¹ Texoe le nɛ ga tsi wokunii le, yi sika tsan ɖo texoe tsi woɖenii tole gbɔxoe djranii ɖo. ² Woɖenɔn gayibɔ le kɔ mɛ, yi gbɔxoe wolaɖo gadjin lɔ, wosrenii le kpeto mɛ. ³ Agbetɔ ɖo linxo nɛ vivitsiwo le anyigban gɔmɛ, wodjinɔn ekpe xɔasiwo le vivitsi tsiɖitsiɖiwo mɛ, kudo eku yo vɔnvɔnli mɛ. ⁴ Woɖenɔn vudowo le afitsi agbetɔwo ŋde le o; afitsi amɛɖekpe ŋde ɖinɔn esa le o, yi eguɖetɔwo kunɔn ɖo ekawo ŋtsi sɛkplɛ sɛkplɛ. ⁵ Anyigban tsinɛ mɛ akpɔnɔn tole lɔ, tsaka le yo xodomɛ sigbebe ezo yi ginɖo mɛ nɛnɛ. ⁶ Ekpe ŋitɔwo nyi Safirikpe, yi wokpɔnɔn sikawo lexɔn. ⁷ Ehɔn ŋde djesi emɔn xɔn dji o, yi akangan yo ŋkuvi ŋde kpɔɛ kpɔ; ⁸ Elanganlanganwo ŋde djesi o, Djanta ŋtɔtsan ŋde to xɔn kpɔɔ. ⁹ Agbetɔ sɔ yo alɔ ɖaɖo ekpe sɛnsɛnwo dji, yi yiwlonɔn kaka etowo gɔmɛ; ¹⁰ Eɖenɔn emɔnwo to ekpegbadjawo mɛ, yi wo ŋkuviwo kpɔnɔn enu xɔasiwo; ¹¹ Etunɔn emɔn nɛ tɔsasrawo be wo ŋgbe sra o, yi yiɖenɔn enuxawlawo sɔva kɛnklɛn mɛ. ¹² Vɔ nunya ɖe fiɖe yile? Fiŋde nugɔmɛsese yo nɔxoe le? ¹³ Agbetɔ ŋde nya yo asixɔxɔ o; ŋde le agbeagbeawo yo anyigban dji o. ¹⁴ Tsiexoe be: ŋde le gbɔnyɛ o; yi axu be: ŋde le gbɔnyɛ o. ¹⁵ Woŋde sɔnɔn sika adodoe sɔnanɔn ɖo yo texoe o, woŋde danɔn ega le sikeli dji asɔ xɔnɛ o; ¹⁶ Woŋde danɔn Ofiri yo sika asɔ xɔɛ o, alo Onix xɔ asi, kudo Safari asɔ xɔɛ o. ¹⁷ Woŋda sɔɛ sɔsɔ kudo sika alo apupui o, woŋda sɔ sika gban zɔnzrɔɛnwo asɔ ɖɔli o. ¹⁸ Korayi kudo Kristalo woŋde ɖi nuɖekpe le yo ŋkumɛ o: nunya xɔ asi wu djonuwo. ¹⁹ Etiopia yo topazi ŋde sɔ kudoe, yi sika kɔkɔɛ ŋda tɛnŋ nɔ sikeli dji kudoi o. ²⁰ Fiŋde nunya so? Fiŋde nugɔmɛsese yo xɔmɛ le? ²¹ Exla so agbagbeawo yo nkuviwo, exla do djipo xeviwo. ²² Tsiexoe kudo eku nunɔn be: mise wonu yo nyɔ. ²³ Mawu ye djesi yo mɔn, yi djesi yo xɔmɛ; ²⁴ Ɖo ekpɔnɔn kaka anyigban yo vɔvɔxoe, ekpɔnɔn nuɖekpekpe le ewoe gɔmɛ. ²⁵ Ena kpɛnkpɛmɛ nɛ aya, yi yida etɔwo kpata kpɔ. ²⁶ Gatsimɛ yiwɔ se nɛ edjidjadja, yi yita mɔn nɛ djikezo kudo djiɖegbe, ²⁷ Gaxoxo xɔmɛ yi yikpɔ nunya yi yikafui, eɖo nunya yo gɔmɛɖokpewo yi yidjoekpɔ. ²⁸ Yi yitonɛ agbetɔ be: kpɔ, Axoetɔ vɔnvɔn, yinyi nunyan; adjoɖa le nuvɔn gbɔ, yinyi nugɔmɛsese.