¹ Vɔ fifiɛ lɔ, ɖeviwo tsinɛ ŋde ɖo exoe tsinyɛ wo ŋtrɔzun nukoko na, vɔ san lɔ, ŋkpɔ be woatɔwo ŋde dje benɛ woazɔn kudo elankplɔvuŋ tsinyɛwo. ² Ŋtɔtsan ŋsɛn vɔ do wo, yi wo ŋda nɔn eboɖe nu nuŋ o. ³ Aŋaɖuɖu kudo adɔwuamɛ na be wo xu, wo sidjo yi texoe xuxuwo dji, texoe tsiwo nyi zogbe yi wo gble daɖɛ xoxo; ⁴ Wo sunɔn aŋɔntowo le axluawo dodomɛ, yi wo akpɔnɔn nyi atsiwo ke. ⁵ Wo nyawo le agbetɔwo domɛ, wo donɔn axua ɖo wo ta sigbe fianfiwo nɛnɛ. ⁶ Wo nɔnɔn avesuwo mɛ, edowo kudo ekpetowo mɛ; ⁷ Wole xɔxlɔɔ le axluawo dodomɛ, wobɔ le aŋuŋdjawo gɔmɛ. ⁸ Amɛtsibo mɛwo kudo amɛ manɔn boɖenuwo yo viwo wonyi, wosɔ eba nyawo le edua mɛ. ⁹ Yi fifiɛ lɔ, ŋtrɔzuŋ ehadjidji nɔwo, ŋtrɔzuŋ alɔmɛɖenu nɔwo. ¹⁰ Ahin nu le ŋkpin ɔ nɔwo, yi wodjole gbɔnyɛ, alo wotunɔn etan ɖo mɛ nuŋ. ¹¹ Tsinɛ ŋsɛn vɔ nuŋ yi ŋdje anyi lɔ, eyɛ na be wole enu nyanyrawo wɔɔ kudoŋ. ¹² Edɔɖemawɔɛtɔ yɛwo so ɖo axin alɔ ɖusi mɛ yile afɔ ɖusiwo tutuɔ nuŋ, woso ɖo ŋtsinyɛ le mɔnwo dji sɔna gbegble; ¹³ Wogble axin mɔn yile edɔ wɔɔ sɔn axin tsɔntsrɔn, etsi woadomɛtɔ ɖe ŋde hian kpeɖoŋtsi o; ¹⁴ Djika soŋ, egliɛ yo akpaɖe, luŋ ɖo djinyɛ yi woluŋ va gbɔnyɛ to glikpo gbangbanwo dji. ¹⁵ Djika soŋ, yi axin bubu bu sigbe aya yi luɛ djo nɛnɛ, axin djɔgbenyui djo sigbe aletsi aya lɔnɔn alilikpo ɖonu nɛnɛ. ¹⁶ Fifiɛ lɔ, agbe tsinyɛ nuvɔ, ɖo fuŋkpekpe yo ŋkekewo ginɖo axin luvɔn mɛ. ¹⁷ Ezan ŋɔnɔŋ yi wlonɔn exu nyɛwo ɖoɖa, vevesese tsinɛ le ɖuɖuŋ ŋde naŋ ŋtsifafa o. ¹⁸ Esɔ yo ŋsɛn kpata sɔkuɖo axin awu ŋtsi, sigbe aŋɔn nɛnɛ lɔ, elel ɖo ŋtsinyɛ. ¹⁹ Mawu sɔŋ sɔdaɖo baba mɛ, yi ŋle sigbebe ŋunŋun dede kudo afiŋfiŋ ²⁰ Ŋle axua do ɔ ɖoɖa gbɔwo ganke wogbe ŋtsi ɖoɖo nuŋ; ŋtsite le ŋkuwo mɛ, vɔ ɖekpo adjole kpɔkpɔŋ. ²¹ Wotrɔzuŋ tamɛsɛntɔ ɖo ŋtsinyɛ, wosɔ ŋsɛn tɔwo kpata sɔle avuŋ wɔɔ kudoŋ. ²² Wokɔkɔŋ, yi wodaŋ to aya tamɛ, yi wonan huzuhuzu droŋ ɖo nu. ²³ Ɖo, ŋnya be wokplɔŋ tuta eku mɛ, amɛgbetɔwo kpata yixoe. ²⁴ Vɔ, amɛtsi laku ŋhunhunɔn alɔwo? Amɛtsinɛ ginɖo gbegblemɛ ŋbiɔnɔn kpeɖoŋtsitɔ? ²⁵ Ɖe nyɛ fan avi ɖo amɛtsi le djɔgbevuin mɛ kpɔ? Ɖe nyɛ fan koenyi ɖotanɛ amɛtsi le funkpekpe mɛ kpɔ? ²⁶ Ŋnɔtekpɔ djɔgbe nyui vɔ djɔgbevuin vatuŋ; ŋle emɔn kpɔɔ nɛ kɛnklɛn vɔ vivitsi va . ²⁷ Ŋtsaka gasiagamɛ sɔso axin fuŋkpekpe yo agbeyɛ tsimɛ ŋle ŋtsi. ²⁸ Ŋnyrɔn tsiɖitsiɖi vɔ ŋde nyi nyidɔn yiŋtsi ŋnyrɔn ɖo o. Ŋtɔtsan le hadomɛ lɔ ŋle abobo do ɔ. ²⁹ Ŋtrɔzuŋ wataklɛ sɔso axin axua ɖodo mɛ, kudo zogbexegan (autruche) yo xɔlɔn. ³⁰ Axin agbaze nyrɔn yile gingin ɔɔ, axin xuwo le fiɔnfiɔn ɔɔ yi esi vɔle mɛ. ³¹ Axin harpi trɔzuŋ etsɔ tɔ, yi ŋzizi gbe kpo axin hutukelekpɛn le nanaɔ.