¹ Ŋdo se nɛ ŋkuvi tɔnyɛ, be ŋdagbe dɔ agianŋkuvi nɛ nyɔnuvi ɖekpekpe o. ² Ŋdela nyi axi gomɛ so Mawu gbɔ le dji, ŋde la nyi axi domɛnyinu so nusɛnwokpatatɔ tsile djipo a gbɔ? ³ Ŋnyi numadjɔmadjɔ watɔ yi tsrɔn nɔn? yi ŋnyi nubada watɔ dji djɔgbevɔn kɔnɔnɖo a? ⁴ Ɖe Mawu ŋle agbenɔnnɔn tɔnyɛ kpɔ ɔ: ɖe ŋlenɔn ŋkuvi ɖo afɔɖeɖe tɔnyɛ ɖekpekpe ŋtsio a? ⁵ Nɛ ŋnɔn adjeɖaɖo yo gbe, alo afɔ tɔnyɛ ɖo amɛbleble ŋtsi lɔ, ⁶ Mina nɛ adjidjeŋ kudo enudjinyui nɛ Mawu adjesi axi nutexoe wawa. ⁷ Nɛ ŋdjole mɔadji, ŋkuvi tɔnyɛ kplɔ axi dji djo, yi eɖi be ɖo alɔ ŋtsi nuŋ lɔ. ⁸ Kexɔna ŋdo nulɔ, wonɛhoe ku kea. ⁹ Nɛ edji tɔnyɛ trɔ ɖo nyɔnu ŋtsi, yi ŋdoxa ɖo hanyɛvi yo hɔntru xa lɔ. ¹⁰ Kexɔna esrɔn nyɛ nɛ tsuxɔ nɛ amɛbu, nɛ amɛdjro nɛ mlɔ egbɔ. ¹¹ Ɖoŋtsia enuyɛ nyi ŋkpɛn ganɖe, yi nyi ese dji dada le hɔnnudrɔntɔwo yo ŋmɛ. ¹² Ee, ezobibi yi nyi efiɔn nɔn enu yi nɔn kaka kuwode, efiɔn enu tɔnyɛ wo kpata. ¹³ Nɛ nyi dɔla ŋsu, alo dɔlanyɔnu ɖe kuku nuŋ, yi ŋde kpɔ enyɔnlɔ gbɔn nyui ɖeo. ¹⁴ Ŋde nawɔ nɛ Mawu tsite a? Nɛ ekankan enyɔn lɔ mɛ kpɔa, lede naɖo ŋtsi ni ɖo. ¹⁵ Ŋnyi amɛɖeka yi wɔ mi ɖo xodomɛ o, ŋamɛɖeka yi mɛ mi ɖo evidjidɔ mɛ o. ¹⁶ Ahosi ɖe biɔŋ ŋɖe yi ŋgbe kpɔa, alo ŋde dji le xo nɛ ahosi ɖe kpɔa? ¹⁷ Nye ɖeka ŋkannu ɖu kpɔa, yi nyɛ ŋde kan nɛ tsɔɛvi oa? ¹⁸ Ɖoŋtsia enyɛ nyi etɔ so kaka evidjidɔmɛ, yi ŋfiɔmɛ afɔɖoxoe so enɔnlɔ yo xodomɛ. ¹⁹ Nɛ ŋkpɔ djɔgbevɔn tɔ tsi ŋtsi awu ŋde le o, alo wamɛnɔn tsiŋtsi avɔ ŋde le o lɔ. ²⁰ Ɖe yo alimɛ ŋyraŋ, yi axi alɛnwo yi donɔn zo lanmɛ ni oa. ²¹ Nɛ ŋdo alɔ ɖaɖa ŋmɛ nɛ tsɔɛvi ɖoŋtsi wodɔn djinyɛ le hɔnnu lɔ. ²² Kexɔna abogba tɔnyɛ nɛ trɛn le abɔta nuŋ, yi abɔ tɔnyɛ nɛ tsun le yo tsatsaxoe. ²³ Nutsiŋtsi ŋwɔ nuyɛwo kpata ɖoa yi nyi ŋle vɔnvɔn nɛ Mawu yo todɔndɔn ɖo vɔnvɔn a lɔ, yi le Mawu yo gangannyinyi ŋtsi lɔ, nyɛŋdatɛnŋ awɔ nuvɔn yɛwo. ²⁴ Nyɛŋde dodji ɖo sika ŋtsi o, alo dodji ɖo sika tsi nyɔ nyuiɖea ŋtsi kpɔ. ²⁵ Nyɛŋde da ɖo nunɔnamɛsi tɔnyɛwo dji kpɔ, alo be ŋsɔ alɔ wɔ dɔ yikpɔ enu gbogboɖe o. ²⁶ Nyɛŋde subɔ ewoe kudo yo klɛnklɛn alo woetri kudo yo nyɔnnyɔn kpɔ o. ²⁷ Yi woflu edji tɔnyɛ le enugɔnmɛ, yi ŋdo lɔ ɖoɖa woagbɔ ɔ. ²⁸ Nɛ ŋwɔ enuyɛ yo ɖe lɔ, enyi nuvɔn ŋwɔ yi ŋdje nɛ hɔnnudrɔndrɔn, ɖeŋtsia ŋgbe nu le Mawu, djipotɔ lɔ gbɔ. ²⁹ Ɖe yi ŋkpɔ djidjɔ ɖo kɛntɔ tɔnyɛ yo gblegble ŋtsia, yi ŋtsi kpo etsimɛ nubaɖa djɔ ɖo djia. ³⁰ Wokpoa! Nyɛŋde wɔ nubaɖa, alo kenu dji ku ni kpɔ o. ³¹ Ɖe axixomɛtɔwo ŋbionɔnsé be: mɛŋde le tsi ŋde kpɔ enu ɖu kpɔ? ³² Amɛdjro ŋde dɔn xixenu le gbɔnnyɛ kpɔ o, ŋxɔnɔn mɔzɔntɔ ɖo axixomɛ gasiagamɛ. ³³ Nyɛŋde sɔnu tsɔn vodada tonyɛwo dji sigbe amɛgbetɔ nɛnɛ o, yi nyɛŋde wla axi nuvon ɖo djimɛ o. ³⁴ Ɖe yi ŋle amɛ gbogboɖowo vɔn, yi xomɛwo yo ŋkpɛn doamɛ le vɔnvɔn ɖowɔnu yiŋtsi ŋbɔnu tsi xɔmɛ nyɛŋde to. ³⁵ Oo amɛɖe nɛse axi nyɔn kuŋ djro! ŋxo nu xo vɔ! ŋsɛnwo kpata tɔ nɛ ɖoetsi nu aɖikatɔ tɔnyɛ tsan nɛ sɔ yitɔ va. ³⁶ Nyatexoe, nɛ esoe va lɔ, nadeɖo abɔta; naxatsaɛ ɖo ta sigbe efiɔ kuku nɛnɛ. ³⁷ Nato nuɖekpekpe tsi ŋwɔa lɔ ni. Nazɔn sigbe amɛgan nɛnɛ ayi egbɔ. ³⁸ Nɛ agble tɔnyɛ le axua dowɔ ɖo ta nuŋ, yi yo wo kpata le avi fanɔ nuŋ hoolɔ. ³⁹ Nɛ ŋɖu agbleamɛ yo nuku fɛnmatsu yi ŋna agbletɔ kulɔ. ⁴⁰ Kexɔna enu nɛmi ɖo mɔlu texoe, yi tekli nɛmi ɖo epo texoe.