¹ ANERU ARENU BUKA AENA AVIE 1 Ege daki aneru hero te be eragi vava sena uguhi, oroḡanu, oriva ḡodomi mati kevaua omotoe ada, renu au vairane ra vani naḡate, renu au vase a iabera (ga vara) bubuke vene naḡate. ² Auka buka aena avie bera, au adehe baobare, renu au vasi vamaḡe ra eve rami, a au vasi vage ra vata. ³ Renu, to hakivi enoḡa ketake ḡore erara vaḡava Lion kanana vare naḡate, au to nei va du-du enoga iatiriḡava ḡadimanu. ⁴ Ege dudu iatiriḡava itaherae, di urae toretore, uduke daka enoḡa be vava ihi roma, va dudu abuḡu veite enoḡa va bakua, torei sa ḡare. ⁵ Renu aneru da eraḡi au vase rami eve, renu vata, au ada vamaḡe iagemi oti vava. ⁶ Renu gwauhamata behu-behu, unuhune va kinu otado bene uhuraehe, renu vata o kohua ruta, renu eve o kohua ia, era beta isusu kiki-vara. ⁷ Uduke vani era riaḡa ḡahi biti vaka enoḡa aneru abuḡu veite e iau sena, Dirava huni ḡare au toto ḡahi besu beve ia, peroveta ia kirogei rone, riaḡa ḡahiḡa vara. ⁸ Ege da enoḡa ihine ra vava sena ḡaitana daki-roma, “Oti buka aena baobare aneru adehe mi unuhu vase ne rami-rame eve renu vata.” ⁹ Ege daki oti aneru kiroma, buka aena avie da doima, auki da kiroma, “Mi bai; auka iditave ḡoi ai vaḡatanehe, uduke heiḡa te uamo ai avaḡehe. ¹⁰ Renu daki aneru adehe buka aena mi renu, i au heiḡe uamo di avaḡehe, uduke da ine itahe di vaḡatane iditave ra. ¹¹ Renu daka a kiroma, “Ama ḡaitana perovetai sa - koitaia, renu mei ḡaita-ḡaita iau, renu rohi iau.”