¹ Fifia Eliphaz, Themantɔa to be: ² Nɛ amɛɖe xonuxo a ɖe, elavedji nɔ woa? Vɔa ɖe mɛnɖe la tɛnŋ bɔnu. ³ Kpɔɖa wofiɔnu amɛgbogboɖewo, yi wona nusɛn gbalowo. ⁴ Enyɔn tɔwo le anyidjetɔwo ɖote, yi wodo nusɛn eklo tsiwoe gbanwo. ⁵ Fifiɛ tsi eɖo djio lɔ, wogbɔ djɔa? fifiɛ tsi djɔ ɖo dji o lɔ, edji ɖe le xo nɔn woa. ⁶ Ŋaxo Mawu vɔnvɔn yi lanyi djidoxo tɔwo? Ŋaxo agbenɔnɔnyui yi la nyi mɔkpɔkpɔ tɔwo. ⁷ Buɛtsi kpɔ! Deyi ɖemanyatɔ ɖe trɔ kpɔa? Fiŋde wogble nudjɔdjɔɛ watɔ le kpɔ. ⁸ Nyɛ ŋkpɔ be amɛtsiwoe ɖenu baɖa yo gble yi wodofu ɖe namɛ yo nu lɔ, yi kpɔ yo la ɖe. ⁹ Mawu yo hunhun tsrɔnwo, yi yo aya dɔmɛzɛtɔ nanabe wonu va yi nɔn. ¹⁰ Djaŋta le gbe ɖewɔ, yi wolé gbe tewɔ; yi woŋɛn aɖu nɛ djaŋtaviwo. ¹¹ Djaŋta sɛnsɛn ŋde kpɔŋde lalé ɖu o, eku yi djaŋtanɔ yo viwo kantegbe. ¹² Fifiɛ wofi tofi nuŋ, yi eto tɔnyɛ sé enyɔn flafla. ¹³ Zanmɛ yo ŋtegan yo tamɛbubu, gatsimɛ amɔwo yi alɔnmɛ a. ¹⁴ Axi lanmɛ ble han; yi vɔnvɔn ɖoŋ yi ŋzro nyanyanya. ¹⁵ Gbɔngbɔn ɖe xoaya to ŋmɛ nuŋ va yi, yi eɖa tɔnyɛwo tsi kpoo. ¹⁶ Etɔte ɖo ŋmɛ nuŋ; vɔa nyɛŋɖe nya enutsi nyiɔn; Aɖaɖo teŋ zeɖeka egbe ɖeɖi be: ¹⁷ Ɖe agbetɔ latɛnŋ nyi amɛdjɔdjɔɛ le Mawu yo ŋmɛa? Agbetɔ latɛnŋ nyi amɛnyui le amɛtsi woea gbɔa? ¹⁸ Kpɔɖa, Mawu ŋde donɔn dji ɖo yo dɔla ŋtɔtsan tsi o. Ekpɔ nɔn nubaɖa nɛ yo dɔlawo. ¹⁹ Ŋdetsi wola dodji ɖo agbetɔ tsi wosɔ baba sɔwɔ ŋtsi ɖo; amɛtsiwoe djɔso hunhun ɖeɖe mɛ, yi nɛ wo tsu afɔ ɖo wadji lɔ, wogban nɔn sigbe kɔpovi nɛnɛ. ²⁰ Wola tsukuwo so ŋdekannyɛ kaka vasɛnɖo woetrɔmɛ, yi labu mini, amɛɖe kpékpé ŋdadjesi o. ²¹ Ŋnya texoe wɔ, nɛ wo agbekawo soa woku nɔn le nunya manyamɛ.