¹ Nin uravera yaka dibana gahisa, ni ogo nanuheya, Dirava haire Macedonia dubu va mohigevene. ² Vagava ketake hereave uhurahe, yau hegirive, renu yau maguri ve isuke uhura gera yauki mage hegiri ruta yau meve kiege. ³ Daka yau kine dakamu eraganu, yauka mageve ra raho hereavera, renu e variada gera yauki maemanu, renu yau uhure aubougi ruta ⁴ nokera yauki no imigevenu yau uhure abougi Dirava aena koitatuhe ya yahe geige dainehe. ⁵ Auka enaki vara veitera, no anavane nagate, eduge urugoi gera yauki yau ahata make mi Rohi Bauge moimanu renu no mohi gevenu Dirava gahara vane uhurahe. ⁶ Eige noki Titus hero gahanu, auka subutagera auki meva kinu, yai tanahe hegiri varamu riaga goisa. ⁷ Eduge yama iaga aubougi uhura me misa-gabidadamava uhura, gava uhura, uhuvaka uhura, urugoi kisa, renu yai hegirive ni ada dainehe. Eige yama anai mage gahisa yaka hegiri varamu riaga goisa. ⁸ Beta ona kime daki roma yaka kisa eduge yai hegiri mageve yaka eragisa, koita beya meva kiki gahara ragohare nagate. ⁹ Badivara yaka Rohi Bauge Iesu Keriso haire dibanara. Augera iaga aubougi geramu enu, eduge yai dainehegera auki iagabe veite goinu, au iagabe veite goine dainehe yaka iagate gahanu. ¹⁰ Guma o uhurahege dana ya ga-ga geisa ya yahe geige dainehe. Tau be ramu otinu, beta enage yaki mebe kiki gaharava ragohanu, eduge yai uhurehe aubougi rutagera yaki kiki gaharava ragohanu. ¹¹ Eige yama ki kosaisa. Uhu mage herote uhura renu yaka ura riaga kisa eige, yanaso ki kosavare yai uhure aubougi. ¹² Yana yai uhure aubougi gena ya meva kisa roia, era magera renu dodihegera. Koita be iagate goiege auna varaisa, beta au iagabe veite goiege. ¹³ Badivara ora beta be mage gahigeige vara renu be yabera huhu uhura usa, eduge koita yau bougi mage kobabe uhura. ¹⁴ Yai mageve negubutu gera yau yagoare era yana mohigeisa. Dadivara yau mageve dadaga vara ya yagoare yauna mohigeisa, uhu kobuga uhurahe. ¹⁵ Era ona kime yauki torevenu: "Iaga dadagate koitava ihiegera iagabe veitera, renu iaga dadaga veite koitava ra ihie iagabe yagoya veitera." ¹⁶ Eduge No Dirava mage gaha, Titu's sorukehe da yai anavare daki maemanu. ¹⁷ Badivara auka beta ni imimive gauge auki anavanu, eduge au uhure aubougi tagera auki anavanu. Ai gasina gera auki oroganu au uhure aubougi ruta. ¹⁸ Nokamu e besuganu ni ogo nane be ruta, au meve mage dainehe gera noki moteagaha dubu aubougi uhurahe, au hari mage roiare dainehe. ¹⁹ Beta egu, eduge dubu yabeki manu auka no ruta ioaisa mage e uhurahe, era noki eragi mage gaha Rohi Bauge avahu au haire dainehe renu ni mageve dainehe. ²⁰ No ena kiare makavara noka besibe ragohime noki, koitabe ya negu no me mage miare o daureva rome. ²¹ Noka anai mage gahima noki meva kia, beta Rohi Bauge vairenehe gugera, eduge koita aubougi yau vairenehege tagera. ²² Nokamu e ni ogonane be tagera noki e besuga yau ruta. Nokamu eragi mage gahanu guma nunenune yau renu nokamu behuganu auka me mage koitava ra. Auka gahara riagavara auki vime badivara akera auki a motea gahima. ²³ Titus ra, di bamode ra renu me kobuga kiare koitavara ai dainehe. Eduge ni ogo nanuhe, yauka dubu gare roiare koitava yabera. Yauka Keriso haire ra. ²⁴ Edainehe yauma yai me mageva eragisa, renu dubu ramu dibana goisa no ya motea gahigevare makava.