¹ Iesu elarageo gai apunai, gevanagio wava avanai pe Iesu gena alu kapunai eve kwarao. ² Raonai, uma na kaukau auna apuna gerao agiao gepa unai gevamaoao. Eiarao geria amonagi, Iesu na evailarao e kaukau auna, "Nauku, ono nama e verele. Gemu galama (rava) pege veilagiwai." ³ Raonai, aloalo auri vairi mauri geve vailawai, "Eau era no iwavagina veaina." ⁴ Iesu na eriparao ila uamagiri pe eva ilaiwarao, "Ragauna mui gouamagi veleka velekani thaomuiai? ⁵ Pa ari apuna pika pikanavagi, pe igo ilaiwa, 'Gemui galama wara pege veilagiwai, o igo ilaiwa, 'Rua lai e roa'? ⁶ Namu era mui mapigo ripa era e Amana Nauna magena iavu ealimaparai pene ilagiwairi galama, ... " Iesu na evailao kaukau auna, "Rua lai, ono toulaia gemu gepa, e ono roa gemu numai." ⁷ Thaonai e au elaio eroa gena numai. ⁸ Wanai uma kamuvagina geiao egau, ila wa gekalileao pe Palau Velegaua geva namarao, ia na eve veniagiao eiavu veaina uma elerai. ⁹ Pe Iesu roe vanagiwai wa- nana thaonai, ia na eiarao au apuna wara rarana Matthew ealuo tax ekokoawai ava nai (tent). Iesu na eva ilarao ia, "Mulikuai ono veamai," Ia elaio pe mulinai eroao. ¹⁰ Iesu ealualio pene ganigani numai, thaonai, tax gekokowai umari e magalama auri gerao e geganiganikouo Iesu e gena vevaripa auria ila. ¹¹ Wanai Pharisees umarana ila geganiganikou geiarao, waila nara gevailari vevaripa auri, "Ragau nara gemi vevaripa auna kamuna na e tax koko e nagalama umari pe ganiganikou agiria?" ¹² Pe Iesu na eamonagiri waila, ia na evailarao, "Aunilimalima riari auniparari mailigari ilana nakula evanamarana auna noai geavuani, namu riairia valu manakula rana. ¹³ Mui wa pogororao pe igoveripa egau ganina ragau: 'Thau wara aririwani venuavi namu nori voiku aririwani.' Repana thau paveami wa nori rakwarakwa umari ana gogori ila igeveilagirai, namu galama umari ularana." ¹⁴ Thaonai John gena uma elenai geve amio pe geilaiwao, "Ragau nara thai e Pharisees umari gaganiwakania mogo, namu goi gemu uma noai geganiwakani?" ¹⁵ Iesu na evailarao, "Vegarawai uma pege rao ila mapegere aluagiagi o venuavi pene vegarawa auna ila elerai roaunawara thaonai? Namu garo wara rogeveamainia evegarawa auna pene gapivagia ila thaor- ana, pe mulinai ila pige ganiwaka. ¹⁶ Au apua na rapua valivuna ia ana pe-ene oleau roagi vanagi rapuana kuine- nai, repana peve uliwai avana na mapene rale, pe wanana ene rale kamukamuvagi. ¹⁷ Maveina uma na mulamula valivuna mageoleni gena porapora kuinenai. Pene ilana geoleani, wa opina ene rale avalua, pe mulamula ene kewa, porapora maene kirakira. Namu, ila na mulamula (wine) ige olea porapora valivunai, pe egau pige mia namanama." ¹⁸ Rogo Iesu nara ila egau roriria eva ilarawai, thaonai, ulavunu auna apuna erao pe Iesu elenai ia repana eve olerivo ao. Eau eilaiwao, "Thau nauku vavinena evanamo pewarega, namu onorao pe goi imamuna auniparana ono venapara pe ene mauli." ¹⁹ Pe Iesu eroao ia mulinai, e Iesu gena vevaripa auria mage roao. ²⁰ Maeia, vavine apuna auniparana lala egapiawai rigolo twelve pe Iesu mulina na evavine erao pe Iesu gena rapua kagenai enapao. ²¹ Namu ia geregana eilaiwao, "Ipo thauna Iesu gena rapua pana napara, thau geku vivi pene vanamara." ²² Namu Iesu emakeo pe eiao evavine, pe evailarao, "Nauku vavinena (daughter), ono uamagi iliga; gemu veva auna auna na goi peva namamu." Pe evavine eveainai gena vivi enamao waoranai. ²³ Mulinai Iesu erao raki erogowai auna gena numa raonai, ia na turai gelavurawai auri eirao e uma vogovagi galavu iakamu gealawai. ²⁴ Iesu eilaiwao, "Igo roapau, repana na iao nori pewarega, namu ia na emauo." Namu ila na Iesu gemamai agiao e gevegalaiga agiawai. ²⁵ Wanai uma maparari geva roarairao, Iesu eroaoao ovua raonai pe e iao imanai ia na erogorao, pe e iao elaio. ²⁶ Egau ewalao rorina umana geilagi lovolovoa wa kapu maparanai. ²⁷ Wanana Iesu wa kapu na evanagiwai raonai, apuapu auri lualua geroagiuo Iesu mulinai. Ila wa gegogowai e geilaiwawai, "Ono nuavimai thai, David Nauna!" ²⁸ Wanai Iesu eve roawaioa wa numai, eapuapu auri gerao Iesu elenai. Iesu na ila evailarao, "Mui gove va auna aunani wara thau na pana alaripa?" Ila na Iesu gevailao, "Unamu, Velegaua." ²⁹ Wanai Iesu na eau maria enapari pe evailarao, "E vevanama pene ulavunu mui elemuiai gemui veva auna auna mogo veainai, " ³⁰ pe eau maria geve keo ole. Wanai Iesu nara ila erovarao pe evailarao, "Igo iara egau pewala wara uma apuana pe-ene ripa." ³¹ Namu eau lualua geroa pe erori ilana geve ilagi lovolovoa wa kapu makaina thaonai. ³² Pe eau lualua gegapio wageraowai, raonai, au apuna ia wara neroriwai repana avuavu ravaravana ia thaonai pe eau Iesu elenai gevairaoao. ³³ Wanai wa avuavu Iesu iavuna nara egiuraiao, eau neroriwai auna erori. Wa uma maparana wara wanai gekalileao pe geilaiwao, "Egau veaina noai geiaravagi kunenai Israel thaonai!" ³⁴ Namu wa Pharisees negeiwai, "Na avuavu ravaravari geria velena, ia iavuna nara pegiurairi." ³⁵ Iesu wa eroa laiwalaiwa kapu (cities) mapararai e vanua mapararai. Ia vanagi vanagi eve varipawai geria rupu thaorai, eve wapawai veavagi rorina kupavanuana pe vivi o nakula uveri irauirau umari geria vivi eva namarawai. ³⁶ Wanai Iesu na uma kamuvagi eiarao, ia eve nuaviole ila elerai, repana ila wa thaori gevivio e noai geririwao. Ila wara mamoe veairi noai au vairia. ³⁷ Iesu na evailarao gena vevaripa auri, "Wavulu wavulu wa iakamu, namu ige avi avi auri viraviravagi. ³⁸ Gaurai igo aoali lele aviavi auna kamuna Palau Velegaua elenai, pe wana nara ia na aviavi auri pene uraoria ia gena wavulu wavulu ( aviavi) kapunai."