¹ Tete Suaxtɔ Bildad ɖoŋtsi ni be: ² Zenɛni yi ola xonuxo, yi axo nyɔwo zu aya vudjuvudju. ³ De Mawu la trɔ ta nɛn nyɔ djɔdjɔɛa, yi ŋsɛnkatatɔ la trɔ ta nɛn djɔdjɔɛnyinyia? ⁴ Nɛn nyin ɖe yi viwowo wɔ nuvɔ kexoa uiŋtsi esɔwo do asi nen nuvɔ ɖo. ⁵ Ke nɛn odji Mawu edjiedji, yi odo gbeɖa nɛn ŋsɛnkata tɔ lɔ. ⁶ Nɛn odjɔ, yi owɔ nu djɔdjɔ lɔ, kexɔa ela kpɔ tawo, yi ela djɔ axo djɔdjɔɛnyinyi texoe lɔ do. ⁷ Yi nɛn ole nyɔ nyui kaka lɔ, kexɔa ela dji do dji. ⁸ Ɖoŋtsia biɔ xomɛn santɔ se kpɔ, yi nalé ŋkuvi enyɔ tsi tsiwo mɛn wo fofowo ku lɔ ŋtsi kpɔ! ⁹ Ɖoŋtsia miawo lɔ tsɔɛviwo miɛnyɛ, yi ametsi ŋde kpɔ ŋɖe texoe wa yi miɛnyin; Ɖoŋtsia miɔ ŋkekewo le sigbe djesi nɛnɛ le anyigban dji. ¹⁰ Woawoe la fiɔɔ nu wola nui nɔ yi wola ɖe enyɔwo to so wo djiwo men be: ¹¹ Ɖe yi nyɔnu vifɛn miɔnɔ do afitsi esi ŋde leo wa? Yi ɖe yi apla miɔnɔ yi nen ŋde kpɔ esio wa? ¹² Egbe le mumu kpoe, yi ŋde ɖo sisi meɔ, ke etrɔ zu pupu nen egbewo kpata. ¹³ Lexa yi enɔnɔ nen amɛtsiwa kpata ŋlɔ be Mawu lɔ, yi amɛn ɖigbɔwo wo mɔkpɔkpɔ djenɔ gu. ¹⁴ Yio dji dodo do enu ŋtsi ŋde le ɖo ɖekpekpe o, yi yo mɔkpɔkpɔ le sigbe yeɖɔ nɛnɛ. ¹⁵ Ekunɔ ɖo yo xɔ ŋtsi, ke ŋde nɔnɔ teo, ekunɔ do eŋtsi, ke ŋde tɔnɔ teo. ¹⁶ Ewɔ nɔ mlɔmlɔ le ewe zeze mɛn, yi eɖenɔ ka le yo abɔ mɛn. ¹⁷ Edonɔ eke ɖo eke do ekpewo dji, yi yi etonɔ ekpowo men. ¹⁸ Nɛn eɖe djo le texoe xɔ lɔ, kexɔa etɔnɔ nuxo dji le eŋtsi be: nyɛ ŋde kpɔ wo kpɔɔ. ¹⁹ Kpɔɖa, ela yo djidjimɔ, yi ebu la miɔ ɖo yo ke men. ²⁰ Kpɔɖa, Mawu ŋde ɖinɔ gbɔ nuvɔwɔtɔɔ, yi ŋde lenɔ nubaɖawɔtɔ wo o, yi ŋde lenɔ nubaɖa wɔtɔwo yo alɔɔ. ²¹ Ela gbena nu koko la nɔ axo numɛn, yi ehadjidji la nɔ axo nu mɛn. ²² Ŋkpɛn la le amɛtsiwoe le wo ke, yi nu maɖota wɔtɔwo ŋda gbe nɔ anyigban dji o.