¹ De yi ŋde ahua mɛ agbetɔ le le anyiogbadjio wa? ɖe yo ŋkeke ŋde sigbe agbante dɔwɔtɔ yo ŋkeke wo nɛnɛ woa? ² Letsi amɛgbɔ nɔvi yo ŋkuvi bianɔ do vɔvɔli ŋtsi, yi letsi agbantedɔtɔ nɔ mɔkpɔɔ nɛn yo fɛntu lɔ, ³ Nɛnɛtutu yi nyɛɛ ŋxɔ hiaxletsivi yi wosɔ fuzan nu. ⁴ Nɛn ŋmlɔ anyi lɔ, kexɔan ŋbutamɛ be, gaŋdemɛ mafɔ? ezan dodo tsan ŋde sɔ ɖe? yi ŋponɔ togogoe wotsim, sɔna gatsime ŋu kenɔ. ⁵ Ŋdje ŋɛsi, yi agbaza tɔnyɛ pokɔ yi ŋgbe dje adé. ⁶ Ŋkeke tɔnyɛwo le dju siɔ sɔwu ehutsi lɔnɔ avɔa, yi edjonɔ tsi ŋde ɖonɔ mɔkpɔ woa. ⁷ Mibui kpɔ, poupou yi nyi agbe tɔnyɛn, yi ŋku tɔnyɛwo ŋda gbe kpɔ nunyɔnamɛ o. ⁸ Amɛtsiwoe fɔ ŋkuvi ɖo djinyɛ lɔ wo ŋdagbe kpɔŋo; yi ,nɛn wo djiŋtsan lɔ, wo ŋda gbe kpɔŋ o. ⁹ Alilikpo bunɔ, yi edjonɔ, nenɛ ke nɛn amɛn djo yi kudjesu lɔ ŋde gbe gbɔnɔ. ¹⁰ Ŋde gbegbɔnɔ vanɔ axomɛn o, yi ŋgbe djenɔsi yo nɔxoe. ¹¹ Yiŋtsia nyɛtsan nyɛŋde xemɔ nɛn nyɛ nu o, etsi axu dji le vɔvɔ, yi ŋle alenaɔ le luvɔ tɔnyɛn yo vevesese mɛn. ¹² Axu wɔ adan enyɛa alo bosro enyɛ be ɔdo ŋzɔnɔtɔwo do ŋtsinyɛa? ¹³ Nɛn ŋnu be, aba tɔnye nɛfa dji nu, yi axu dɔxoe nɛn xɔ ehian tu amɛn tɔnyɛwo ŋtsi lɔ. ¹⁴ Kexɔa esɔnɔ edrɔɛ kuku donɔ vɔvɔ nu, yi esɔnɔ nukpɔkpɔwo donɔ vɔvɔ nu. ¹⁵ Ale be gbɔgbɔ nɛ ya tsipo nɛn luvɔ tɔnyen, yi edji ku be yeaku. ¹⁶ Etsi kɔ nu, nyɛn ŋdji be manɔ agbe djidji o ɖe, ɖasi le ŋtsinyɛ ɖoŋtsia poupou yi nyi axu ŋkekewo. ¹⁷ Ŋde nyi agbetɔ be odo kɔkɔe, yi osɔ axo tamɛn ɖo eŋtsi? ¹⁸ Oɖoa etexoe nii ŋdekɛnyɛn ɖekpekpe mɛn, yi owɔnɔ dodokpɔ nii le minitsi ɖekpekpe mɛn. ¹⁹ Sɔna gaŋdemɛ ola ɖekɔ le ŋtsinyɛn, yi ola ɖasi le ŋtsinyɛn be nɛn man vo? ²⁰ Nɛn ŋwɔ nuvɔ lɔ, ŋdeyi gble le ŋtsiwo, ewò amɛsiamɛ ŋtsidjɔtɔ? Ŋdeŋtsi osɔŋ sɔwɔ djidjenu nen woŋtɔ, be ŋtrɔnyin dɔ nɛn nyɛn ŋtɔ amɛntsiɛ? ²¹ Ŋde ŋtsi ŋde sɔ axu nuvɔwo sɔke ŋɔ? yi ŋde na axu nuvɔwo djo? Fifia ŋle kɔmen mlɔ gbe, yi nɛn odjiŋ lɔ ŋde dja kpɔŋ.