¹ Nona gaitana gena no novahu ni mageve roia? Noka beta ya riaga gahigeige letava yai torei otitovara se yaiseni orogisa noi, Koita beya kiare nagate, nona Ana kikivanu? ² Yakena no riaga gahigeisa, yaka ni sorukehe gera, koita yabera dibanara renu yaukamu dahanu. ³ Akiare ra aka Keriso letavera, no meve uhurahe. Beta peniva gera yauki torevanu eduge maguri Dirava horuve uhurahe gera. Se beta muni adagera yauki torevanu, eduge koita yau sorukehe gera. ⁴ Eige era ni uhu berebe vera Keriso Dirava uhura. ⁵ Ni uhure ra beta berebere ra noka rosa iaga era noigera auki orogima. Eduge, no uhu bera beta ra Dirava gasina gera auki orogima. ⁶ Dirava raki no hero gahigevenu asana isage uhura. Aena beta letava torevane era eduge Horu Aena va. Badivara mata ra daure ra, eduge Horu Aena varaki maguri mi orogima. ⁷ Hoge meva-ihiva ya muni ada tore gevenu-hegiriva uhurahegera Israel gamuhe yabera beta riagahe Mose one erara vara. Au nie hairadiva dainehe gera, haira era kosaime auki otima. ⁸ Horu aena hegiri vena negu bina orenaki goigo vanu? ⁹ Daure meva na hairaitenu, maguri riaga hegirivena negu bina orena vivive goigo vanu! ¹⁰ Edainehe, subuta hegiri vara beta negubutu hegiri va nagatera, hegiri ora mati raho hereavera. ¹¹ Hogera hegiritenu, maguri behibehi hegiriva bina raho hereavera! ¹² Mage orogare dainehe, noka herotera. ¹³ Noka beta Moses nagatera, au nie auki bakuvanu Israel gamikava yabera beta hegiri kosavare eragisa au hegeve dainehe. ¹⁴ Eduge yau uhure yaberamu berebe gahanu. Orogi negu, yau aena buka dahare negahe, ni bakuba ogonava dagedage enu. Bera kokiko veitera orogi vani oi, badivara Keriso uhurahe gena yauna kokivisa. ¹⁵ Dagedage orogi negu tagera yau Moses bukave dahare, ogona eramu yau soruke bakuima. ¹⁶ Eduge koita be Rohi Bauge gahara viege, ogona era kokivime yauki. ¹⁷ Rohi Bauge ra Horu aenavara. Orehe gena Rohi Bauge Horuve uma, magera eigera. ¹⁸ Eige ni bouge, ogonavara ni nie bakuba veitera, Rohi Bauge haire eragiahe. Noka ni bouge haira koboga e uhurahegera, haira gumabei oti mati gumabei, Rohi Bauge nagate, auka Horu Aena vara.