¹ Yehowa nu nɛ Yoshua be: ŋgbe vɔn nɛ djika nɛ Yaso wo o! Kplɔ nusu ahuawɔtɔwo bɔɖo ŋtsiwo, tsite yi nadoɖo Ai ŋtsi. Kpɔ, ŋsɔ Ai yo fiɔ sɔdo alɔmɛ nɔwo, kudo yo dukɔn, yo du kudo yoanyigba. ² Letsi wowɔ kudo Yeriko lɔ, wolawɔ nɛnɛ nɛ Ai kudo yo fiɔ; ganke mila tɛnŋ lɔ yo tsinɔ nuwo nɛ miaɖokui kudo lanwo. Tremɔn nɔwo do dua yo ŋgbodomɛ. ³ Yoshua tsite kudo yo ahuagawo, benɛ yaso do Ai ŋtsi. Etsan nusu sɛnsɛn kotokun egban, tsinɛ yina wodjo zandomɛ, ⁴ Yi yidose tsɛwo nɔwo be: mise, milado exa ɖo edu yo ŋgbodomɛ; miŋgbe djidji kakaka le dua gbɔ, vɔ misɔ egbɔ. ⁵ Vɔ enyɛyɛ kudo dukɔnlɔ tsinɛle gbɔnyɛlɔ, mila zɔnɖo edua dji yi nɛ wozɔnɖo miadji, sigbebe tutugban nɛnɛ lɔ, milasi le wo ŋkɔ. ⁶ Wolakplɔ miado kaka benɛ miadɔn wo djole edua mɛ; ɖo wolanu be: wole sisiɔ le miaŋkɔ, sigbebe tutugban nɛnɛ! yi milasi le woŋkɔ. ⁷ Milato le bebeamɛ, yi milaxɔ edua, yi Yehowa mia Mawua lasɔ edua do alɔmɛ ne mi.. ⁸ Nɛ mixɔ edua lɔ, milado ezo mɛ, milawɔ pɛpɛpɛ sigbebe aletsi Yehowa tonɛ mi: Ese tsinɛŋle dodoɔ nɛ mi nɛ. ⁹ Yoshua na be wodjo, yi woyi vayinɔ adjamɛ le Betel kudo Ai domɛ, le Ai yo woeɖoxɔ xoe. Vɔ Yoshua yɛ dɔn dukɔnlɔ domɛ, le zan xɔn mɛ. ¹⁰ Yoshua fɔn ŋdekɛnyin mɛ xoxo, yi yito ahuakɔnlɔ dji, enɔn dukɔnlɔ yo ŋkɔ, yi yizɔnɖo Ai dji yi kudo Izraɛl yo amɛganwo. ¹¹ Ahuagawo kpata tsile gbɔ lɔ, tegogoi yi wozɔndo; tsi wovayi ɖo edua yo ŋkɔ lɔ, wovayi bɔ ɖo Ai yo djigbedji tsinɛ edɔn ɖe man wo domɛ. ¹² Yoshua tsan nusu tsinɛ hɛnhlɛmɛ lanɔn sigbebe kotokun atɔn nɛnɛ, yi yisɔwo sɔdaɖo Betɛl kudo Ai yo dodome, le edua yo woeɖoxɔxoe. ¹³ Tsinɛ wokpata sɔgbe le edua yo djigbedji kudo gamɔn tsinɛ le edua yo woeɖaxɔxoe lɔ, Yoshua zɔnɖo edɔnlɔ mɛle zanmɛ. ¹⁴ Tsinɛ Ai yo fiɔ kpɔ xɔn lɔ, Aitɔwo tsite kpata le ŋdekɛnyin mɛ, yi zɔn kpanŋkɔIzraɛl, benɛ yawɔ ahua. Efiɔnlɔ kudo dukɔnlɔ zɔnɖo dagbamɛ tututu, yi woŋde nya be wotre gamɔn ɖo edua yo ŋgbodomɛɔn. ¹⁵ Yoshua kudo Izraɛlviwo wɔ sigbebe ahua ɖu yodji nenɛ, yi wosi to zogbe nɔnlɔ dji. ¹⁶ Yi dukɔnlɔ tsinɛ le duame bɔ benɛ Yehwoa kplɔ wodo. wokplɔ Yoshua do, yi yidɔn wo djole edua mɛ. ¹⁷ Nusu ɖekpe ŋde le Ai kudo Betel tsinɛ ŋde kplɔ Izraɛl do o. Woɖasi edua ɖo nuwo, yi kplɔ Izraɛl do. ¹⁸ Yehowa nu nɛ Yoshua be: kɔ atsikplɛ tsinɛ le alɔmɛ nɔwo ɖoɖa Ai dji, ɖo ŋda sɔɛ do axo ŋsɛn gɔnmɛ. Yi Yoshua atsikplɛ tsinɛ le alɔmɛ nii ɖoɖo edua dji. ¹⁹ Zeɖeka tsinɛ yikɔkɔ alɔ ŋitɔ lɔ nusu tsiwo le adjaxame lɔ to kpata le fitsi yi wole; woɖo edua me, xɔɛ, yi ɖebla do ezo ɖo mɛ. ²⁰ Tsinɛ Aitɔwo kpɔ ŋgbodomɛ, yi kpɔ edua yo azizɔ likɔ ledji, yi wo ŋde nyan afitsi wolasi to o. Izraɛlvi tsinɛwo si to zogbeɛ mɛ trɔ kanŋkɔ amɛtsinɛwo kplɔwo do; ²¹ Ɖo tsinɛ Yoshua kudo Izraɛl kpɔ be ametsiwo le adjaxamɛ xɔ edua, yi azizɔ tu likɔ le duame lɔ, wotrɔ ɖo Aitɔwo ŋtsi yi wotsrɔn wo. ²² Amɛtsiwo le duamɛ tsan to ɖo wodji, yi Izraɛl tɔn ekpa kplogodo trɔda Aitɔwo. Izrael tsrɔn wo, yi ŋde ɖasi amɛɖe ɖo agbe alo tsimɛ si o; ²³ Wole Ai yo fiɔ lɔ agbeagbe yi kplɔɛ sɔva nɛ Yoshua. ²⁴ Tsinɛ Izraelviwo wu Aitɔwo le dogbame, le zogbeɛmeafitsi yi wo kplɔwoɖo le, yi wokpata wotsrɔn le ewuigan nu lɔ, Izrael kpata trɔva Ai yi tsrɔwo le ewuigan nu. ²⁵ Agbetɔ kotokun woeve yi wowu gbexɔngbe, nusuwo kudo nyɔnuwo, wokpata Aitɔwo. ²⁶ Yoshua ŋde ɖiɖi alɔ kudo ehuan yitɔ kakavana gatsimɛ yi wokpata wotsrɔn vɔ kɛŋkeŋ. ²⁷ Axomɛlanwo kudo enutsigbewo duamɛtɔ kpoe Izrael sɔ, abe aletsi Yehowa do ese nɛ Yoshua nɛnɛ. ²⁸ Yoshua tɔzo Ai, yi yiwɔɛ glikpo gbangban tegbɛ, yi yile kakavana egbɛ. ²⁹ Edoka eve ne Ai yo fiɔ, yi yigbleɖɛ kakavana woetrɔgbɔ. tsinɛezan yitsɔntsɔngbe lɔ, Yoshua ɖegbe be wonɛ ɖiɖi yo amɛkukua djole atsia ŋtsi; wosɔe danŋkpɛn ɖo edua yo agboanu, yi wofɔ ekpewo sɔli ekɔ ganɖe ɖodji, tsinɛ tsi anyi vasɛnɖo egbɛ. ³⁰ Yi Yoshua ɖi vɔsakpe nɛ Yehowa, Izraɛl yo Mawua, le Ebal yo todji. ³¹ Abe aletsi Mɔse Yehowa yo dɔsɔvi ɖoeɖɛ nɛ Izraɛlviwo nenɛ, kudo aletsi woŋlɔɛɖɛ ɖo Mɔse yo se woeman me nenɛ be: vɔsakpe tsinɛ woŋde sɔ gakpo sɔkpa o; yidji wowɔ numɛvɔsawo, kudo akpedoavɔsawo ɖo. ³² Yi lexɔn lɔ, Yoshua ŋlɔn ese tsinɛwo Mɔse ŋlɔn nɛ Izraɛlviwo ɖo ekpeɛwo dji, le Izraelviwo yo ŋkumɛ. ³³ Izraɛl kpata, amɛganwo, yo sɔdjamɛganwo kudo yo kodjoɖotɔwo nɔte ɖo nublabla ɖaka yo xada eveɛ mɛ le nunɔlawo yo ŋkɔ, lewuiviwo tsinɛ kɔkɔ nublabla kudo Izraɛlviwo kpata le xɔn, mamanmɛ le Garizim yo toa lɔgue, yi mamanme evegɔnlɔ le Ebal yo toa gbɔ, le gbedoasi tsinɛ Mɔse, Yehowa yo subɔvi do dadɛ benɛ woayra Izraɛl yo dukɔn nɛnɛ. ³⁴ Yo ŋgbodome lɔ, Yoshua hlɛn ese yo nyawo kpata yayrawo kudo fiŋpodeawo abe aleyi woŋlɛ ɖo ese yo woeman me nɛnɛ. ³⁵ Nuɖekpe ŋde le Mɔse yo se woeman mɛ, tsinɛ Yoshua ŋde hlɛn le Izraɛl yo amɛha yo ŋkumɛɔn, nyɔnuwo, ɖeviwo kudo amɛdjrowo tsinɛwo le zɔnzɔn ɔɔle wodomɛ.