¹ Nega abiga-gahigahiva, daki ai gasina orogima."Iaga au bouge varavare ra ava abu se ava abiga-geraki riaga gaha. ² Dakamu subuta daure kiege koitava kirogevenu renu renu aubougi gainage, da nega abu gahigava yau gasina otinei, renu gaitanage daki mati roma: Da gaitana oroge-ge, daka beta ena erageige vara. ³ Enakime daki roma badivara yaka da riaga gahiga veitera Keriso ra di maguri vehe uhurahe gera. Auka beta hero veitera oti yai. Eduge, auka hero hereavera yai magurive uhura. ⁴ Badivara auka huhu uhurahegera yauki gamanu, eduge aukamu magurivi goiraganu Dirava hedoke uhurahe. Badivara noka gainage hero veitera auruta, eduge noka auruta maguri ragohira vara Dirava hedoke dainehe. ⁵ Yavahu ya erageiyahe, yana gabidadama renu. Yavahu ya tohogei yahe. Yana yavahu regunaki ya erageige veitenu, Keriso Iesu ramu e yai uhura?--veite goiege, riaga, yakamu tohotoho ei dede ragohanu. ⁶ Anana vime daki yana so dibana gahare noka tohotoho ei dede ragohira veitera. ⁷ Eige noka Dirava gasina imimi ragohira vara, yaka beta daure be kisa. Beta da onaki roiare dainehe noka rosa, nokamu tohotoho uhura siri ragohira veitera. Eduge, imimi vima dakivima yaka guma mageva ogisa, eduge erara vagava ramu noka tohotoho ei dede ragohanu. ⁸ Badivara noka beta iagabe riaga uhura inai gahigavara, eduge riaga uhurahegu gena, nona kisa. ⁹ Badivara noka hegiri ragohira vara ni isukehe uhura renu yai herovehe. Imimi vara noki ragoha yaka yai maguri vera uhubage goisa. ¹⁰ Leta ora daki toreima daka beta ya ruta gera Badivara da ya ruta goiege, daka betaya ga berebe gahigei gevara, di hedoke uhura--Rohi Bauge da moimane daka ya hero gahigeisa, renu beta ya rabura gahi geisa. ¹¹ Basubasu va, di ogo nanuheya, hegiri ragohiahe! Maguri mage dainehe me kiege, uhu berebe kisa, uhu anana kobabe, mai uhura maguri ragohisa. Renu Dirava mageve renu mai veramu ya ruta goisa. ¹² Bebe eragei horu aena anoano ragohisa. Dirava horu aena koitatuhe aubougi ya mage gahigeisa. ¹³ Rohi Bauge Iesu Keriso haire, Dirava mageve, renu Horu Aena yai bouge ya ruta goisa.