¹ Izraɛl viwo ŋde wɔ nutexoe ɖoɖa abowo nuwo ŋtsi o. Akan, karmi tɔdjidji tsinyi Zadji yo vi, Zerach yo vi, tsinɛ so Yuda yo kɔta me, Zerach yo vi, tsinɛ so yuda yo kɔta mɛ, sɔ nutsiwo wobe wonɛ tsrɔn. Yi Yehowa yo adɔmɛzoe ginɖo Izraɛl viwo dji. ² Yoshua dɔ dɔ nusuwo ɖoɖa Ai gbɔ le Yeriko, tsinɛ gogo Beth-Avɛn, tsile Bɛtɛl yo woezexoe. Etonɔnwo be: Mitsite nɛ miayi ɖisa le dua mɛ. Yi nusuyɛwo so, yi yiɖisa le Ai. ³ Wotrɔgbɔva Yoshua gbɔ, yi nu nii be: ŋde hian be nanan dukkɔn kpata nɛ zɔn; amɛ kotokuŋ ve alo etɔn su benɛ Yaɖu Ai dji; ŋgbe do nuxo nɛ dukɔnlɔ o, ɖo amɛ viɖe kpo wonyi. ⁴ Amɛ kotokuŋ tɔn lɔge yi so zɔn, vɔ wobɛ dumɛ le Ai tɔwo yo ŋkɔ. ⁵ Ai tɔwo wu nusu gbantsi adin nɔwo; woɖe ɖowo dji so agboa dji kakavaɖo Schebarim, yi wo xowo le edɔnlɔ mɛ. Dukɔnlɔ gbɔdjɔ yi ŋsɛn vɔ lesi. ⁶ Yoshua zin yo awuwo, yi Yekudo Izraɛl yo amɛganwo dota guŋ yi lɔ ekɔ kɔɖo eta. ⁷ Yoshua be: Oo, Axoetɔ Yehowa, ŋde ŋtsi wonan dukonlɔ so Yɔrdan yo tɔa benɛ nava sɔmi do alɔmɛ nɛ Amɔritɔwo benɛ miatsrɔn ɖo? Oo, nɛ ɖeyi midjo tsi Yɔrdan tɔa godo ŋdjo nyɔwu o! ⁸ Ŋɖekuku, Axoetɔ, enyɔn ŋde nanu nɛ Izraɛl trɔ ŋgbodomɛ do yo funtɔwo? ⁹ Kananitɔwo kudo anyigbandjitɔwo lase; wolava bɔta ɖo miaŋtsi, yi wolana mia nyikɔ labu le anyigban dji. Lede wolawɔ ɖo sɔkuɖo axo ŋkɔ gan xɔn ŋtsi? ¹⁰ Yehowa nu nɛ Yoshua be: Tsite! ŋde ŋtsi wotsɔn ŋkume anyi ɖo? ¹¹ Izraɛl wɔ nuvɔn; woda le axin nublabla tsi ŋlɔn nɔwo ŋtsi, woso enu tsiwo wola tsrɔn yo ɖe, wofiŋ yi wosɔ xla, yi wosɔ xla ɖo wo agbanwo mɛ. ¹² Yiŋtsi Izraɛlviwo ŋda tɛnŋ nɔte ɖo wo funtɔwo yo ŋkɔ, wola si le wo funtɔwo yo ŋkɔ; ɖo wole tsɔntsrɔn te; nyɛ ŋde gba nɔ anyi kudo mi, ne miŋde tsrɔn enutsi ŋtonɛ mi be miatsrɔn ɖo le miadomɛɔn. ¹³ Tsite, kɔ dukɔnlɔ ŋtsi. Wolanu be: mikɔ miaɖokoe ŋtsi nɛ sɔ; ɖo enyɔ tsi nuɔ yi Yehowa, Izraɛl Mawua le ke: Enu matsrɔnmatsrɔn le axo domɛ Izraɛl; ŋda tɛnŋ nɔte ɖo axo funtɔwo yo ŋkɔ, kakavana gatsime yi woɖe enutsrɔntsrɔn ɖa le axo domɛ. ¹⁴ Miakpata mivabɔ esɔ ŋdekɛnyɛn, kɔta sia kɔta; yi kɔta tsinɛ Yehowa latsan lɔ, lava kudo yo xomɛ, yi xomɛ tsinɛ Yehowa latsan, lava kudo yo axuedo, yi axuedo tsinɛ Yehowa latsan lava kudo yo nusuwo. ¹⁵ Ametsinɛ wolatsan be wigbɔ wokpɔ enutsrɔntsrɔn le lɔ, wolatɔzoe, yi kudo nutsiwo lesi, ɖo etu Yehowa yo nublabla le tsimɛ yiwɔ busunu le Izraɛl. ¹⁶ Yoshua fɔn le ŋdekɛnyɛn mɛ, yi yina Izraɛlviwo va le kɔta nu, yi wotsan yuda yo kɔta. ¹⁷ Ena Yuda yo xomɛan tegogoii, yi wotsan Zerach yo xomɛan. Enan wokplɔ Zerach yo xomɛan va axoe sia axoe, yi wotsan Zabdi. ¹⁸ Enan Zabdi yo axomɛ nusu ɖesiaɖe va, yi wotsan Akan Karmi yo vi, Zabdi yo vi, Zerach yo vi tsinɛ so yuda yo kɔta mɛ. ¹⁹ Yoshua nunɛ Akan be: Evinyɛ, sɔ ŋtsikɔkɔɛ na Yehowa, Izraɛl yo Mawu lɔ yi nasɔ bubu nii. To enutsi wowɔ lɔ nuŋ, yi ŋgbe xlua enuɖe doŋ o. ²⁰ Akan ɖoŋtsi nɛ Yoshua be: nyao ŋwa nuvɔn le Yehowa, Izraɛl Mawu ŋtsi, yi enutsi ŋwɔ ke. ²¹ Ŋkpɔ Schinear yo awu lɔbɔ ɖeka le agbanwo mɛ, sekɛlga kanɛntakpo, kudo sikakɔn ɖeka, ebianŋ nuŋ, yi ŋsɔɛ; ŋɖii ɖo agbadɔlɔ yo dodomɛ yi ega le gɔmɛ nii. ²² Yoshua dɔ amɔwo ɖoɖa tsinɛ vayi ɖisa le agbadɔ lɔ mɛ; yi kpɔ, enuɔnwo le xlaxla le agbadɔ lɔ mɛ yi ega le gɔmɛ nii. ²³ Wosɔɛ tole agbadɔ lɔ mɛ, yi wosɔɛ vanɛ Yoshua kudo Izraɛl viwo, yi wosɔ daɖo Yehowa yo ŋkumɛ. ²⁴ Yoshua kudo Izrael viwo le Akan, Zerach vi, ega, awulɔbɔ lɔ, sika kɔn lɔ, evia nusuvíwo kudo nyɔnnuviwo, yo enyiwo, yo esɔakɛtɛwo, yo alɛnviwo, yo agbadɔ kudo enu tsiwo kpata lesi; wolɔɛ sɔyi. Akɔr yo dɔnmɛ. ²⁵ Yoshua nu be: ŋde ŋtsi wotsaka mi ɖo? Yehowa lahen djɔgbevuin va djiwo egbɛ. Yi Izraɛl dukɔnlɔ xo ekpii. ²⁶ Yi woɖo ekpe ganɖe ɖo Akan dji, tsinɛ le kakavana egbɛ yi Yehowa yo dɔmezoeɛnu fa. Enyɔndjɔdjɔ xɔn ŋtsi yi woɖonɛ texoe xɔn kakavana egbɛ be Akɔr yo dɔnmɛ.