¹ Imimi vara daki vima uhuvaka veite uhura aka da anaisa. Eduge Akamu dagedage da anaima! ² Ai varivade daki vima. Daka dirava varivara daki ai vima, badivara di ominue ve aigera daka ata kobabe mobo gahisa. Di ominue vera daka ai ihehe gamika veite uhura Keriso rutagera. ³ Eduge daka enagera daki sigoime, inuhu Eve taragane nagate au avanage gumagehe, ai uhu anana mageva ra saise goisa renu Keriso riaga gahare ra veite goisa. ⁴ Badivara koita bena orogi Keriso nune be riaga gahima beta no riaga gahare Keriso va. Se ana sua nune bena a mage gahima beta a mage gahare suava. Se ana hari mage nune bena a riaga gahima beta a ihine hari mageva. Aka guma o au bougi gera aki eragi mage gahanu! ⁵ Badivara daka dibanara, daka beta yau kiare dibana veitera renu yau idigei-roiare apostle-bauge yabera. ⁶ Dana riaga ga dibana veitenu eduge daka uhuvaka daigera. Guma aubougi uhurahe renu iaga aubougi uhurahe nokamu a uhuvaka gahanu. ⁷ Dana daure bena da kinu di ga veite dainehe eige yauka ai ihe mi yagemisa? Daka enagera daki Dirava hari mage roma oti yai. ⁸ Dubu be yabera daki vaho gahigevenu yau seni hero manu ya yahe geige dainehe. ⁹ Da ya ruta uiege renu da gahara viege iaganiva ya, daka ya korahi gahi geige veitera. Badivara da gahara viege iaganiva yabera Macedonia ogo nanava yabeki da moimanu. Iaga aubougi uhurahe, daka ya korahi gahi geige veitera, daka dagedage enaki maguri otitovara. ¹⁰ Keriso riaga gahiga varamu o di gasina, motea motea ga o bera veite goigo vara Achaia ogo uhurahe. ¹¹ Otadobe dainehe? Badivara di mageve ra beta aigera? Dirava ra dibanara. ¹² Otadovana da kima, daka dagedage kikivara, eige dana mage orogare dodoisa, yau negu mage orogare mi yau motea motea iaganiva goime. ¹³ Badivara ena kiare koitava yabera avanage apostle yabera renu me daure gahava yabera. Avanage vage yauki yau mi Keriso apostle roia. ¹⁴ Renu era beta gauragira iaganivara, Satan tageramu avahu aumi abaga aneru va ronu. ¹⁵ Era beta dauragira iaganivara, au meve avanageva ki yau mi riaga koitava rogevenu. ¹⁶ Gaitana ge daki roma: Be negu rome daka uhuvaka veitera. Eduge a enaki roege, ama da mi uhuvaka veite koitava rosa eige dana motea tinabe visa. ¹⁷ Da enaki di uhure aubougi motea motea gava roiare-daka beta Rohi Bauge gavare gumagehege gera-daka uhuvaka veite koitava nagatera. ¹⁸ Edainehe koita mudago yabera motea motea gava yauki ragohare ahata makava, da tagera motea motea vivivara. ¹⁹ Eige yaka uhuvaka veite koita ya rutagera. Yaka uhu anana mageva koitava yabera! ²⁰ Ama uhu magete goisa koita be a daure gahege, ana au ga ihihi koitave goiege, ama au ruta goisa, au ai variada otege, au avahu au mageve roege, se auna ai vairene madavege. ²¹ Daka rorovara era ni varivadera badivara noka hero veitera enakiki va. Eduge koita bena hero tenu-daka uhuvaka veite koitava be nagate daki gavima-daka hero tera. ²² Yauna Hebrew koitava yabenu? Da tagera. Yauka Israelites yabenu? Da tagera.Yauna Abraham gamuhe yabenu? Da tagera. ²³ Yauna Keriso me koitatuhe yabenu? (Daka meta omo daure koitava be.) Daka: me berebere uhurahegera, vadibu yaga dadaga uhurahegera, daka huhu dadaga uhurahegera, daure raho dadaga uhurahegera. ²⁴ Jew yaugera daka nega adakasiva gera yauki da horivanu " Nega Utu ababu kobabe ra veite." ²⁵ Nega abiga ga gera hodihodi idivagera yauki da hodivanu. Nega kobabe muni da gamanu. Nega abiga ga eve euva daure manu. Vani renu vahibe eve ada huhu naganu. ²⁶ Dakamu ioava beya uhura otinu, tinavai vaiva huhu uhura, vaho gahava yau uhura sirivanu, di koitatuhe yabemu huhu da moimanu, Gentile yabemu huhu da moimanu, ogo bauge uhura huhu uhura sirivanu, mata ga-gaeva uhura huhu magenu, eve ada huhu magenu, avange ogo nana yau uhura sirivanu. ²⁷ Dakamu me isukate uhura renu dagedage huhu naganu, yagiya mage veite vahiva ya, gubu renu eia hoge uhura, demaka veite, ribiri renu bututa uhura. ²⁸ Eige aubougi uhura, vani aubougi di uhu korahive ra dubu yaugera. ²⁹ Unuhuna hero veite, dana hero veitenu? Unuhuna roma daka hero veitegoi ogigi daure visa, renu daka beta vene nagate ragiravara? ³⁰ Dana motea motea visa, daka di hero veite dainehe moteamotea vivivara. ³¹ Dirava renu Rohi Bauge Iesu Mame, mage behibehi miare ra dibanara, daka ata tarata vime daki! ³² Damascus gera, governor King derikahu Aretas ra Damascus ogo baugevara auki narivege, auka da kamui aena koitava yau da mi otisa. ³³ Eduge yauki botekava da udai haba vakava da mi uguhi, eige daki sivigoro manu Aretas ada uhura sirisi veite.