¹ Yehowa xonuxo nɛ Mɔse kudo Aarɔn , yinu be: ² Mito nɛ Izraɛlviwo , be: Elan tsinɛwo milaɖu le elan afɔnɛwo domɛ le anyigbandji yinyi tsɛ. ³ Milaɖu elan ɖekpekpe tsinɛ ɖo afɔ enɛn tsinɛwo kpata yo azomɛ fĩn, yi woɖunɔn egbe. ⁴ Vɔlɔ miŋda ɖu tsinɛwo ɖunɔn egbe kpoo, alo tsinɛwo ɖo azo fĩnfĩn kpoo. Nɛnɛyi, miŋda ɖu enyi kpotɔnɔn, tsinɛ ɖunɔn egbe, vɔlɔ ŋdeɖo azo fĩnfĩn O: Milakpɔɛ sigbebe enu tsiŋde kɔɔ. ⁵ Miŋda ɖu sɔfi tsinɛ ɖunɔn egbe, vɔ ŋdeɖo azo fĩnfĩn O: milakpɔɛ elan makɔmakɔ. ⁶ Miŋda ɖu azuĩn , tsinɛ ɖunɔn egbe, vɔ ŋdeɖo azo fĩnfĩn O: milakpɔɛ elan makɔmakɔ. ⁷ Miŋda ɖu ehan, tsinɛ ɖo azo fĩnfĩn kudo afomɛ fĩnfĩn , vɔ ŋde ɖunɔn egbe sigbe egbɔ nɛnɛɔn: milakpɔɛ elan makɔmakɔ. ⁸ Miŋda ɖu wo lanwo O, yi miŋda tɔalɔ wo lankpotsi kukuwo tsan Ɔ: milakpɔwo sigbebe elan makɔmakɔ. ⁹ Elan tsinɛwo le etɔgɔmɛ yi milaɖuwo ke. Milaɖu etsiwo kpata ɖo adjawo kudo etsrowo, yi wole etɔmɛ, alo axumɛ, alo tɔgbawo mɛ. ¹⁰ Vɔlɔ milakpɔ tsiwo kpata ŋde ɖo adja kudo etsro be wonyi enunyɔnŋu, le enutsiwo kpata le etɔwo mɛ kudo tsiwo nɔnɔn tɔgbamɛ, alo axumɛ, alo tɔsrasrawo mɛ. ¹¹ Milakpɔwo sigbebe nunyɔnŋu, miŋda ɖu wo lan O, yi milakpɔ wo elan kuku sigbebe enunyɔnŋu . ¹² Milakpɔ tsiwo kpata lanɔn etɔwo mɛ, yi ŋda ɖo adja alo etsro be nunyɔnŋu. ¹³ Xevi tsiwo milakpɔbe wonyi nunyɔnŋu yi miŋda ɖui O ke : Ehɔn, akpo, gbagbla, kudo ehɔn axumɛtɔ; ¹⁴ ahuako, kudo ayisu kudo yo xomɛwo kpata; ¹⁵ tsankpoli kudo nɔnviɛwo; ¹⁶ golo, azexe, tsalɛ, ahuako kudo nɔnviawo; ¹⁷ hulukuku, tɔkpakpa kudo azexe ; ¹⁸ aŋɔnɣe kudo tɔkpakpa yibɔ, ¹⁹ tɔxevi adɔn gbɔngbɔĩn, agudjixevi kudo wawavi. ²⁰ Enu tsinɛ zronɔn tsiwo nɔnɔn afɔ enɛn dji lanyi nunyɔnŋu nɛmi. ²¹ Vɔ milatɛnŋ ɖu nuzrozro tsinɛwo zɔnɔn le afɔ enɛn dji vɔ sɔnɔn ŋgbodomɛ fɔwo sɔzronɔn zaaɖe le anyigbandji. ²² Etsiwo milaɖuwo ke: Ebɔ, egbekakaraka, vetra, ebɔ yo xomɛwo kpata. ²³ Yi enuzrozro tsiwo ɖo afɔ enɛn buwo tsan lanyi enunyɔnŋu nɛmi. ²⁴ Wolanan milaxoɖi: Amɛsiamɛ tsinɛ latɔ alɔ wo kukuwo lanɔn xoɖixoɖi kakavanan woetrɔgbɔ, ²⁵ yi amɛsiamɛ tsinɛ lakɔkɔ wo lankpotsi kuku lɔ, laklɔ yo awuwo yi lanɔn makɔmakɔ kakavanan woetrɔgbɔ. ²⁶ Elan tsiwo kpata yo azomɛ fĩn, yiɖo afɔmɛ fĩnfĩn lɔ, yi ŋde gbetrɔnɔnɖunɔn egbe O lanyi enu makɔkɔ nɛmi: Amɛsiamɛ tsinɛ latɔ alɔɛ lanɔn makɔmakɔ. ²⁷ Milakpɔ elan tsiwo kpata ɖo afɔmɛ enɛn tsiwo zɔnɔn le wo afɔ dji: Amɛtsiwo kpata latɔ alɔ wo lankpotsi kuku lanɔn makɔmakɔ kakavanan woetrɔgbɔ, ²⁸ yi amɛsiamɛ tsinɛ ladroe lɔ, lanyan yo awuwo yi lanɔn makɔmakɔ kakavanan