¹ Iesu na egogorao gena vevaripa auri twelve mapararia pe ila evenirao iavu wa avuavu ravaravari, pige giurairi, pe uma pige vanamari vivi irauirauri maparari e nakula uveri irauirauri maparari. ² Waorai Iesu gena vevaripa auri wara rarari era. Mamana, Simon (eia mararana apua egogoao Peter), pe Andrew wara eia wala avana; James wa Zebedee nauna, pe John wa eia wala avana; ³ Philip, e Bartholomew; Thomas, e Matthew wa tax koko auna; James wa Alphaeus nauna, e Thaddaeus; ⁴ Simon wa zealot, e Judas Iscariot, ia na Iesu pene lewawaia. ⁵ Eila auri twelve Iesu na eurairao. Ia na rova evenirao pe evailarao, "Mui pigono rao ari kapuai Gentiles (nori Jews) gealuni, pe mapigono roaoa ari kapu (town) ai wa Samaritans gealuni kapurai. ⁶ Namu pigorao wara mamoe gelewalewa numari wa Israel mo raonai; ⁷ pe mui goraoni raonai, pigo varipari e pigo ilaiwa, 'Kupa vanuana gena veamai peve avivagi.' ⁸ Pigo vanamari nakula umari, pigo vamauli wairi warega umari, aunipararai opirai viviria (lepers) pigo ralevari, avuavu ravaravari uma thaorai pigo giurairi. Eiavu mui na pogo rawalia noai voina, eulavunu pigo alara noai voimui. ⁹ Gemui pora porai gold, silver, o copper apua pigono toua. ¹⁰ Gemui kou (bag) pigono touri e wariwari (journey) thaonai, rapua mapua, gagemuai pono ligoa apua po-ono toua, o pene vavamu auna apua mapo-ono vaia, orinara voina maeve avuani ganigani ai. ¹¹ Ari kapu (city) o vanua raorai go roa oani, pigo verenagi riau maganina auna pigo rawalia, pe elenai pigo alu penerao mui wakapu pigo kaliwania. ¹² Goroa oani numari raorai, pigo vanamari. ¹³ Pene wanuma ia maiaiana, mui gemi maino pigo vawalara numai. Namu pene wanuma nori veaina, gemi maino pigo vailavu ulea elemuiai. ¹⁴ Pene wa uma riairana noai gevaioa muinia o noai geamonagi rana mui gemi rori, wanai mui na wa numa pa wa kapu pigo kaliwania, kapumui kakavuri (alima) pigo alavagiri. ¹⁵ Auna auna thau na mui availamuini, veairori (judgement) garonai ekapu (city) rava iakamuvagi pene kwara no Sodom e Gomorrah geria kapuai wa rava ekwara veaina namu erava wara ravavagi. ¹⁶ "Igo iara, thau na auraimuio mamoe veairi olopu wagari (wolves) thaorai, pe pigo veole no ma (serpents) e pune manu veaina ne galamania. ¹⁷ Pigo veiama aunilimalima elerai! Ila na pige gapimui veiama auri (councils) elerai pige veole mui, pe ila na pige whip mui geria airupu numarai. ¹⁸ Wanai mui pige vevarua alimui governors e kings vilarai repana thau pakukuai, e wa vailia pemagai ila elerai e mulimuli umari elerai. ¹⁹ Wanai ilana mui pige vevarua alimui, pigono kali o avoavo mui na ragau igo ila- gia, pe ragau igo ilagia wara ene venimui waoranai. ²⁰ Pe wa nori maumui igo rori, namu e wara mui Amamui Iavuna na ene rori mui raomuiai. ²¹ Maluane apuana warega ene vawala walawalana maluane na elenai, e ama mai apua na nauna elenai. Melo maina igelai ama e ina ige varao viviri thaorana warega ige rawalia. ²² Mui wara ige kukumui uma mapara rana repana thau raraku pakunai. Pene riai ene ruakikilagi penerao ikanai, eia wara pene vamaulia. ²³ Pene