¹ Yɔ amɛkpɔ, De amɛɖe latɛnŋ tɔ nɔwoa? kɔkɔɛwo tsiŋde tsi wola kpanŋkɔ yi ela xɔnɔn. ² Nya texoe, dɔmɛzidodo wunɔn ŋmɛmakɔtɔ, yi nuhuanhuan wunɔn tagbɔkukutɔ. ³ Ŋkpɔ kɔxoetɔ aditi ɖe yi ŋxofi do yo nɔxoe zeɖeka. ⁴ Eviawo ŋdelé dédéɖe o; wo wɔnɔn funyanfunyan kuwo, vɔa xɔnamɛtɔ ɖekpekpe ŋdelé nɔwo. ⁵ Adɔwuinɔwo ɖunɔn yo gbemɛnukuwo, woɖewo le ŋdjawomɛ tsan. ⁶ Ayaɖoɖo ŋde muɔn nɔ le atsi yo ké mɛ o, yi fuɖe namɛ ŋde tonɔ sa anyigban mɛ o. ⁷ Wodji agbetɔ ɖo aya ɖuɖu mɛ sigbe letsi huzuhuzu honɔn yi ayamɛ nɛnɛ. ⁸ Nɛ nyɛ nyi lɔ, ɖe natrɔ ɖo Mawu ŋtsi aɖe enyan tɔnyɛ wo nyi. ⁹ Amɛtsi wɔnu gangan tsiwo woŋ datɛnŋ towoa, yi woŋdatɛnŋ hlɛn yo nukunu wo. ¹⁰ Enana be esi djanɔn, edɔnɔ esi dada gbewo mɛ. ¹¹ Ekɔkɔnɔn ametsiwoe bɔbɔnɔn waɖokuiwo ɖo dji, efanɔn edji nɛ koenyifantɔwo. ¹² Egblenɔ ayewɔtɔwo susuɖeɖe be ŋgbe kpɔɛmɛvava nɔwo. ¹³ Elenɔ nunyatɔwo nɛ wole yo ayemɛnu wɔwoa, yi etsi nɔ aye djetɔwo ɖoɖo vɔnɖi wo kaba. ¹⁴ Vivitsi donɔn dowo le ŋdekannyɛ yi wo nɔn nɔn alɔ sanwɔ nyidɔnkusu mɛ sigbe zamɛ yo le nɛnɛ. ¹⁵ Mawu ɖenɔn wamɛnɔn le kpatsa, yo nu, yi so nusɛntɔyo lɔmɛ. ¹⁶ Lexa yi mɔkpɔkpɔ le nɛ amɛkplɔyuɛ yi enu madjɔmadjɔ wɔwɔ nu tsu. ¹⁷ Kpɔ ɖa, woyra amɛtsi Mawu dɔnto na; yi ŋtsi ŋgbe do vlo nusɛntɔalɔ yo to dɔndɔn o, ¹⁸ Ɖoŋtsia edonɔn abi amɛŋtsi, vɔa egbeblanyi ni. Exonamɛ ku alɔ, vɔa alɔa ke kpɔɛ da nɔn ɖɔ. ¹⁹ Ela ɖe le fukpekpemɛ ziɛgbɔziandɛn yi le amaŋdrɛ a mɛ tsan lɔ enuveve ɖekpekpe ŋda wɔwo. ²⁰ Nɛ woɖo to lɔ, elaɖewo so ekuyo lɔmɛ. Nɛ ahua djɔlɔ, ela ɖewo le kpatsa yo nugbɔ. ²¹ Mana woŋda lonyɔn axoɖi o nɛ enu le gblegble wɔ lɔ, ŋda vɔn. ²² Elasɔ tsrɔntsrɔn kudo adɔwuamɛ, vɔa ŋdavɔn nɛ lan wɔadawo o. ²³ Ekpewo ŋdanɔ axo gbemɛ o, yi elan wɔadanwo ladje xɔnlɔn kuwo. ²⁴ Wola nɔn axo zavamɛ avo; nɛ wohlɛn axo lanwo lɔ woakpata wola sun. ²⁵ Eviwowo tsan la sugbɔ ɖodji; wola nɔ sigbe egbe tsiwoe tonɔ le afiɖe kpekpe nɛnɛ. ²⁶ Wola siŋ ŋtɔ kegbɔxoe laku, sigbe le mɔlu sinɔn yo xonɔntɛ ɖo avamɛ daɖe, yi va donyi le enudodo yo gamɛ nɛnɛ. ²⁷ Kpɔda, Djɔb ɖe wole ŋkuvi ɖo enuyɛ wotsi nyuiɖea, kpɔɖebe elemɛ nyatexoea, se yi naya le axo nyɔnnyɔn ŋtsi.