¹ Yehowa xonuxo nɛ Mɔse kudo Aarɔn yinu be: ² Nɛ enuɖe kɔɖo agbazamɛ nɛ amɛɖe, aklabi, edji, alo ebe yatrɔzun ekpo lɔ, ke wolakplɔɛ sɔva nunɔnla Aarɔn gbɔ, alo evialɔ domɛtɔ ɖeka tsinɛwo nyi nunɔnla gbɔ. ³ Nunɔnla lɔ laglo abi tsinɛ le agbazeɛmɛ nii kpɔ. Yinɛ efunŋ tsinɛ le abia mɛ ɣe, yi abiamɛ djibe yatsito lɔ, keŋan ekpo yo abi yɔ: nunɔnla tsinɛ glo abia kpɔlɔ labuii be amɛmakɔmakɔ. ⁴ Ke nɛ enu ɣe le agbazea ŋtsi vɔ ŋde tsito olɔ, yi yo fuŋ tsan ŋde ɣe olɔ, nunɔnla latu amɛtsinɛ ɖo lexa yo abia lɔ. ⁵ Nunɔnla lagloekpɔ le ŋkeke anŋdrɛgɔn gbe. Nɛ abia ŋde tɛnŋ ku O, kudo ŋde tɛnŋ keke ɖodji olɔ, nunɔnla lagbe tuii zevegɔn nɛ ŋkeke anŋdrɛ. ⁶ Yi nunɔnla lagbe glo amɛa kpɔ zevegɔn ke le anŋdrɛgɔn dji. Nɛ agbazea le akpɔn yi ŋde keke ɖodji olɔ, nunɔnla lakpɔ amɛyɛ be ele kɔkɔɛ: ɖo edji kpoe; elanyan yo awuwo, yi yilanɔn kɔkɔɛ. ⁷ Vɔ nɛ edjia vakeke ɖodji, le gatsimɛ yi nunɔnla kpɔɛ be ele kɔkɔɛ yo ŋgbodomɛ lɔ, nunɔnla lagbe gboiikpɔ zevegɔn ke. ⁸ Nɛ nunɔnla kpɔbe djibia keke ɖodji lɔ, nunɔnla lakpɔɛ be ele makɔmakɔ; eyɛnyi ekpo dɔ. ⁹ Nɛ ekpo dɔ le amɛɖe ŋtsi lɔ, wolakplɔɛ sɔyiɖo nunɔnla gbɔ. ¹⁰ Nunɔnla lagloekpɔ. Nɛ akpa ɣeɖe le agbazemɛ nɛ amɛa, yi nɛ enan yo fuŋmɛ ɣe , yi abi yo akpa lemɛ lɔ, ¹¹ keŋuan ekpo yo abi xoxo yinyi le agbazeamɛ nɛ amɛa: nunɔnla lakpɔɛ be ele makɔmakɔ; ŋde dja tuii O, ɖo ele makɔmakɔ. ¹² Nɛ ekpo dɔa kankan ɖodji yi xɔ agbazea kpata nɛ amɛtsinɛ le kpodɔa lɔ, so etadji kakavanan afɔgɔmɛ lɔ, nunɔnla lagloeikpɔ; ¹³ yi nɛkpɔbe ekpoa xɔ agbazea kpata lɔ, elabe amɛtsinɛ ŋtsi abia lea le kɔkɔɛ: ɖoŋtsi yo agbazea kpata ŋtsi fun ɣe tititi, ele kɔkɔe. ¹⁴ Vɔ gbetsigbe yi wolakpɔ abi le ŋtsi lɔ, elanɔn makɔmakɔ; ¹⁵ nɛ nunɔnla kpɔ abialɔ lɔ, elanu soŋtsi be ele makɔmakɔ: abia yinan yile makɔmakɔ, ekpodɔ yɔ. ¹⁶ Nɛ abia trɔ yivazun eɣe lɔ, elayi nunɔnla gbɔ; ¹⁷ nunɔnla lagoeii kpɔ, yinɛ abia trɔ eɣe lɔ, nunɔnla labu abitɔa be ele kɔkɔɛ: ele kɔkɔɛ. ¹⁸ Nɛ amɛaɖe ɖo enuxoxo yo abi le yo agbazemɛ vɔ eku lɔ, ¹⁹ vɔyi texoe tsinɛ nuxoxo le vaze eɣe alo le edji lɔ, amɛyɛ lasɔ yioɖekui sɔfiɔn nunɔnla lɔ. ²⁰ Nunɔnla lagloekpɔ. Nɛ abia zebe etsito sɔyu agbazea , yi efuan ɣea, nunɔnla lanu soŋtsi be ele makɔmakɔ: eyɛnyi ekpodɔ, tsinɛ vaze le enuxoxoa mɛ. ²¹ Nɛ nunɔnla kpɔbe efun ɣe ŋde le abiamɛɔn , yi ŋde