¹ Jɔb gbe yidji yi nu be: ² Oo! Mɛŋde lasɔ gbeɖegbe yo ŋkekewo lasɔ afiɔŋ, sigbe gbetsigbe yi Mawu kpɔnɔn tanyɛ. ³ Le gatsimɛ yi yo kanligbin klɛnɔn le axin mɔn le vivitsi mɛ! ⁴ Nanyi gatsimɛ ŋle axin ɖekadjɛ mɛɔn, gatsimɛ yi Mawu kpɔnɔn djinyɛ sigbebe xɔnlɔn lɔ nɛnɛ le axin agbadɔ mɛ, ⁵ Gatsimɛ yi ŋsɛnwo katatɔ lɔ kpɔtɔle gbɔnyɛ, yi vinyɛwo trɔnɔn ɖoŋ; ⁶ Gatsimɛ yi axin afɔwo nɔnɔn nyinɔnsi mɛ, yi agakpe ɖɔlinɔn yo amiŋ kɔɖo djinyɛ so amitoa mɛ! ⁷ Nɛ ŋto benɛ mayi edua yo agbo mɔnu, yi ŋdjra azikpe ɖo sɔɖo dogbadji lɔ, ⁸ Ɖekadjɛviwo djonɔn nɛ ŋgbɔnɔn, yi amɛganxowo tsinɔn te yi djɔnɔn. ⁹ Efiɔviwo nɔnɔn te nuxo xoxowo yi wosɔnɔn alɔ tunɔn enu; ¹⁰ Efiɔwo ɖiɖinɔn egbe, yi wo aɖewo tɛnɔn. ¹¹ Eto tsinɛ ɖonɔn etoŋ lɔ, nunɔn be woyra wo, ŋkuvi tsinɛ kpɔnɔn lɔ ɖinɔn ɖase; ¹² Ɖo ŋxɔnɔn nɛ woamɛnɔn tsinɛ do axua, kudo tsɔɛvi tsinɛ xɔnamɛtɔ ɖe ŋde lesi o. ¹³ Amɛtsiwo yi kukugbe yranɔŋ; yi ŋdonɔn djidjɔ nɛ ahosi. ¹⁴ Djɔdjɔnyɛnyɛ yinyi axin awu tsinɛ ŋdonɔn, yi axin nudjɔdjɔɛwawa nyi awu lɔbɔ tsi ŋdonɔn kudo duku. ¹⁵ Nnyi ŋkuvi nɛ ŋkugbangbanɔn kudo afɔ nɛ matakli. ¹⁶ Nnyi etɔ nɛ woamɛnɔnwo, yi ŋkpɔnɔn amɛdjro yo nya gbɔ; ¹⁷ Ŋfɛnɔn aglan nɛ amɛmadjɔmadjɔ, yi ŋɖenɔn elan le numɛ nii. ¹⁸ Vɔ yinu be: Naku le axin atɔn mɛ, axin agbe ŋkekewo lasugbɔ sigbebe ekɔ tɔ nɛnɛ. ¹⁹ Esi laɖo axin kewo gɔmɛ, yi ahuŋ latsi alɔzuin nyɛwo dji le zandomɛ. ²⁰ Axin ŋtsikɔkɔɛ lakpɔtɔ lado ba viiŋ, yi tsaŋka tsinyɛ ŋda do exo le axin alɔmɛɔn. ²¹ Wolaɖo etoŋ, yi wolakpɔ axin sinu, wolabɔ enu le axin taxona mɛwoi mɛ. ²² nɛ ŋxo nuxo lɔ; amɛɖɛ ŋde gba nu nyɔ ɖe o, yi axin nyɔ lanɔn na amɛkpata sigbebe ahuŋdjadja nyui nɛnɛ. ²³ Wola do edji ɖo ŋtsinyɛ sigbebe edjidjadja nɛnɛ, wokenu daɖɛ baa sigbebe esi tutugban tɔ tsinɛ ladja le kele yo ŋgbododmɛ. ²⁴ Gatsimɛ yi wola gbɔdjɔ lɔ, na konu dowo, yi wo ŋda tɛnŋ na be axin ŋmɛ laɖo adan o. ²⁵ Ŋdjinɔn be mayi wogbɔ, benɛ manɔ wo ŋkɔ; ŋnɔn nɔwo sigbebe efiɔ tsile yo sɔdjawo dodomɛ nɛnɛ, sigbebe akɔnfatɔ nɛ koenyifantɔwo nɛnɛ.