¹ Waoranai Iesu eroa vanagi uilakapu urana garomaveanai (Sabbath day). Gena vevaripa auri erakari pe egealaiwao koni vuaria e gauvua gewamari pe geganiri. ² Namu waveaina Pharisees na geiarao, ila nara gevailarao Iesu, "Ono iara, gemu vevaripa aurana eveaina pegeala wara rova kamuvagi egaromaveanai pewala." ³ Namu Iesu na evailari ila, "Mui na noai go-orua David nara ragau ealara ia eraka raonai, e wanai riairi auria wara ia epinai? ⁴ Ia eve roaoa Palau Velegaua gena numa raonai e parawa (bread) emia vegao gauna ia na egania, eia wa marova ia na pene gania e maina marovana wa ila na pige gania e parawa, namu e parawa wara rupu auri (priests) kakamuri geria. ⁵ Mui na noai go-oru rawalia rova geve alo wara veagaronai rupu auri kakamuri airupuali numanai ila noai geveani namu ila wara noai galamari? ⁶ Namu rau na availamuini wa ia iakamuvagi nori e rupu numa na era enai. ⁷ Ere mui na goro riparao egau ganina, 'Rau aririwani venuavi namu nori vivi,' mui na nori goro vara avarao noai galamana. ⁸ Repana ia Amana Nauna ia Velegaua e ia gena Veagarona (Sabbath)." ⁹ Pe Iesu eroao wananara eve roa oao geria airupuali numana raonai. ¹⁰ Iesu eairaole, wanai au apuna imana mavi eiao. Pharisees na gerenagiao Iesu, negeiwao, "E marovana evivi goina pono vanamara egaro maveanai?" pe wa ila na Iesu pige airoria erova raonai ia wa pene galama. ¹¹ Iesu na ila evailarao, "Pere au apuna mui raomuiai aunanara, pe gena mamoe apunamo, pe emamoe lega iaropuai pere ouale garomaveana (Sabbath) garonai, mapegere touragea lega raona nara? ¹² Pa arigau apuna iakamuvagi, pe, eau o pa emamoe! Gaurai rovai gau nanamari pealari garomaveanai." ¹³ Pe Iesu na evailarao eau imanai wavi emia auna, "Ono ole rakwaraia imamu." Ia imana eole rakwaraiao enamao, maimana apua namana veaina. ¹⁴ Namu wanana e Pharisees geroaraio pe ila na Iesu pige airoria. Ila wara rarapara geavuawai Iesu ariveaina pige uaua pene waregai. ¹⁵ Raonai Iesu wa olema eriparao, ia wananara eroarai. Uma iavogo geroao ia mulinai, pe geria vi evanamarao makairi. ¹⁶ Ia na rova evenirao ia rorina pigene vaemea mavairi elerai, ¹⁷ pe e mapene wala auna auna, ragau eve ilagio Isaiah ia peroveta auna raona nara, eilaiwania, ¹⁸ "Ono iara, geku vealaveni auna rau na agapiao; geku veulamagi apuna, ia rao- nai rau palauku evereleo. Rau Palauku ana oleau ia ranai, raonai ia na rova pene ilagi lovolovoa riai mulimuliai (Gentiles) gemaulini umari elerai. ¹⁹ Ia pe-ene walowalo emaina pe-ene agi gogo; mai au apua na mapene amonagia wa raraparai. ²⁰ Ia na nori pene ala oruri pige rava; ia na nori pene ala puea ari mu kovuna, penerao ia na pene kuneagi rova pene vemia iwavagi, ²¹ pe ia raranai e muli- muli auri (Gentiles) nama mapige rawali ripara." ²² Pe au apuna wara ia apuapu e ne amonagiwai ne roriwai, avuavu iarava ia raonai, gerao agiao Iesu elenai. Iesu nara eva namarao eau erorio e eve iao. ²³ Wa uma maparana wara geavoavo e negeiwao, "Pe eau e wara David Nauna?" ²⁴ Namu wa Pharisees geamonagio Iesu nara vivi evanamarao, ila geilaiwao, "E au na eavuavu nori ia na egiu rakwarai- rana namu na Beelzebul na, ia wa avuavu makairi geria aukamunavagi." ²⁵ Namu Iesu na eriparao geria uamagi pe ila evailarao, "Evanua (kingdom) makai- ria mavari pige veware ila wara pene vara avaria, pe ekapu (city) o numa makairi pege veware mavari ila pigene rua. ²⁶ Pene Satan na pene giuraia Satan, ia wa peve ware ia mauna. Raveaina wara ia gena vanua (kingdom) pene rua? ²⁷ Pe pene rau na avuavu pana giu rakwarai ria eia Beelzebul raona na, pe riai na naumui maluane rana pige giurai ria? Pe eve aina pakunai ila wara muigemi veva kota auri. ²⁸ Namu pene rau na pana giurai ria e avuavu e Palau Velegaua iavuna raona na, pe Palau Velegaua gena vanua (kingdom) peve amai mui