¹ Da, Paul, daki a hero gahima, Keriso haire uhura renu au manage uhura. Daka hero veitera ai vairenehe, eduge daka hero tera da gamanahe uiare. ² Akera daki a imigima, a daruta goiege, daka beta uhu berebeki herote goigo vara, unuhuna ni meve daure gahi roma noka ahata maka uhurahe gera noki ogia, daka nami geigevara. ³ Nona ahata maka uhurahegena no ogia, noka gogai mi ororo veitera ahata makava. ⁴ Badivara no gogai kohuva yabera beta ahata maka gera. Eduge, yauka hedokatera daure iaga yagava ya sebo geigevara. Yauka ga avanage vara yauki mi oroga maka veite yabera. ⁵ Otado iaga beyabena Dirava uhuvake sebogisa roia, noka sebo geigevara. Uhu anana aubougi gera noki idigi ga ihihiva Keriso moima. ⁶ Renu noka bou ragohimena noki, noka ga ihihi veite mevaya sebogeisa, yai ga ihihive mage goiege. ⁷ Otadovanu e ai vairenehe regunaki eraga. Koita bena roma auka Keriso ruta gera, auma avahu au uhurehe dibana goisa, auna Keriso ienu, no gaina gera. ⁸ Eige dana ni hedoke gavana da tinabe ro raho gahima, era Rohi Bauge raki no mohigevene noka hero kisa renu beta ya sebogisa, daka variva veitera. ⁹ Auka beta onaki vara ra geregere va, daka yakera daki da late tore gevare yau yaka sigoragohisa. ¹⁰ Eige koita be yaberamu roia, "Au letave yabera isukatera renu hedokatera, eduge au ahata maka magurivera raburabera. Au gare yabera beta noka ihisa gava yabera." ¹¹ Enaki koita e yabera noma kirogeisa noka late e gava yabera, no veite gahege yaka beta ni meve eraravara a nokamu ei. ¹² Noka beta heroki novahu bouragohi se beya yavahu yau meve ga ragoha ragohare nagate yabera. Eduge yau yavahu bebe yau mageve eragare renu beruga bebe tohogare, yauka uhu anana mage veitera. ¹³ Eduge noka, beta no dibana gahane soisovara. Eduge, noka ni dabane uhurahe gena nona me misa Dirava no mohigevene geregerevahe, ya gainage ya idigeige vara. ¹⁴ Beta noka ni mevera noki ki hanegaha badivara noka ya idigeige veite dainehe. Eduge nokaki urugoi ya idigevenu hari mage uhura. ¹⁵ Be yau meve, no kiare nagate noka gava roro veitera. Eduge, no anavare ra yai gabidadamave raho goiare, ni meve yai tanahegera raho goigo vara, ¹⁶ Edainehe noka hari mage rorovara ya otito veite ogobe gainage, beta ogo be yau mebeya kine hariva ro raho gahigavara. ¹⁷ "Eduge hariva ro rahogahisa koitava, ro rahogahi Rohi Bauge dainehe." ¹⁸ Badivara beta hari ro rahogahisa koitavana mageva misa, eduge Rohi Bauge na koitava misa.