woetrɔgbɔ. Milakpɔwo sigbebe enu makɔmakɔwo nɛnɛ. ²⁹ Elan tsiwo lanɔn anyigbandji yi milakpɔ sigbebe enumakɔmakɔwo nɛnɛ yinyi tsɛ: Adɔ, afĩn kudo adoglo, yo xomɛviwo; ³⁰ adjidjan, abito, eklo, eve kudo agăman. ³¹ Milakpɔwo sigbebe enumakɔmakɔwo le elan tsinɛwo tanɔn le anyigban : Amɛsiamɛ tsinɛ latɔ alɔ wo lankpotsi kuku lɔ, lanɔn makɔmakɔ kakavanan woetrɔgbɔ. ³² Enuɖekpekpe tsinɛ dji wo lankpotsiwo ladje lɔ, lanɔn makɔmakɔ, agban, atsinu, avɔ, ŋtsigbe, akpɛtɛ, enuɖekpekpe tsinɛ wogbe zănɔn; wolasɔɛ do esimɛ kakavanan woetrɔgbɔ; le yo ŋgbodomɛ lɔ, elanɔn kɔkɔɛ. ³³ Enuɖekpekpe tsinɛ lanɔn agban mɛ gbɔxoe elan kukua ladje mɛ lɔ, lanɔn makɔmakɔ, yi milagban agban lɔ. ³⁴ Nuɖuɖu ɖekpekpe tsinɛdji wokɔ esi tsɛ ɖo lɔ, ŋde kɔɔ; yi esi tsinɛ dji wokɔɛɖo tsan ŋde kɔɔ, ŋdekan agbanlɔ tsimɛ yileo lɔ, elanyi numakɔmakɔ. ³⁵ Enuɖekpekpe tsinɛdji wo lankpotsi ladje lanɔn makɔmakɔ; wolagban adokpoa kudo mlɛkpoea : wolanɔn makɔmakɔ, yi milakpɔɛ sigbebe enumakɔmakɔwo nɛnɛ. ³⁶ Etɔwo kudo vudowo yɛ tsinɛ bɔɖo texoe ɖeka kpoe kɔ; ganke amɛtsinɛ latɔ alɔ wo lankpotsi kukuwo yɛ ŋde kɔɔ. ³⁷ Nɛ wo lankpotsi kuku dje nuku tsinɛ woledja do yɛdji lɔ, elanɔn kɔkɔɛ; ³⁸ vɔ nɛnyibe wokɔ esi ɖo enudodoa dji , gbɔxoe wolan kukuwo djedji lɔ, milakpoɛ sigbebe enumakɔmakɔ. ³⁹ Nɛ elan tsiwo domɛtɔɖe miɖunɔn ku lɔ, amɛtsinɛ latɔ alɔɛ lanɔn makɔmakɔ kakavanan woetrɔgbɔ; ⁴⁰ amɛtsinɛ laɖu yo lan kukua, lagnan yo awuwo yi yilanɔn makɔmakɔ kakavanan woetrɔgbɔ, yi amɛtsinɛ lakɔkɔ yo lankpotsi kukua lagnan yo awuwo yi lanɔn makɔmakɔ kakavanan woetrɔgbɔ. ⁴¹ Anyigbandji lanwo kpata tsinɛ tanɔn lanyi enunyɔŋu nɛmi: woŋda ɖuio. ⁴² Miŋda ɖu elan tsiwo kpata tanɔn le anyigban dji O, etsiwo kpata zɔnɔn le xodo dji, alo tsiwo kpata tanɔn le afɔ nɛŋ dji alo afɔ gbogboɖe dji O; ɖo milakpɔwo be enunyɔŋu. ⁴³ Miŋgbenan mia amɛwo nɛnyi enunyɔŋu to elan tsɛwo tanɔn le anyigbandji O; miŋgbenan mianɔn makɔmakɔ to wodjio, miŋgbenɔn makɔmakɔ to elan tysɛwo dji O. ⁴⁴ Ɖo enyɛ yinyi Yehowa, mia Mawu; milakɔ miaɖokoe ŋtsi, yi milanɔn kɔkɔɛ, ɖo ŋle kɔkɔɛ; yi miŋdawɔ miaɖokoei makɔmakɔ ɖo elan tsɛwo tsinɛ tanɔn le anyigbandji ŋtsi O. ⁴⁵ Ɖo enyɛ yinyi Yehowa, tsinɛ kplɔmi sɔso Egipti dumɛ, benɛ manyi mia Mawu, yibe mianɔn kɔkɔɛ; ɖo ŋle kɔkɔɛ. ⁴⁶ Eyɛ yinyi ese tsinɛ kuɖo elanwo ŋtsi , xeviwo, elan tsiwo kpata le etɔmɛwo, kudo elan tsiwo kpata tanɔn le anyigban dji ke, ⁴⁷ benɛ miatɛnŋ do djesi enutsinɛ nyi makɔmakɔ kudo enutsinɛ nyi kɔkɔɛ, elan tsinɛ wolaɖu kudo tsinɛ woŋdatɛnŋ ɖu O.