¹ Sa dua ve edra a Farisi e ona yaco o Nikotimo, e odra i liuliu a Jiu. ² A tamata ai sa la'o mai vei Jisu ena bogi qa aya ve ea, "Rapai, eitou sa ila ni o io a i Vavuvuli sa la'o mai ve ea a alou, ni sa maqa ni dua e rawa ni vele'e ³ Sa qai saumia o Jisu ve ea, "E dina, e dina, vavo e dua sa sucu leqa, ena maqa ni une o oya a matanitu ni Alou." ⁴ Sa qai aya o Nikotimo ve'eam "E rawa vaava ni dua a tamata me sucu ni sa qase mai? Sa maqa ni rawa ni curu varua ina ete i tinana me sucu leqa, e rawa ve'ea?" ⁵ Sa saumia o Jisu, "E dina, e dina vavo e dua e Sucu mai na wai eina Yalo tabu, sa maga ni rawa ve'ea me curu ina matanitu ni Alou. ⁶ Sa vayago o oya sa sucu ina yago, io sa vayalo o oya sa sucu ina Yalo. ⁷ Ua ni urabuitainia niu sa aya vei io, 'E dodonu mo Sucu leqa.' ⁸ Sa liwa a cagi ina vanua sa retia me liwa ina; dou sa rogo a ena ronogo, io dou sa maqa ni ila ni sa la'o mai vei se sa la'o no i vei. Sa tauvata leqa ga ina o oya sucu ina Yalo Tabu." ⁹ Sa tarogia o Nikotimo qa aya ve ea, "E na yaco rawa vacava a vi'a ai?" ¹⁰ Sa saumia o Jisu qa aya ve ea, 'O io a odrai vavuvuli a Isireli io ai o sa maqa ni atonia rawa a vi'a ai? ¹¹ E dina e dina, au sa aya vi io eitou sa vosatainia a cava eitou sa ila, qa eitou sa varaitainia a cava eitou sa une. Io o io sa maqa ni ciqomia a, a eitou sa vadewania. ¹² E o au sa aya ve emudou a vi'a me baleta a vuravura qo mudou sa maqa ni vabautia, dou na qai vabautia rawa vacava e o au sa aya ve emudou a vi'a me baleti lomalagi? ¹³ Sa maqa ni dua sa lesu mai lomalagi sa va vo duadua ga a Luve ni tamata, o oya sa la'o sobu mai lomalagi. ¹⁴ Ni sa tauvata a ona lavetia ca'e o Mosese a gata ina loma ni vei coco, sa dodonu me laveti ca'e leqa ga ina a Luve ni tamata, ¹⁵ me rawa ni odra a bula tawa mudu o odra tauco'o sa vabauti oya. ¹⁶ Ni sa lomani odra ve ai a ai vuravura a Alou, sa solia ina a luvena e dua bauga, o oya vayadua sa vabauti oya ena maqa ni rusa ena ra rawatia ga a bula tawa mudu. ¹⁷ Ni sa maqa ni tala mai a Luvena i vuravura a Alou me veilewai tai vuravura, io me dra vabulai ga a ai vuravura ina vu'u ni ona yaca. ¹⁸ Edra na maqa ni lewai o odra sa vabauti oya, io edra sa lewai oti tu o odra edra maqa ni vabauta baleta nidra sa maqa ni vabautia a yaca i oya sa dua bau ga a Luve ni Alou. ¹⁹ O oya a i sa vavuna ve edra a veilewaliniisa lao mai a rarama i vuravura, edra sa lomana valevu a butobuto mai na rarama a tamata aleta ni sa ca a odra i tovo. ²⁰ O oya va yadua sa vele'e a i Valavala ca ena catia a rarama, ena maqa ni la'o mai ina raroma, baleta ena maqa ni gutia o oya me unei a ona i tovo ca. ²¹ Ai o odra sa vayacora a via dina sa lalo mai ina rarama ai me varaitainia ina a vi'a edra sa vele'e qa sa vayacori mai na odra talairawarawa ve'ea a Alou. ²² Ni sa oti, a vi'a ai edru sa qai la'o o Jisu ei edru a ona tisaipeli ina /vanua o Jutia. E sa notu mai ina ei edru qa veipapitaisotai. ²³ Sa veipapitaisotai tai leqa ga o Joni mai Enoni Vole'a i Selimi baleta ni levu ina a Wai. Edra sa qai la'o no mai ve'ea a tamata qa sa papitaisotai odra o oya; ²⁴ e a se bera ni dai o Joni ina valeniveivesu ena gauna ana. ²⁵ E a tubu e dua a veiba ve edra a tisaipeli i Joni ei na dua a Jiu ena vu'u ni veivasavasavatai. ²⁶ Edru sa qai la'o vei Joni qa aya ve'ea, "Rapaim e dua o ya ma notu vata ei io mai na tai adua ni Joritani, o oya oio ma mai varaitainia, une, e sa veipapitaisotai no o oya, qa dra sa la'o tauco'o no ve'ea." ²⁷ Sa qai Saumia o Joni, "E maqa ni dua a tamata rawa ni ciqoma e dua a vavo e sa soli mai ve'ea mai lomalagi. ²⁸ O mudou vai emudou e rawa ni mudou vadinatia ni'u sa aya, 'Sa maqa ni mai Karisito o au, "e maqa, 'O au ma sa talai ga mai meu matai mai ve'ea." ²⁹ Sa ona ga a tagane vou a yalewa vou. Ai a i toani ni tagane vou, o oya ma tucae voli a varogoci oya, sa marau ni sa nogo a domo ni tagane vou. I ai a vuna au sa rui marau ina valeue. ³⁰ Sa dodonu me levu cae no ga o oya, qa me'u lailai sobu no go o au. ³¹ O oya sa la'o mai ca'e, sa levu ca'e ve eda tauco'o ga. O oya sa tu tubu i vuravura sa ai vuravura ga qa sa vosatainia ga a vi'a vavuravura. O oya sa la'o mai lomalagi sa levu ca'e ve eda tauco'o ga. ³² Sa mai varaitainia o oya a vi'a sa une qa rogo, qa sa maqa ni dua e e vabautia a ona i vunau. ³³ Io o oya sa ciqomia a ona i vunau qa vadinadinatainia ni sa dina a Alou. ³⁴ O oya sa tala mai a Alou sa mai aya a vosa ni Alou. Ni sa maqa ni solia me varautai a Yalo Tabu. ³⁵ Sa lomania a luvena o Tamana qa sa solia a vi'a tauco'o ina ligana. ³⁶ O oya sa vabauta a luvena sa rawatia a bula tawa mudu, o oya sa maqa ni vabautia a livena ena maqa ni igavia a bula, sa na notu ga ve'ea a civo ni Alou."