¹ Dirava horu aenave koitava yau meve, daka beta toretore vara. ² Ya gahara vare, Dakamu yai mageve dainehe yai ihe mi yagemanu Macedonia koitava yau. Dakamu kirogevenu Achaia koitava yabera tau emeneigera yauki, nega o dainehe bou ragohanu. Ya me miare gumava raki yau uhure mi yagemanu yau gainage me'e kisa. ³ Dakamu ogo nana besu gevenu Eige na yai meve gava ragohare ra beta avanage goisa, renu yakamu bou ragohanu nega o dainehe, da rone nagate. ⁴ Veite goiare, Macedonia koitava beya da ruta orogare renu ya behu gei yaka bouragohi ra veitera, noka variva ragohira vara-daka beta yai dainehe iaga be rorovara-yai mageve rone dainehe. ⁵ Eige daki anai ronu ogo nana yabera yai gasina orogisa renu guma be kisa urugoi yai ominue geregerehe. Auma ena vivive goisa era yai mageve ra, renu era beta iagabe no yai manu era. ⁶ Gavara one vivivera: Koita orena begibegi raho vima auka rahogahi mimivara, renu koita orena dibana au begibegi vare makavara auka maka mageva mati mimivara. ⁷ Koita ramu au uhurehe anavare boubouva maemisa, beta uhu berebe uhurahe se uhu anana be uhurahe, badivara Dirava ra uhu mage ruta boubou maemare koitavara auki au gahara vima. ⁸ Renu Dirava ra mage rahogahi a moimovara, eige, nega aubougi, iaga aubougi uhurahe, a gahara vare iaganiva aubougi geramu enu. Edainehe mageva aubougi gera adahe rahogahi ororovara. ⁹ Yau torevane nagate: " Aukamu au mageve idigei iaga veite koitava mohi gevenu. Au haire ra otitovara behibehi." ¹⁰ Unuhuna idi tahaka mi begibegi koitava moimima renu hauhaka demaka dainehe koita mohigeima renu idi demaka dadagahi a moimima begibegi dainehe. Auka ai haire rahogahiga vara. ¹¹ Aka mage mimivara guma aubougi uhurahe edainehe ai uhure ra magera. Enaki Dirava gasina boubou mageva mi otisa ni dainehe. ¹² Badivara onaki me maguri ora Dirava horu aenava koitave yau gahara ragohare noki mi oroga, adahegera me nunenune gainage vara ragoha, Dirava mage gahiga dainehe. ¹³ Badivara yaka tohotoho uhura sir i ragohanu renu yai meve riaga gahanu, eige yaka Dirava mage gahigavara yai ga ihihive dainehe au hari mageve uhurahe. Yaka Dirava tage mage gahigavara yai uhu mageve uhura ya boubou gosigeva yau renu koita aubougi tage. ¹⁴ Yakera yauki ya anageva renu yai ada imimi ragoha. Yau ena kiare makavara Dirava haire ra raho hereavera yai ada. ¹⁵ Magevara Dirava iera au haire dahida veite uhura!