wɔ abi tsito O, yi yiwɔ fundrɛn lɔ, elatu amɛlɔ nɛ ŋkeke anŋdrɛ. ²² Nɛ abia keke ɖo agbazea ŋtsi lɔ, nunɔnla lakpɔɛ be ele makɔmakɔ: eyɛnyi ekpodɔ. ²³ Vɔ nɛ abia tsi texoe ɖeka yi ŋde kankan Ɔlɔ, eyɛnyi abi kuku texoe: nunɔnla lakpɔɛ be ele kɔkɔɛ. ²⁴ Nɛ evamɛ be amɛɖe ɖo ezobi ɖo yo agbaza mɛ, yi zobia texoe le eɣe alo djĩn lɔ, ²⁵ nunɔnla lagloekpɔ. Nɛ efuan trɔ eɣe le abiamɛ, yi yitsito sɔwu agbazea, ke ekpodɔ yivaɖo ezobia yo ŋkumɛ; nunɔnla lakpɔ amɛa be ele makɔmakɔ: ekpodɔ yɔ. ²⁶ Nɛ nunɔnla kpɔbe efun ɣe ŋde gbele abiamɛɔn , yi abia ŋde tsito O, yi ŋde le akpɔn lɔ, elatu amɛa nɛ ŋkeke anŋdrɛ. ²⁷ Nunɔnla lagloiekpɔ le ŋkeke anŋdrɛgɔn gbe. Nɛ abia keke ɖo agbazeamɛ lɔ, nunɔnla lakpɔɛ bele makɔmakɔ: ekpodɔ yɔ. ²⁸ Vɔ nɛ abia tsi texoe ɖeka, yi ŋde keke ɖo agbazea mɛɔn , vɔ le akpɔn lɔ, ke zobi kuku texoe yinyi; nunɔnla lakpɔɛ be ele kɔkɔɛ, ɖo ezobi yo abikpa kuku yɔ. ²⁹ Nɛ nusuɖe alo nyɔnuɖe laɖo abi ɖo tamɛ alo eguin mɛlɔ, ³⁰ nunɔnla lagloekpɔ. Nɛ etsito sɔwu agbazea, yi yo texoe nyɛɖo mɛ eɖaa le ehĩn lɔ, nunɔnla lakpɔɛ bele makɔmakɔ: abaɖa yinyi, enyi eta yo kpodɔ alo guĩmɛ tɔ. ³¹ Nɛ nunɔnla kpɔbe abaɖa yo abia ŋde tsito sɔwu agbazea, yi efun yibɔ ŋde le tamɛ niiɔn lɔ, elatu amɛtsinɛ ɖo abaɖa nɛ ŋkeke anŋdrɛ. ³² Nunɔnla laglo abia kpɔ le ŋkeke anŋdrɛ gbe. Nɛ abia ŋde keke ɖodji O, yi efunlɔ ŋdele hĩn ɖodji O, yi ŋde tsito sɔwu abia Ɔlɔ, ³³ amɛtsinɛ ɖo abaɖa laxlɔ eta, vɔ ŋde dja xlɔ fitsinɛ abaɖa wɔ; yi nunɔnla lagbe tuii zevegɔn nɛ ŋkeke anŋdrɛ. ³⁴ Nunɔnla laglo abaɖa kpɔ le ŋkeke anŋdrɛgɔn gbe. Nɛ abaɖa ŋde keke ɖodji le agbazea ŋtsi, yi nɛ ŋde tsito sɔwu agbazea Olɔ, nunɔnla lakpɔɛ be ele kɔkɔɛ; elanyan yo awuwo, yi yilanɔn kɔkɔɛ. ³⁵ Vɔ nɛ abaɖa keke ɖodji le yo ŋgbodomɛ tsinɛ wokpɔe be ele kɔkɔɛ lɔ, ³⁶ nunɔnla lagloekpɔ. Yi ne abaɖa keke ɖodji le agbazea ŋtsi lɔ, nunɔnla ŋde gbadjibe yakpɔbe eɖa le hĩn O: ele makɔmakɔ. ³⁷ Nɛ abaɖa le nɛnɛ lɔ, yi eɖa yibɔa to ɖodji lɔ, abaɖa ku: ele kɔkɔɛ, yi nunɔnla lakpɔɛ be ele kɔkɔɛ. ³⁸ Nɛ nusuɖe alo nyɔnuɖe ɖo kɔla ɣe do agbaze mɛlɔ, ³⁹ nunɔnla lagloekpɔ. Nɛ yo ŋtsi le akpɔn lɔ, ŋde nyi abaɖa yi kankan ɖo ŋtsi O: ele kɔkɔɛ. ⁴⁰ Nɛ eɖa vɔ le tadji nɛ amɛɖe lɔ, enyi takokoliko: ele kɔkoɛ. ⁴¹ Nɛ eɖa vɔ le ŋgonu nii lɔ, enyi ŋgonu yo takokoliko: ele kɔkɔɛ. ⁴² Vɔ nɛ edjĩn hɛlihɛli le ŋkɔ yo eɖamɛ alo texoe tsinɛ le takokoliko lɔ, eyɛnyi ekpodɔ tsinɛva ŋkɔ alo ŋgbodomɛ yo ɖamɛ. ⁴³ Nunɔnla lagloiikpɔ. Nɛkpɔbe nutsinɛ le yo ŋgonu alo ŋgbodomɛ le eɣe alo edjĩn hɛlihɛli lɔ, sigbebe letsi ekpodɔ nɔnɔn agbazemɛ namɛ lɔ, ⁴⁴ enyi nusu tsinɛ le ekpodɔ, ele makɔmakɔ: nunɔnla lakpɔɛ be ele makɔmakɔ; etamɛ yi abia le nii. ⁴⁵ Ekponɔn tsinɛ ɖo abia , lado awu vunvunwo, yi laxlɔ eta; yi yilasɔ enu sɔtsɔn eguĩmɛ, yilanɔn axua doɔ be: Makɔmakɔ! Makɔmakɔ! ⁴⁶ Sɔna kaka gatsimɛ abia lanɔn ŋtsi nii lɔ, elanɔn makɔmakɔ: enyi makɔmakɔ. Yeɖeka kpoe lanɔn anyi; yo texoe lanɔn ekpa godo. ⁴⁷ Nɛ ekpodɔ ɖo awuɖe mɛ, etɛnŋ nyi kuŋtu alo aklala, alo avɔ, alo nutsinɛ wosɔ ɖetsi lɔn, alo linvɔ, ⁴⁸ le agbaze ŋtsi alo nuɖekpekpe tsinɛ wosɔ alɔ wɔ , ⁴⁹ yi abia lanɔn gbemumu alo edjĩn hɛlihɛli le awua alo agbazea dji alo agbaze ɖekpekpe dji lɔ, ke ekpodɔ yɔ, yi wolasɔɛ sɔfiɔn nunɔnla lɔ. ⁵⁰ Nunɔnla laglo abia kpɔ, yi yilatu enutsinɛ dji ekpoa dje nɛ ŋkeke anŋdrɛ. ⁵¹ Elakpɔ abia le ŋkeke anŋdrɛgɔn gbe. Nɛ abia keke ɖodji le awua ŋtsi alo avɔa, nutsinɛ wolɔn, alo agbaze dɔwɔwɔ lɔ lɔ, ke ekpodɔ baɖa yɔ, enua ŋtsi ŋde kɔ. ⁵² Elatɔzo awua, avɔa alo ɖetsi alo elan gbazea wɔ, linvɔ alo nuɖekpekpe tsiŋtsi enua gbedjea, ɖo ekpodɔ baɖa yɔ: wolasɔ ezo fiɔn enua. ⁵³ Vɔ nɛ nunɔnla kpɔbe abia ŋde kankan ɖo awua , avɔa, nu tsinɛ wolɔn alo wosɔ agbaze wua dji Olɔ, ⁵⁴ ela dose be wonɛnyan enutsinɛ ŋtsi abia le, yi yilatui zevegɔn ke nɛ ŋkeke anŋdrɛ. ⁵⁵ Nunɔnla lagbe gloekpɔ le gatsimɛ yi wonyɛ. Nɛ abia ŋde kekeɖodji Olɔ, enua le makɔmakɔ: wola tɔzo enua; ekpodɔ yinyi leɖo ŋtsi le ŋgbodomɛ alo ŋkɔ yi ɖuii. ⁵⁶ Nɛ nunɔnla kpɔbe abia lekpɔn le enua yo nyănyan ŋgbodomɛ lɔ, elaɖe djole awua , gavia, agbazea, avɔa , nutsinɛ wolɔn alo agbazea ŋtsi . ⁵⁷ Nɛgbeze ɖo awua , gavia, avɔ, alo nutsinɛ wosɔ langbaza lɔn, alo agbaze yo nuɖekpekpe ŋtsi lɔ, eyɛnyi ekpodɔ baɖa:Wolatɔzo enutsinɛ ŋtsi ekpodɔa le. ⁵⁸ Awua, gavia , avɔa, alo nutsinɛ wogbesɔ agbaze lɔn, tsinɛ wonyan, yi fitsinɛ abia nɔn gbɔxoe vabu lɔ, lanyi nyănyan, yi yilanɔn kɔkɔɛ. ⁵⁹ Eyɛ yinyi ese sɔkuɖo ekpodɔ ŋtsi, gatsimɛ yi yile eɖo, lĩn yo awuwo, kuŋtu alo aklala, avɔ alo nutsinɛ wolɔn , alo wosɔ lăgbaza sɔwɔ ŋtsi, legatsimɛ yi wolakpɔwo be wole kɔkɔɛ alo makɔmakɔ.