ila na pige vagimui e kapuai, pigo ulerai ma kapuarai, repana auna auna thau na mui availamuini, mui wara go-oro roa vanagi kune Israel vanuri raorana namu Amana Nauna rogo ere veamaio. ²⁴ "Ia (disciple) apua na pe-ene iwa ia gena vevaripa auna (teacher), e vealaveni auna na maina pe-ene iwa ia eiamarania aunakamuna (master). ²⁵ Eveaina wara kapunai pe ia (disciple) olemana wara ia evaripani auna (teacher) veaina pere mia, e vealaveni auna e veiama auna veaina maina. Pene ila na enuma auna kamu na gegogoao Beelzebul, rava arikamu euma rararia ila na gegogorana e enuma auria! ²⁶ Gaurai pigono kali ila elerai, repana gauapua poroporoai nori pe-ene vemagai, e noai gauapua emalani wa pige-ene ripa. ²⁷ Ragau rau nara availamuinia muna raonai, pana ilagia garo malaganiraonai, ragau mui na pigo amonagia egamui na, pige verorirairia numakiniri urana. ²⁸ Pigono ule ila riairana auniparamui pigevagi waregari, namu ila na goi kuto- umu pigene vagi waregara. Namu, venua rage penerao wara ia mogo elenai riai nara aunipara e kutou pene vagala rageria alova vanuanai. ²⁹ Wa nori veaina mai manu lualua gevoiagiri penepene kirikiri nara? Raonai apuna ila raorai pene eoali alimai pe mui Amamui mape-ene ripara. ³⁰ Namu veaine wara repamui ai vui maparari mae eorurao. ³¹ Po-ono kali. Goi wara iakamuvagi nori na manu vogo- vagi veairi. ³² Gaurai umamakairi riairi pige rorirai kune thau elekuai namu nori aunilimalima elerai, thau maina mapana rorirai Amaku vilanai Ia wa kupa vanuanai. ³³ Namu riai na rau pene lewaku uma vilarai, rau na maina mapana ilagirairi rau noriripaku ila rau Amaku kupa vanuanai vilanai. ³⁴ "Pono uamagi wara thau nara maino amirivo agiao e alimaparai. Thau nori av- eamio no maino amigapimaiao, namu pau (sword) apuna. ³⁵ Namu thau aveamio no melo na amana pene vevagi venia, e ina nauna vavinena na pene vevagi venia, e agama vavine (daugther-in-law) na gena agama vavinena (mother-in-law) na pene vevagivenia. ³⁶ E au apua pige veali venia auri wara gena numa aurana. ³⁷ E riai gena ulamagi amana e inana elerai ekamuni namu nori rau elekuai ia wara noai ganina rau elekuai; e riai gena ulamagi ekamuni nauna maluanena e vavinena elerai namu nori rau elekuai ia wara noai ganina rau elekuai. ³⁸ E riai gena satauro (cross) ne toulaiani e ia ne roani rau mulikuai ia wara noai ganina rau elekuai. ³⁹ E riai geregana emaulinia ia wara pene rapu. Namu riai mo gena mauli eoleani rau pakukuai ia mauli pene vaia. ⁴⁰ E riai na goi evaioamuni ia nara rau mae vaioakuni, pe riai na rau evaioakuni ia na maina evaioani eia riai na rau emi urivokuo. ⁴¹ E riai na peroveta auna evaioani repana ia wara peroveta auna ia voina pene rawalia wara peroveta auna voina, pe riai na rakwarakwa auna evaioa- ni repana ia wara rakwarakwa auna gaurai ia voina pene rawalia rakwarakwa auna voina. ⁴² Riau veaina nara emelo kimukimuri apua elenai ipo nalu milu eveniani eniuani repana ia wara vevaripa auna (disciple), auna auna rau na mui availamuini, ia wara lewana olema ariveaina ia voina wa pene rawalia."