¹ Edainehe, noki meva kia, no uhudau ragohare nagate, noka beta uhu isukate gahisa. ² Eduge, norena gumava ya renu variva gumava ya, nokamu garegevenu. Noka beta uhu daure gumava gera noki ogia, renu noka Dirava gare rokoro gahiga veitera, eduge ga riaga vara noki roia, noka koita yau bougi yau anana ragohare uhurehe gera noki ogia, Dirava vairenehe. ³ Eduge ni hari magevena yau bakuva, era bakuime yauki hoge koitava yau dainehe. ⁴ Yau ananavehe gera, mata dirava raki, yau uhu vadibuve vadibu gahanu. Edainehe, yauka beta hari mage abagava erara vara Keriso haire uhurahe, auka Dirava erara vagera. ⁵ Eige noka beta novahu ni mageve rorovara, eduge Keriso Iesu rorovara auka Rohi Bauge vara, renu noka ga ihihi gahava ya Keriso dainehe. ⁶ Badivara Dirava ramu ronu, "Vadibu uhurahegena abagavanu hakivisa." Auka ni uhure abagavara, uhuvaka abagavara no mohigeisa era Dirava haire ra Keriso uhurehe. ⁷ Eduge nokamu hodu uhura maka mageva nagatera, ena riaga gahisa hedo aubougi baugevara Dirava iera renu beta noiera. ⁸ Daure vara ni gasina ororovara guma nunenune yau, eduge beta no daure rahovara. Noka isukeve mimivara eduge ni uhure ramu bera beta goisa. ⁹ Aena uhura no gosige-ge vara eduge beta no gare geige vara; gahi geige vara eduge beta no sebogeige vara; ¹⁰ vani aubougi ni ahata make uhura Iesu hogeve mi ioa ragohisa, eige Iesu maguri mageve tage yauka eraravara ni ahata maka maguriva uhura. ¹¹ Edainehe no maguri gahava yabera ni hogeve rorovara Iesu dainehe, eige Iesu magurivera ni ahata maka maguriva gena yauna eragisa. ¹² Eige hoge mevaramu ni uhura, eduge maguri varamu enu yai uhura. ¹³ Eduge nana horu kobuga era yau torevane nagate: "Dakamu riaga gahanu, eige daki ronu." No gainage riaga gahanu, eige noki ronu, ¹⁴ eige noka dibanara Iesu Keriso maguri gahi goiragane aukenu no gainage ya ruta au vairenehe no idigei orogisa. ¹⁵ Iaga aubougi gera aiera, edainehe hairadivara koita mudago idi geigevara mage mohimo vara raho goigo vara Dirava haire uhurahe. ¹⁶ Eige noka beta uhu huhu ragohivara. nona ahata maka maguriva gena no dede ragohi ota, horu maguriva gera noka vani aubougi gera noki isagegaha. ¹⁷ Eige negu nega o uhurahe gera, isuke tinakibe raki ni uhure isuke gahima era mage variada gera. ¹⁸ Badivara noka beta era gevare iaganiva yabera noki erageva, eduge erara veite iaganiva yabera noki erageva. No era gevare iaganiva yabera negubutu iaganiva yabera noki erageva, eduge erara veite iaganiva yabera behibehi iaganiva yabera.