¹ Aka daiera, badivara ni ominue yau danehe, No ni daureve inuhati ahata maka maguriva renu horu aena maguriva garegeva. No aena riagava maguri ragoha Dirava noma sigamisa. ² Ni gumage kiahe! Noka koita be namina veitera. Noka koita be daure gahiga veitera se au mageve mimi veitera. ³ Era beta aka daureva misa eige daki onaki roma. Badivara Dakamu subuta ronu aka ni soruke uhurahe gera, noka bada Hoge ragohisa renu bada maguri ragohisa. ⁴ Daka akera daki a riaga gahima, renu ai mageve gavara daki vima. Daka hegiri vime daki. Hegiri vara rahora hereavera dagedage ni huhuve aubougi uhura. ⁵ No Macedonia oroganu, no ahata make yabera hero veitera. Eduge, huhu uhurahegera noki uiege ahata makava renu no uhurehe sigoi ragohege. ⁶ Eduge Dirava, ihi veite koitava ya mage gahigevare raki no mage gahigevenu Titus orogane. ⁷ Beta au orogane dainehe gera eige Dirava raki no mage gahigevenu. Titus ai mageve mane nagate. Ai mageve auki ronu, ai uhudauve koita yau, renu ai haire di dainehe. Eige di hegiri veraki rahogoinu. ⁸ Di leta vena ai uhure huhu gahanu, daka e anana veitera. Eduge di uhure ra huhu nagina veitera eduge di letave veraki a huhu gahanu, nega tinakibe uhurahe. ⁹ Negubutu gera daka hegiri vime daki, beta a huhu nagane dainehe, eduge ai huhu veraki maguri isage mi ai oroganu. Aka dirava uhudau veraki a manu, eduge aka huhu nagina veitera ni dainehe. ¹⁰ Badivara Dirava uhudau vera maguri isage vara auki mi orogima uhu anana bera mati veitera. Eduge mata uhura uhudauvara, hogera auki mi orogima. ¹¹ Edainehe dirava uhudauvena otadobe magebena au mi orogima ai gasina. So uhure herovena orena kikivanu aka riaga vara ani roma. Ai uhure maguri vane orena kikivenu, a sigovare, a gahara vare iaganiva, ai uhure hegiri va, renu aka urai aena vara memisa! Iaga aubougi uhurahe yakamu yavahu yai uhurehe riaga gahanu. ¹² Dakamu yai leta torevanu, beta daure kine koitava dainehe, se daure dainehe huhu nagane koitava dainehe, eduge yai mageve ni gasina, era Dirava na yai mi orogisa. ¹³ Edainehe noka hero mimivara. Ni mageve uhura adahe, noka dagedage hegiri ragiravara Titu hegiri vare dainehe, badivara au horuvera yaki yai bougi isage gahi goiragohanu. ¹⁴ Badivara dana yai mageve na da kiroma, daka variva veitera. Iaga aubougi uhurahe, no iaga aubougi aki rone ra riaga vara, no yai mageve Titus kirone ramu riaga goinu. ¹⁵ Au ya era gevare ra raho hereavera yai ga ihihive dainehe, ya hegiri gahane ra sigo renu gabubu uhurahe gera. ¹⁶ Daka magurivima daki badivara daka yai uhu berebe ve dainehe.