¹ Ni sa qai ila o Jisu nidra sa rogo o odra a Farisi ni sa rawai qa papitaisotai odra e levu ca'e a tisaipeli mai vei Joni. ² (Sa maqa ni veipapitaisotai o Jisu vatai oya ga o odra ga a ona tisaipeli); ³ Sa biti Jutia qa la'o lesu leqa i Kaleli. ⁴ Sa yaga ve'ea me la'o curumi Samaria. ⁵ Sa yaco mai ina dua a Oro mai Samaria, e yacani oro ana o Saika, e voleata e dua a ti'i ni vanua ma solia o Jekope vei Josefa a luvena. ⁶ E notu ina a tobu i Jekope. Ni sa oca ena taubale o Jisu sa qai lai dabe no ena yasa ni tobu. Ni sa volea a i a ono ni aua. ⁷ Sa la'o mai e dua a yalewa ni Samaria me ta'e wai, sa qai aya ve'ea o Jisu, "Solia mai vei au e so a wai meu gunu." ⁸ Ni sa a'o tu o odru a ona tisaipeli ina dua a oro medru lai voli magiti. ⁹ Sa qai aya ve'ea o oya a yalewa ni Samaria, "E rawa vacava vei io, ni o sa ai Jutia, mo ere wai mai vei au, niu sa yalewa ni Samaria, me so a a mo gunuva?" Ni dra sa maqa ni veireti o odra a ai Jutia ei odra a ai Samaria. ¹⁰ Sa qai Saumia qa aya ve'ea o Jisu, "E o sa ila ai solisoli ni Alou, ei oya leqa ga sa vosa no waqe vei io, 'Solia mai vei au meu gunu, ' e o sa ere ere ve'ea, ena qai solia vei io o oya a Wai ni bula." ¹¹ Sa qai aya ve'ea o oya a yalewa, sa maqa be''a a omiau vokete ni sa titabu a tobu. O na rawata mai vei o io a wai ni bula? ¹² O io sa maqa ni uasivi ca'e, be'a o i o, vei Jekope a tamai eimami, o oya vataini oya ma solia vei eimami a tobu qa ma gunu mai ina o oya, ei edru a luvena ei na ona manumanu?" ¹³ Sa qai saumia o Jisu qa aya ve'ea, "O oya vayadua ena gunu i na wai ai ena mata gunu leqa, ¹⁴ io o oya ena unu ina wai au na solia ve'ea ena maqa ni mata gunu leqa. Io a wai au na solia ve'ea ena yaco me wai vure ina lomana qa tovure waqe ina bula tawamudu." ¹⁵ Sa qai aya ve'ea o oya yalewa, "Mo solia saka mai vei au a wai ari meu ua ina ni mata somi leqa se me'u la'o leqa mai talo wai i ei." ¹⁶ Sa qai aya ve'ea o Jisu, "La'o la'i aciva mada mai a watimu, ma mudru lesu leqa mai ei." ¹⁷ Sa saumia o oya yalewa qa aya ve'ea, "Au sa maqa ni vawati o au." Sa qai aya ve'ea o Jisu, "O sa aya dina mai, "E maqa a watiqu," ¹⁸ ni sa lewe lima oti a watimu, io o oya mudru sa notu vata ai e maqa ni watimu. Sa dina sara a omu vasa ena vi'a ai. ¹⁹ Sa aya e'ea o oya yalewa, au sa ila Saka, ni sa dua a parofita o io. ²⁰ Edra daulotu a tamai eimami ina Uluni vanua ai, io o io sa aya a vanua dodonu me mami dau lotu ina mai Jerusalemi." ²¹ Sa qai aya ve'ea o Jisu, "Yalewa, vabauti au, sa roro no mai a gauna o na maqa ni lotu ina ve'ea a Tamada ina u'univanua a'i se mai Jerusalemi. ²² O miau sa lotu no ve'ea o miau sa maqa ni ila. Eimami sa lotu ve'ea eimami sa ila; ni na la'o mai ve edra a Jiu a vivabulai. ²³ Io ena yaco mai a gauna, sai oya sara ga ai, nidra na lotu Vayalo qa vaidina vei Tamada o odra sa lotu dina, ni sa vaigavia o Tamada a tamata medra qaravi oya. ²⁴ A yalo a Alou, o odra edra lotu ve'ea e dodonu medra na lotu vayalo qa vaidina. ²⁵ Sa qai aya ve'ea o oya Yalewa, "Au sa ila ni na la'a mai a Mesaria (O oya sa acivi na Karisito). Io ena gauna sa yaco mai ina o oya, ena mai vamacalatainia ve'eda a ve'a tauco'o ga o oya." ²⁶ Sa qai aya ve'ea o Jisu, "O au ga au sa vosa no ai vei io." ²⁷ Ena gauna sara ga ana edru sa yaco mai ina a ona tisaipeli. Edra sa urabui nidru sa veitalanoa no ei oya lewa, e maqa ni dua e tarogia, "A cava o sa gutia?" se "A cava o sa veitalanoa no ina ei oya?" ²⁸ Sa qai dainia a ona tatae o oya a lewa, sa qai lesu leqa ina oro, sa qai aya ve'edra a tamata, ²⁹ La'o mai qa une mada a tamata sa aya vei au a vi'a taucolo ga au dau vele'e tu. E rawa be'a ni o oya ai a Karisito, se maqa?" ³⁰ Edra sa qai bitia a oro qa la'o mai ve'ea. ³¹ Nidra se bera ni yaco waqe, edru sa qai cievi oya a tisaipeli, qa aya. rapai mo ana mada." ³² Sa qai aya ve'edra o oya, "Sa rotu vi'au a magiti a magiti me'u ania io mudou sa maqa ni ila." ³³ Sa qai vatarogia o odra a tisaipoli, "Sa maqa ni dua e dia mai ve'ea e dua a me ania, so be'a ve edra?" ³⁴ Sa qai aya ve'edra o Jisu, "A equ magiti sai oya me'u vele'e a lomai oya sa talai au mai qa vaotia a ona ca'aca'a. ³⁵ E maqa li ni o day aya, 'Sa vo ga e va vula me qai yaco mai a gauna ni tatamusui'? Au sa aya ve'emudou, une dou iga ca'e dou igavia a i teitei dra notu ari, edra sa matua tu qa dra sa warainia tu me dra tamusui. ³⁶ O oya sa tatamusui sa saumi sara no qa sa Soqonia no a vuata ina bula tawamudu, me dru marau vata ina a dauabuaburai ei oya a dautatamusui. ³⁷ Sa dina ina a vosa ana, 'E dua sa aburainia, qa dua tani sa tamusua,' ³⁸ Au sa talai emudou mo dou tamusua a vi'a dou sa maqa ni ca'aca'atainia. edra sa ca'aca'a leqa ina e so, io dou sa mai taucia a vua ni odra ca'aca'a." ³⁹ Edra sa vabauti oya e lewe levu a ai Samaria ina oro ana baleta a vosa i oya a yalewa ana ni sa aya ve ai, "Sa aya vei au o oya a vi'a tauco'o au sa dau vele'e." ⁴⁰ Edra sa la'o mai ina o odra a ai Samaria ve'ea, dra sa qai aya vi oya me rotu vata ei edra, qa sa mani notu o oya me rua a Siga. ⁴¹ Sa lewe levu era sa vabauti oya ina ona vosa. ⁴² Edra sa aya vi oya a yalewa, "Ai eimami sa maqa ni vabautia baleta a vi'a io sa aya, e baleta qa ni eimami sa qai rogoci oya sara o eimami, qa ila ni sai oya ai a i vabula ei vuravura." ⁴³ Ni sa oti e rua siga, sa qai la'o sara i Kalili. ⁴⁴ E sa aija vataini oya o Jisu ni sa maqa ni dau doai a parofita ina ona vanua. ⁴⁵ Ni sa yaco mai i Kalili, era sa marau lai oya a ai Kalili. Baleta ni dra ma igavia a vi'a tauco'o ma vete'e o oya mai Jerusalemi ena gauna ni Solevu, baleta nidra ma la'o leqa ga ina solevu o odra ai. ⁴⁶ Sa qai la'o leqa i Kena mai Kalili, ina oro ma vuicia ina a wai me waini. Sa notu ina e dua a valesilesi ni matanitu qa sa tauvimate no a luvena togane mai Kapenaumi. ⁴⁷ Ni sa rogoca o oya ni sa la'o toni mai Jutia i Kalili, sa qai la'o mei Jisu qa erea ve'ea me la'o sobu mai me la'i vabula a luvena tagane, ni sa volea ni mate. ⁴⁸ Sa qai aya ve'ea o Jisu, "ena maqa ni dua e vabautia rawa vei emiau, vavo duadua ga e sa une i matana a ca'aca'a mana veivaurabuitai. ⁴⁹ Sa qai aya ve'ea o oya a vailesilesi, "Miau la'o sobu saka mai ni se bera ni mate a luvequ." ⁵⁰ Sa qai aya ve'ea o Jisu, "Mo la'o ga, ni sa bula a luvemu." Sa qai vabautia a tamata ana a vosa ma cavutia ve'ea o Jisu, sa qai la'o tani. ⁵¹ Ena gauna sa la'o sobu no ina, sa qai sotavi edru a ona tamata ca'aca'a qa aya ve'ea sa bula ca'e mai a luvemu tagane. ⁵² Sa qai vatarogia ve edru o oya se gauna sa teivu me are ina. Dra sa qai aya ve'ea, "ena vitu a kaloko enanoa sa teivu me biti oya ina a ata'ata." ⁵³ Sa qai nanumia Sara o tamana ni sa gauna vata ana ma aya ina ve'ea o Jisu."Sa bula a luvemu tagane." Sa mani vabautia ina o oya ei odra tauco'o a lewe ni ona Vuvale. ⁵⁴ sai oya ai a i arua ni ca'aca'a mana sa vele'e o Jisu ni sa lesu i Kalili ena ona ma notu mai Jutia.