raomuiai. ²⁹ Raveaina au apua pene roawaioa au iligailiga gena numai pe gena kou pene lemari pene e au iligailiga ne walowaloa kunea? Raonai ia na gena kou numa raonai pene lemari. ³⁰ E apuna riai rau elekuai noaiau wara rau eveali venikuni, e au apuna riai na rau ne koukou agikunia ia pene lewalewa. ³¹ Gaurai rau availamuini, rava, galama e Palau Velegaua geva ravani umari wara aunilimalima na pige vanamari, namu riau nara Vea Palauna (Spirit) pene vealivenia umari geria galama pe-ene vanamaria. ³² Ari au veaina na vevarava rirori apua pene ilagiria Amana Nauna elenai, ila wa geria galamari pene ilagiwairi. Namu riai na pene ilagi rakwaoara Vea Palauna, ia wara galamana pe-ene ilagiwairi, e alima- parai, emaina kupa basileia vanuana rogo pene veamai. ³³ Pono alara gaupu ia nama e vuana ia nama, pono alara gaupu ia rava e vuana ia rava, repana gaupu wara vuana nara eva maga-aiani. ³⁴ Mui kalakalamui wara ma o wago (vipers), pene mui wa ravarava aumui, raveaina mui na pigo rori ria gau nanamari? Pe raona na gau mapararia ia kutounai ia muruna erorinia. ³⁵ E au ia- nama pe rina nanamari ia kutouna na eva walarana ragau ianama, pe ravarava auna ia ravarava gauria ia kutounai gemiao ia raona na geroarai wara ragau ia ravarava. ³⁶ Rau arorini elemuiai wara veairori garonai aunilimalima pige veilagirai mauli rai rori makairi noai gani rori gerori ria ila na pige veilagi. ³⁷ Pe gemu rori veainai goi pene veairorimu, e gemu rori veainai goi pene umu vivi kapunai. ³⁸ Wanai aloalo auri vairia e Pharisees nara Iesu geva ilalavu uleao pe negeiwao, "Vevaripa auna (Teacher), rai gaririwani igaiara vailia (sign) apua goi elemunara." ³⁹ Namu Iesu erori lavu uleo pe ila eva- ilarao, "Rava auna e maporaga o vewapa lema kalakalana eririwani vailia apuara. Namu nori vailia apua pene veniria ila namu ra vailia ewala Jonah peroveta auna elenai. ⁴⁰ Pe wa Jonah garo oioi e pogi oioi magani inagena raonai emia, pe wa Amana Nauna (Iesu) garo oioi e pogi oioi emao agiao alimaparai mulinai emauliwai. ⁴¹ E Nineveh auri ige verurage veairori avanai (judgment) wa ulu aunilimalimari maina pene uri rava kapuai. Repana ila geve roriraio geria galama na Jonah ewa-apawai (preaching) raonai, pe igo iara, au apuna e iwavagina iakamuni nori Jonah veaina ia auna era enai. ⁴² E Queen wara South na pene rua lai wa veairori kapuna na wa ulu auria ila pene airori ria pene ole ria rava kapunai. E vavine kamunavagi e peve ami kapuna wara alimapara ikaikana na ia na Solomon gena raoneka ene amonagiri, pe igo iara, eia wara iakamuvagi nori Solomon veaina ia auna era ekapuai. ⁴³ Wanai avuavu apuna ravaravana eroa rakwarai au apuna raona na, pe ia evanagirao ava noai naluri kapurana, pe pikapika avari eavuwai, namu ne rawalia. ⁴⁴ Pe neinia, 'Rau ana lavu ulewai geku numai pave amai avana na.' Pami lavu ule, ia peripa wara numa raona peve raleva e raona peve oleveni. ⁴⁵ Pe ia perao peve vairi avuavu aula oioi e apuna pe ila wara ravaravari gauri, pe ila pege roaoa igealu wa numai. Pe e olema ikanavagi wara eau pemi ravaravavagi nori waia reparepa veaina. E wara no waveaina maina e wara ravarava ulu na." ⁴⁶ Wanai Iesu nara uma kamuvagi roe rori venirawai, raonai, Iesu inana e walaw- ala geruao gaukerunai, geria ririwa Iesu pige rori venia. ⁴⁷ Uma apuna na Iesu evailarao, "Ono airao, goi inamu e goi au avamu geruao gaukerunai, geririwani ige rori venimu." ⁴⁸ Namu Iesu na peva ilalavu ulea wa au na ia warori peva ilara auna, "Riai rau inaku e riairi rau walawalaku?" ⁴⁹ Pe ia imana eruirao rao ia gena vevaripa auri elerai pe neiwao, "Igo iara, enai era rau inaku e rau walawalaku maluaneri! ⁵⁰ Pe riai na rau Amaku kupa vanuanai ealuni namu gena ririwa ealarana enai, wa au wa rau walawalaku maluanena, vavine, e rau inaku."