¹ Ia ni sa lao waqe o Jisu, sa igavia e dua sa sucu mata bobo. ² Dru sa qai tarogi eya o odru a tisaip eli, "Vavuvuli, a valavala ca icei o oya a tamata se o odru a onai tubutubul e revuva a ona sucu mata bobo?" ³ Sa qai aya o Jisu, "E maqa ni o oya a tamata ai se o odru a onai tubutubu ia me varaitai ga ina ve eya a caacaa ni alou. ⁴ E dodonu me da velee a caacaa ni Alou ni se siga no. Sa lao no mai a bogi e na maqa ni caacaa rawa ina e dua. ⁵ Niu sa notu i vuravura, o au a rarama ei vuravura". ⁶ Ni sa aya eti ai o Jisu, sa qei welusia a sosomo, ulia vata welu, sa qai boro ina a ona mata. ⁷ Sa qai aya ve eya, "Lao lai tavei ina silisili o sailoawa" (a enai balebaletalai) sa qei lao waqe, tavoi qa lesu leqa mai, sa iga rawa. ⁸ Dra sa qai aya ina a lewi ni oro, ei edra ga leqa ma dau igavi eya ni dau ere ere qa dau notu i bati ni salevu. "E maqa lii ni o oya ga ai a tamata ana dau notu qa ereere?" ⁹ Sa qai aya eso, "O oya ga." qa aya leqa eso, "E maqa, e tautau vata ga ei eya." Sa qali aya o oya, "O yaw sa ana." ¹⁰ Ora sa qai aya ve eya. "Ma qai iga vacava a omu mata?" ¹¹ Sa qai aya o oya, "A tamata sa vatoai o Jisu ma ulia a sosomo qa boro i na oqu mata qai aya vu au, "Lai tavoi i sailoama." Au sa qai lao qa lai tavoi, qau sa qai iga rawa. ¹² Dra sa qai aya, "I vei o oya?" Sa aya o oya, "au maqa ni ila." ¹³ Dra sa qai di eya mai a tamata me mata bobo i mada ve edra a Farisi. ¹⁴ Ia na siga ni vacecegci nia ulia ina a sosoma o Jisu qa dolavia a ona mata. ¹⁵ Dra sa qai tarogi eya leqa a Farisi sa maqai iga vacava. Aya o oya ve edra, "Ma boro a sosoma i na oqu mata, au qai tavoi, qau sa qai iga rawai. ^{18 16} Sa qai aya e so a Farisi, "A tamata ai e maqa ni lao mai ve eya a Alou, aleta ni maqa ni roovia a alou.: Qa aya leqa e so, "E rawwa racava vei dua a tamata i valavala ca me velee tu a caacaa mana ve ai? Sa qai yaco a duidui ve edra. ¹⁷ Dra sa qai tarogia leqa a mata bobo, "A cava o aya me baleti eya baleta ni sa dolavia a omu mata?" Sa qai aya o oya a mata bobo, "O oya a Parofita." Ia odra a Jiu edra maqa ni vabautia ni ma mata bobo i mada sa qai iga rawa me yacovia ni dra tarogi tamana mai ei tinana. ¹⁹ Dra sa qai tarogi edru ai tubutubu, "Oya ai a luvemudrua, oya mudru aya i ma sucu mata bobo? Maqa iga uaeava?" ²⁰ Dru sa qai aya a onai tubutubu ve edra, "Oi raa ila ni levei ei rua ni ma sucu mata bobo. ²¹ Oi rua maqa ni ila se ma qai iga rawa racava se ocei ma dolavia a ona mata, sa tamata bula o oya dou tarogia e na aitai ni eya". ²² Dru vosa ve ana o tamena ei tinana, ni dru rerevai ni edra a Jiu, baleta ni dra sa diravata oti me vatabui me curu i na vale ni soro e dua e ratusa mo Jisu a Karisito. ²³ I ana a vuna ma dru aya nia a ona i tobutubu, "O oya sa tamata bula tarogia." ²⁴ Dra sa qai tarogi eya leqa va rua a tamata mata bobo qa aya re eya, "Varoorootainia a alou. Oimami ila ni o oya e tamata i valavala ca." ²⁵ Sa qai oya qa aya, "au maqa ni ila se tamata i valavala se maqa. Au ila ga, ni ma mata bobo ia au se iga rawa." ²⁶ Dia sa qai aya ve eya, "A cava ma velee ve io? ma dolavia vacava a omu mata? ²⁷ Sa qai aya o oya, "Au sa tovele devu ve emudou, qa mudou se maqa ni rogo! A cava dou mata rogo leqa ina?" ²⁸ "O io a ona tisaipeli, ia eitou a tisaipeli io Mosese. ²⁹ Oimami ila ni Alou ma vosa vei Mosese, qoimami maqa ni ila se lao mai vei o a ai?" ³⁰ Sa qai aya o oya ve edra, "Sa qai dua a tamani a levu, ni mudou maqa ni ila se lao mai vei ia e sa dolavia a oqu mata. ³¹ E da ila ni Alou e maqa ni rogoi edra ai valavala ia, ia e dua e qaravia a Alou qa velee a lomana, ena rogoi eya o oya. ³² Se maqa radua ni rogo mai nai vateivu ni dua a tamata me delavia a mata ni dua a tamata sucu mata bobo. ³³ E maqa ni lao mai ve eya a Alou a tamata e maqa ni rawa velee rawa e dua a a". ³⁴ Dra sa qai vosa qa aya ve eya, "O io madaga ma sucu i valavala ca, qo qai mata vavuliei eimami?" Dra sa qai vatiitiitai ni eya. ³⁵ Sa qai rogo o Jisu ni dra sa vatabui eya mai na vale ni soro. Ni sa igavi eya ea qai aya." O rabautia a Luveni ni Tamata?" ³⁶ Sa qai vosa o oya qa aya, "O eei o oya Turaga meu vabauti eya?" ³⁷ Sa qai aya ve eya o Jisu, "O io sa igavi eya, qo oya sara e vosa no ve io." ³⁸ Sa qai aya o oya, "turaga au sa vabautia," sa qai varooroo ve eya. ³⁹ Sa qai aya o Jisu, "Au sa lao mai i vuravura ai meu lewa, me dra iga rawa o odra sa maqa ni iga rawa, ia me mata bobo o odra sa iga rawa." ⁴⁰ E so ve idra a Farisi ma tu vata ei eya ma dra rogo a ai qa dra tarogi eya, "O io leqa o mata bobo?" ⁴¹ Sa qai aya ve edra o Jisu, "emudou mata bobo, e maqa a omudou cala, ici ni mudou aya "Oitou sa iga, aya ana sa tu ga ina ve emudou a omudou cala".