Buka Utube Abu.

1 Daka motea motea vivivara, dagedage auna maka veitenu. Eduge daka ihie orogare renu Rohi Bauge mi hakivare meva kikivara. 2 Daka atabe dibanara Keriso uhura tau utube ababu otine ihie-ahatamaka uhura genu se ahata maka itaharahe genu, daka dibana veitera, Dirava raki avahu dibana-auka va abiga-ga uhurahegera auki sirivanu. 3 Renu daka dibanara ata ora-ahata maka uhurahegenu, se iataharegenu, daka dibana veitera, Dirava ra dibanara- 4 Auka paradise uhurahegera renu ga maka veite yabera auki ihima. 5 Koita onavivi yaugera daka mote gahi geige vara. Eduge davahugera daka beta motea motea vivivara, eduge da hero veite eige dana motea visa. 6 Dana motea motea gahara vima, daka beta uhuvaka veite koita be nagatera, badivara daka ga riagava rorovara. Eduge motea motea va kosaisa, eige koita bera beta rorovara aukamu da kiare eragima se di gavare ihima. 7 Dana motea motea gahara vima badivara ga mage dadaga varaki rahogoima maguri behibehi dainehe, gati daure be ahata maka uhurahegera yauki da moimanu, Satan gamuhe be raki da huhu gahisa roma-eige daka beta davahu da hegiri gahisa. 8 Nega abiga-ga gera daki Rohi Bauge imiganu me o dainehe, auka di gasina kokivisa. 9 Eduge auki daki ronu, "Di haire ra ai geregere vera, badivara hero ra riaga vara hero veite uhurahe." Eige magevara da di hero veite motea motea va vima, eige Keriso hedoke ramu di gasina orogisa. 10 Edainehe daka herote goisa Keriso hero dainehe, huhu uhura, daure uhura, namina uhura renu uhu daure uhura. Eige da hero veite goiege, da hero tera. 11 Dakamu uhuvaka veite goinu! Akaki daki ronu daka onakisa, di anana vera aka da motea gahisa. Badivara daka beta yau nagatera yau mi rogeva apostle bauge ya, dagedage daka iagabe veite. 12 Apostle meva riagava yai tanahe ra uhu berebe ruta, ni gahiga nunenune ya renu gauragira uhura renu erara veite iaganiva uhura. 13 Otadebe dainehe gena ya ihi veite dubu aubougi yau uhurehe, eduge daka isuke be ya mohigeisa veite? Di daureve vagua gahigeiahe! 14 Eraga! daka nega abiga -gahigava yai gasina ororovara. Daka beta isuke be ya mohigeige badivara daka beta yai kohuva idigeisa rome daki. Daka yai gaharahe daki vima. Badivara momona yabera beta yau iahuve yaue kikivara. Eduge, iahu yabena momona yaue bougisa. 15 Daka hegiri ruta mohi mohivara renu yai horu dainehe mohi mimivara. Di hegirive yai rahogoige, Da mage gahigevene avie goigovanu? 16 Eduge one vivive dainehe, daka ya korahi gahigeige veitera. Eduge da anagevare ra dadaga dainehe, dakena yai vagava nune nuneve ya behugeisa. 17 Ai magevena dakena manu da koita be so besugane dainehe? 18 Titus daki hero gahima auka yai gasina otisa, ogo nana be berutagera gera daki e besugisa. Titus na yai mageve manu? Nona beta horu kobabe rutagena no oginu? Nona beta oginu vasi datage kobuga ei? 19 Yai ananavena orogi ate negu noka aigera noki hata ragoha? Yai ananavena Dirava vairenehe gena no Keriso gare ragoha, renu yai bouge yaka hero misa, daiuhe ya. 20 Sigoime daki da negu orogare dana negu ya behugei gevanu dana anavare nagate. Sigoime daki yaka mina beta negu ya anvare nagate da eraravara. Sigoime daki namina gava, mama gava, barakou ho uhura, bebe daure gahi geige veite maguri, daure gava ya, uhu muduka, bebe besibe gahigei, renu guragu mage veite. 21 Sigoime daki, da negu goiragi orogare, di Diravave ra di uhure mage gahigavara yai vairenehe. Sigoime daki, daka negu huhu naginavara, urugoi dadaga gahi daure kine koitava yau, yauka yau uhure isage gahigeige veitera renu ni muduka maguriva renu yau maguri haira veite kiare uhurahe.