¹ Aarɔn yo vi nusuviwo, Nadab kudo abihu, wodozo ɖo woŋtɔ ezodonuwo mɛ, yi wosɔ azizɔdonuwo ɖo womɛ, yi wosɔ ezo bu tsinɛ ŋtsi woŋde ɖemɔn nɔnwo sɔyi Yehowa yo ŋkumɛ. ² Zeɖekalɔ, ezo tole Yehowa yo ŋkuemɛ, yi fiɔnwo: Woku le Yehowa yo ŋkumɛ. ³ Mɔse tonɛ Aarɔn be: Enutsi Yehowa nu nɛ, le gatsimɛ yinu be: Amɛsiamɛ tsinɛ lava gbɔnyɛ ɖolakɔ yiɖekoe ŋtsi, yi naɖe axĩn ŋtsikɔkɔe lasɔfiɔn dukɔnlɔ. Aarɔn bɔnu kpooo. ⁴ Yi Mɔse yɔ Mischaɛl kudo Ɛltsafan, tsiwo nyi Uziɛl viwo , Aarɔn yo nyini sɔva, yinu be: Miteva, mikplɔ mianɔnviwo djole Mawu yo asara gbedoxɔa gbɔ ɖaaa sɔyi. ⁵ Woteteva, yi wokplɔwo djoɖa le Mawu yo gbedoxɔa yo asara gbɔ le wo awuwo mɛ, sigbebe letsi Mɔse nui nɛnɛ. ⁶ Mɔse tonɛ Aarɔn yo viwo , Eleazar kudo Ithamar be: Miŋgbe kankan mia ɖawo ɖo ta O, yi miŋdavuŋ mia awuwo, le vɔnvɔn mɛ, be milaku, benɛ Yehowa nɛdo adɔmɛzoe ɖo amɛha kpata ŋtsio. Miɖatsi mianɔnvi Izraɛlviwo, be wonɛfan avi ɖo ametsiwo Yehowa tɔ ezo ŋtsi. ⁷ Miawoyɛlɔ, miŋgbe tole Mawu yo gbedoxɔamɛ, ku vɔnvɔn be miaku O; ɖolɔ Yehowa yo amisisi le miadji. Wowɔɖo nutsinɛ Mɔse tonɔnwo dji. ⁸ Yehowa tonɛ Aarɔn be: ⁹ Ewo kudo eviwo miŋdanu vinha, alo enumuamɛ ɖekpe nɛ milaguĩnɖo Mawu yo gbedoxɔa mɛɔn, kudo vɔnvɔn be milaku: Eyɛ lanyi ese tɛgbɛ nɛ mia djidjimɛviwo, ¹⁰ benɛ miadovovototo enukɔkɔɛ kudo makɔmakɔ, enutsinɛ nyɔn kudo tsinɛ ŋde nyɔn domɛ. ¹¹ Yi mifiɔn miavi Izraɛviwo esewo tsinɛ Yehowa nan Mose. ¹² Mɔse tonɛ Aarɔn yo vi amɛveawo , Eleazar kudo Ithamar tsinɛ kpɔtɔ nii be: Misɔ nuɖuɖuvɔsa tsinɛ kpɔtɔ sɔso Yehowa yo ezovɔsa ŋtsi, yi miaɖuii mahuanmahuan le avɔsakpea gbɔ: ɖo enukɔkɔɛ yo enukɔkɔɛ yɔ. ¹³ Milaɖuii le kɔkɔxoea; woŋtɔ kudo eviwo wo yo gomɛ sɔso Yehowa gbɔ le ezovɔsa mɛ; ɖo enutsinɛ woɖo nuŋ nɛ. ¹⁴ Milaɖuii le texoe kɔkɔɛ, ewo , miavi nusuviwo kudo nyɔnuviwo; akɔta tsinɛ wohunhun le miɔndji kudo ɖusidji kudo amɔta tsinɛ wokɔkɔ ɖodji; ɖoŋtsi wosɔwonan mi, sigbebe gomɛ nɛ viwo nɛnɛ, le Izraɛlviwo yo akpedavɔsa mɛ. ¹⁵ Wolasɔ abɔta tsinɛ kpeɖo amiwo tsinɛ wolatɔzo woŋtsi kudo akɔta tsinɛ wolahunhun ɖo texoe ɖeka kudo evegɔn dji ɖo Yehowa yo ŋkumɛ: wolanyi tɔwo kudo eviwo tɔ, le esedodo tɛgbɛtɛgbɛ mɛ, sigbebe letsi Yehowa ɖoeɖɛ nɛnɛ. ¹⁶ Mɔse yidji nuvuĩɖeɖeɖa yo agboa; yi kpɔɖa ezo fiɔnŋ. Yi yido dɔmɛzoe do Eleazar kudo Ithamar, Aarɔn yo vi tsiwo kpɔtɔ, yinu be: ¹⁷ Ŋdeŋtsi miŋɖu avunlele yo vɔsa le texoe kɔkɔɛ lɔ? Enukɔkɔɛ yo nukɔkɔɛ yɔ; yi Yehowa sɔɛ nami , benɛ miasɔ amɛha yo nuvuĩn ɖo miadji, benɛ miawɔ nuvuĩɖeɖeɖa yo vɔsa le Yehowa yo ŋkumɛ. ¹⁸ Kpɔɖa, woŋdasɔ ehuanlɔ yiɖo Mawu yo kɔkɔxoea mɛɔn; miɖolaɖuii le texoe kɔkɔɛa, sigbebe letsi ŋdo ese nɛmi nɛnɛ. ¹⁹ Aarɔn tonɛ Mɔse be: Kpɔ, wosa numɛvɔsa kudo numɛmɛvɔsa egbɛ le Yehowa yo ŋkumɛ; yi, nɛnyibe ŋɖu nuvuĩnɖeɖeɖa yo avɔsalɔ egbɛ ɖe, ɖeyi yiladjɔdji nɛ Yehowa? ²⁰ Tsinɛ Mɔse selɔ, edjɔdji nii.