɛgɔn gbe. Yi nɛkpɔbe abia keke ɖodji le axoea yo egliawo dji lɔ, ⁴⁰ ela ɖegbe be wonɛ fli ekpewo tsinɛyi abia le, yi wola sɔwo danŋkpɛn ɖo edua godo, le texoe makɔmakɔ ɖe. ⁴¹ Elanan be woladjra exɔamɛ ɖo; yi wolasɔ enu tsiwo kpata wokplɔ le xɔamɛ yo gbeɖiɖɔwo kɔŋgbe ɖo texoe makɔmakɔ ɖe. ⁴² Yi wolasɔ ekpe buwo daɖo tsinɛwo woɖedjo tutugbanwo texoe; yi wolasɔ anyikɔ buwo sɔtre exɔa lɔ. ⁴³ Nɛ edɔa gbetrɔva ɖo axoemɛ , le gatsimɛ yi woɖe ekpeawo, kplɔ exɔamɛ, yi tre axoea kudo anyikɔ vɔlɔ, ⁴⁴ nunɔnla lagbetrɔyi ke. Nɛkpɔbe edɔa gbegbanɖo axoemɛ lɔ, eyɛnyi ekpodɔ baɖa le axoemɛ: Axoea le makɔmakɔ. ⁴⁵ Wolagban axoelɔ, ekpeawo, atsiawo, kudo ekpesonua le axoeamɛ; yi wolalɔ enuawo tole tole eduamɛ sɔyi gbeɖiɖɔ texoe. ⁴⁶ Amɛsiamɛ tsinɛ layiɖo axoemɛ le gatsimɛ yi wotu axoea lanɔn makɔmakɔ kakavanan woetrɔgbɔ. ⁴⁷ Amɛtsinɛ dɔn awoeamɛa lanyan yo awuwo. Amɛtsinɛ laɖu enu le axoeamɛ tsan lanyan yo awuwo. ⁴⁸ Nɛ nunɔnla tsinɛ yi axoeamɛ kpɔbe edɔa ŋde keke ɖodji , le gatsimɛ yi wotre exɔalɔ Olɔ, elanu be axoea le kɔkɔɛ, ɖo edɔa vɔ. ⁴⁹ Elasɔ xevi eve, sedɛl tsi, aklala djĩn kudo aflatoman lasɔklɔ axoea lɔ. ⁵⁰ Elado ewui vemɛ nɛ xevia ɖeka ɖo ezekɔ ɖe dji, sɔkɔɖo esimɛ. ⁵¹ Elasɔ Sedɛl tsi, aflatoman ,kudo xevi tsinɛ le agbea; yi yilasɔwo do xevi tsinɛ yiwua yo huŋmɛ kudo esiamɛ, yi yilasɔɛ hlĩnɖo axoemɛ zeanŋdrɛ. ⁵² Elaklɔ exoea ŋtsi kudo xevia yo hun, ku esia lɔ, ku xevi tsinɛ le agbea, ku Sedɛl tsia, aflatoman kudo aklala djĩnlɔ. ⁵³ Ela ɖatsi xevi tsinɛ le agbea tole edua mɛ, ɖoɖa egbeamɛ. Nɛnɛyi yilaɖe nuvuĩn ɖoɖa le axoea dji, yi yilakɔ nɛ. ⁵⁴ Nɛnɛyinyi ese sɔkuɖo ekpodɔ kudo abaɖa ŋtsi nɛ, ⁵⁵ sɔkuɖo ekpodɔ awuwo kudo axoewo, ⁵⁶ kudo aklabi kudo enuxoamɛ kudo edji ŋtsi: ⁵⁷ eyɛ fiɔnu sɔkuɖo nɛ enuɖe le makɔmakɔ, kudo ele kɔkɔɛ ŋtsi. Eyɛyinyi ese le ekpodɔ ŋtsi nɛ.