¹ Wa pogipogi munamuna thaonai garo reparepana week thaonai, Mary Magdale- ne ethao Iesu geolea avanai ia na eiathao wa vau meauna kamuvagi tomb gekoua vauna alapau emiao. ² Evavine eravuo Simon Peter elenai e mavevaripa auna riai Iesu na eulamagi gauavagiawai, pe evaila venithao, "Waila natha Iesu gena tomb na pege gapithaia, pe ia noriripari ariai pege veolea." ³ Pe Peter ma auavana mapua gethoao, pe wa tomb kapunai gethaowai. ⁴ Ila ge ravu koukouo, pe mapuana na Peter eravu vanagiao evekwara kuneo tomb ai. ⁵ Pe ia eve rua alio wanai, ia na Iesu geuvua th- apuari gemiao eirao, namu ia ne thoa oao wagau thaonai. ⁶ Simon Peter eve kwarao waia mulinai pe eve thoaoleo tomb thaonai. Ia natha warapua gemia eiarao wanai ⁷ pe wanai maina Iesu repanai rapua geolea maemia. Wa repana rapuana e auniparana geu uv- ua rapuri geregageregaria gemia namu ia repana rapuana evethou geregana emia. ⁸ Pe ila apua, waia ekwara kune tomb ai auna, ethoa waioa, thaonai eiathao eve va auna aunao. ⁹ Wa mamana pene veami eorai ila noai geripawai ethori era Iesu wa mapene mauliwai (laiwai) warega natha. ¹⁰ Pe vevaripa auri mage lavu ulewaio geria numai. ¹¹ Namu Mary wara erua tomb kerunai eagiwai. Namu ia eagiwai, thaonai tomb thoaonai erua auo. ¹² Ia tomb thaonai eaithao angle lualua uloulori gealuo, apua Iesu auniparana geolea repana avanai ma apua gagena avana avanai. ¹³ Ila lualua na gerenagiao ia, "Vavine, ragaunatha goi oaginia?" Ia natha evailathao ila, "Repana ila natha thau geku Vele pege tou thakwa raia, thau noriripaku arikapuai ila natha pege olea Iesu." ¹⁴ Waorai ia na warori eilagiao mulinai, ia emakeo mogo ia na Iesu eruao eiathao wanai, namu ia na neripathao waia wara Iesu. ¹⁵ Iesu na ia evailathao, "Vavine, goi ragauna oagini? Riai wara goi natha oavuani?" Ia euamagio thaonai ia wara wa kapu eralevawai auna, pe gaurai ia natha evailao, "Au namamu, pene goi na potoua makapu apuarai, poro vailaku goi na ariai pove olea, pe ia pana vetou waia." ¹⁶ Iesu na ia evailathao, "Mary." Ia emakeo, pe evailathao ia Aramaic ai, "Rabboni" (ethara wara "Vevari auna"). ¹⁷ Iesu na evailathao ia, "Po ono napa aunagi thau, repana thau thora verage thau Amaku elenai, namu ono thao thau walawalaku elerai pe pono vailaiwari wara thau pana verage thau Amaku e mui Ama- mui ethau geku Palau Velegaua mui gemi Palau Velegaua." ¹⁸ Mary Magdalene ethao pe Iesu gena vevaripa auri evailari, "Thau na Velegaua paiatha," pe wanai Iesu natha ethori peva ilavenia. ¹⁹ Wa garoeona avanai, garo mamana week thaonai, vevaripa auri geve koukiki- magi wanuma thaonai repana ila gekalio Jews elethai, thaonai Iesu ethoaoaole ila ivuaparathai eruao evailathao ila, "Maino mui elemuiai." ²⁰ Iesu na ethori eilagia mulinai, ia na imana e auniparana kapuri evaripathao. Ila gevereleo wanai ila natha Velegaua geiathao thaonai. ²¹ Iesu na mae vaila waithao, "Maino elemui ai. Eveaina Amaku natha peu uku thau, pe thau na aumuinia." ²² Wanai Iesu na ethori eilagiao, ia thagilana eivili venithao ila elethai thaonai eva ilathao, "Vea Palauna igo vaioatha. ²³ Riai natha peva galamamu ono vanamatha, riai gena galamana orothao, ila galamari pigene ve- ilagiwai (pigene vevanama)." ²⁴ Thomas, vevaripa auna apua, ia mai tharana Didymus, ia noaiau Iesu ethao ila elethai. ²⁵ Iesu gena vevaripa aurana ia mulinai geva ilathao, "Thai na paga iatha Iesu." Ia na ila evailathao, "Thau pa ana veva auna auna penethao thau natha Iesu imana genaeroa kapuri pana iari, thau riri- ku na pana napa aunagiri wanaero avarai, emaina imaku na ia gekwanua avari pana naparia valu, thau pana veva auna auna." ²⁶ Garo aula vaivai gevanagio mulinai Iesu gena vevaripa auri magealuo numa thaonai, e Thomas maina aunawara ilaria. Iesu ethao wanumai avagama mapari kou gavu thaonai everua alio ila thaorai, pe ila evailathao, "Maino na elemuiai." ²⁷ Pe Thomas eva ilathao, "Ririmu na ono napa- ri genaeroku avari e mamu natha ma ono iatha thau imaku. Imamu ma ono oleau gekwanuku auniparaku avanai. Goi nori po ono veva auna auna, namu pono veva auna auna." ²⁸ Thomas ethori lavu ulewaio neiwao, "Geku Velegaua e geku Palau Velegaua." ²⁹ Iesu natha ia evailathao, "Repana goi natha thau poiaku gaurai, goi pove vauna auna. Genamania auri wara riairana noai geiaku, namu geva auna aunakuni." ³⁰ Wanai Iesu gena ulavunu ma uveri vairi ealathao gena vevaripa auri thaorai, wa olema eulavunuagiria noai geve alo e aloalo geve alo thaorai, ³¹ namu gena thorithori geve alo ole wara repana mui pigo veva auna auna Iesu wara Keriso, ia Palau Velegaua nauna, pe thaonai geva auna aunania, auri ila mauli pige vaia Iesu tharana pakunai.