¹ Egau mulirai Iesu mauna maevemagai gena vevaripa auri thaorai Tiberias rawap- aranai. Ia eveaina eve vaemeo: ² Simon Peter wara gevekoukou ole Thomas mage gogoawai Didymus, Nathaniel wara Cana auna Galilee ai, Zebedee nauna maluaneri, e maina Iesu gena vevaripa auri lualua. ³ Simon Peter na eva ilathao ila, "Thau ana maganiavu athoani." Ila na ia geva ila- thao, "Thai, maina, ethoa goi ila." Gethoao maganiavu gaina thaonai namu ila wapogi maparana magani apuavagi noai gevagia. ⁴ Wanai, wara pogipogi mogo, Iesu wa oneai eruao, namu gena vevaripa aurana ia noai geripathao wa Iesu. ⁵ Pe Iesu na ila evailathao, "Malaga valimui, magemui ganigani gauri igo ganiria?" Ila natha Iesu geva ilathao, "Noai." ⁶ Ia na evailathao ila, "Gemui le igo oleualea nagai ripamui gena avanai, pe mui na magani vairia igo rawaliria." Veainai ila geria le geole ualeao thaonai geria le pige touragea egauaole repana magani kamuvagi geria le thaonai gevagirao. ⁷ Wanai, vevaripa auna apua ia Iesu na eulamagiawai auna natha Peter evailatha, "Eia wara Velegaua." Pe Simon Peter wara eripao wa Velegaua, gena rapua ewaurao (gena rapua ealavagiria ia noai rapuana), pe epavu ualeo rawaparai. ⁸ Vevaripa auri magelea geve larageo gai thanai ila wara alimaparai namu maganiavu gainai gethao wa nori iarau (wa no inavu lualua cubits) vekarawana veaina, pe ila natha magani vogovagi ma lena gekererageao. ⁹ Pe ila geverivo alimai thaonai, ila na alova charcoal ai egalao unai magani ma parawana (bread) gegalawai geiathao. ¹⁰ Iesu na ila evailathao, "Igo megapi mairi magani gelea mui na evanamo pogo vagiria." ¹¹ Simon Peter ethao pe leai wa magani geve kwara agithao alimai, pe wa magani olari wara iavogo, magani wa inavuna, kapana imaima e oioi veairi (153) gevagiria, pe magani iavogo namu le noai geraleria. ¹² Iesu na evailathao, "Igo veamai igo ganigani." Ila apua na mane renagiao, "Riai goi?" Ila geripa ia wara Velegaua. ¹³ Iesu eveamio, parawa (bread) ila eve- nithao e magani maina. ¹⁴ E vaga oioi na wara Iesu geregana evevamagaio gena vevaripa auri elethai ia warega na elaiwaio mulinai. ¹⁵ Ila geganigani aluo mulinai, Iesu eila iwao Simon Peter elenai, "Simon goi John nauna, goi na thau oulamagi gauakuni pa namu nori egau?" Peter eila iwaole Iesu elenai, "Unamu Velegaua, goi ripamu wara thau natha goi aulamagimuni." Iesu neiwao ia elenai. "Thau na uma (lambs) ono upuri." ¹⁶ Iesu natha Simon mae renagi vaga lualuao, "Simon goi John nauna, goi natha thau oulamagikuni." Peter na Iesu evailao, "Unamu Velegaua, goi ripamu wara thau na goi aulamagimuni." Iesu eilaiwao ia elenai, "Geku mamoe pono iamari." ¹⁷ Iesu na Simon everenagi vaga oioina mae vailao, "Simon goi John nauna, goi na thau oulamagikuni?" Peter wara eveugao repana Iesu natha ia everenagi vaga oioi evailathao, "Goi natha thau oulamagikuni?" Peter neiwao Iesu elenai, "Velegaua, goi natha egau mapari oriparana, goi maripamu wara thau natha goi aulamagimuni." Iesu eilaiwao ia elenai, "Thau geku mam- oe ono upua. ¹⁸ "Auna auna, auna auna, thau na goi availamuni, goi valivumu thaonai, goi wa geregamu gemu rapua oligorawai e goi orowai gemu ririwakapurai, namu goi ono vekuine thaonai, goi imamu ono uthairia thaonai mauma apua na ene varapuamu e ene vuamu goi nori gemu ririwa kapurai ene vaithaomu." ¹⁹ Waorai Iesu na thori eolethawai no eolema pene magai ra warega veaina no Peter na Palau Velegaua pene vanamatha. Ethori eilagirao mulinai, Iesu neiwao Peter elenai, "Mulikuai ono thoa." ²⁰ Peter emakeo thaonai ia na eiathao auna wara Iesu na eulamagia wai ila muli- rai ethoawai, e au wara ila apua riau Iesu auniparanai eva apeau ila geganigani ava- nai e riau eve renagio, "Velegaua, riauna goi pene lewamu?" ²¹ Peter na emalaga eiathao thaonai Iesu evailatha, "Velegaua, eau na ragau ene alatha?" ²² Iesu na evailathao, "Pene thau na ia aririwani ene alu penethao thau pana vea- mai, wagau wa ragau goi elemuai? Ono veamai thau mulikuai." ²³ Pe ethori ethoa lovolovo ole ila thao- rai, thaonai wa vevaripa auna (disciple) no pe ene warega. Pe thaonai Iesu ne ilaiwa Peter elenai wa vevaripa auna mapua pe ene warega, namu, "Pene thau natha eau aririwa nia ia pene alumo penethao thau pana velavu ulewai, wagau wa ragau goi elemuai?" ²⁴ E vevaripa auna (John) ia eve vauna auna wai egau olemari thaorai, pe ia na ealori egau, pe ia na pe ripa wara ia natha eiari egauri mapari wara auna auna. ²⁵ Gau wara maina iavogo mavairi wara Iesu na ealari. Ere wagau apuriapuri mai magere vealo aliole, waveaina thaonai ealimapara na maina maere alorao (book) ere wagau mapari magere vealo.