¹ Ia ni sa devu a ue, sa tarogi edra sa lotu o Paula a sa tatau a lao tani waqe me lao i Masitonia. ² Ia ni sa laovia devu a yasana ana o oya a vatavulici edra valevu, sa qai lao i Kirisi. ³ A sa no tu ina a vula tolu. Ia ni dra sa buivere o odra a Jiu ni sa varau a soo i Siria, sa qai aitia o'oya me laovi Masitonia ena ona lesu leqa. ⁴ O'odru sa lao vata waqa, i Esia, o Sopataro a ai Peira, ei Arisitako ei Sekudu, o'odru a ai Cesolonaika; ei Keio a ai Tapi ei Timoci; ei Tidido ei Tirofimo, o'dru a ai Esia. ⁵ O dru ai, e dru sa lao i mada a waraini eitou mai Tiroa. ⁶ Ia ni sa devu a gauna ni ana madrai tawa leveni, eitou sa qai soo waqe i Filipai, a bogi lima, eitou sa qai vauci edra mai Tiroa, eitou sa no tu ina a bogi vitu. ⁷ Ia ena i matai ni siga ni Wiki, ni sa soqoni vata odra sa lotu medra dovi madrai, sa vunau ve'edra o Paula, ni sa varau me lao e na roaroa; a sa vunau a lomaloma ni bogi a vanua. ⁸ A sa vuqa a cina ena taba loma ni vale i yata, ei mami sa soqoni vata ina. ⁹ A sa ti'la a gonetagane a ona asa o Utiko, sa no volea i na taari i ata, a sa mase lutu sara, Ia ni sa vunau vadede o Paula, sa daini o'ya me mose, a sa lutu sobu mai ai atolu ni taba loma ni vale, ia ni sa laveti cadra sa mate tu. ¹⁰ A sa lao sobu o Paula a sa oto i delana, a mootia, a aya, Dou ua ni urabui ni sa no tu ve'eya a yalona. ¹¹ Ia ni sa lao waqe i ata o'oya, a sa dovi, madrai a anaadra sa veivosoi vadede, a sa roaroa, mai a vanua, sa qai lao tani o'oya. ¹² Odra sa di eya mai a gonetagane ni sa bula, o dra sa vacegui vaalevu. ¹³ i eitou sa matai waqe a vodoia a waqa, a soo i aso, ni eitou sa nanuinia me vavodoi Paula ina, sa veiai a ona lewa, ni sa mata taubale o'oya. ¹⁴ Ia ni eitou a sota mai Aso, eitou sa vavodoiya a yaco i Mitilini. ¹⁵ Ia eitou sa soo tani waqe ei, a yaco me donui Kio ena siga sa tarava; a bogi tila, eitou sa yaco i Samo; a bogi tila leqa, eitou sa yaco i Milito. ¹⁶ Ni sa lewa devu a Paula me soo baleti Efeso me ua ni no tu vadede mai Esia, ni sa vatotolo, erawa ve'eya, me no tu mada mai Jeruisalemi a qai yaco a siga ni Penitiko. ¹⁷ A sa talai mai Milito ki Efeso, me laovi edra o dra a matua ai soqosoqo lewe ni lotu. ¹⁸ Ia ni ra sa yaco ve'e ya, sa tovelee ve'edra o'oya, Dou sa ila a oqui valavala ena veisiga taucoo au a no tu ina ei emudou, sa vateivu ena matai ni siga au a lao mai ina i Esia. ¹⁹ Niu a qaravia a Turaga e na yalo e malumalumu sara, a levu a wai ni mataqu ei na dauvere sa yaco vei au ni ra sa bui qau vere o odra a Jiu. ²⁰ Niu a maqa ni rere meu ua ina ni tavelee e tila a a sa yaga ve emudou, ay sa vavulici emudou, ni dou sa soqoni vata ena veivale leqa ga, ²¹ niu sa varota no ve'edra a Jiu, ve'edra leqa ga a veimatanitu tani, na veivutuni, ve eya a alou, ei na vabauta a oda turaga o Jisu Karisito. ²² A igavia au sa qai lao i Jeruisalemi ka ni sa uqeti a yaloqu, au sa maqa ni ila se sava a yaco ina vei au. ²³ Ni sa vataila vei au a yalo tabu ena veioro taucooga, a tovelee sa waraini au ai vesu ei a rarawa. ²⁴ Au sa maqa sara ga a oqu bula me a talei vei au a meu vadevusia ga a oqu caacaa ei ai tavi sa solia mai vei au a Turaga o Jisu, meu vataila ai tautuu re ni loloma ni Alou. ²⁵ A igavia, au sa ila ni dou sa na maqa ni, igavia leqa ina a oqu mata, omudou taucoo, au a lao voli ena emudou maliwa a vunautainia a matanitu. ²⁶ O'oya ga au sa vadinadinatainia ina ve emudou ena siga ai; niu sa maqa ni cala ena vuuna e tila sa civoti. ²⁷ Niu sa maqa ni rere ni tovelee ve emudou sa loma ni Alou taucoo. ²⁸ O oya ga mo dou vaigavi emudou, ei edra a qele ni sipi, sa lesi emudou a yalo tabu mo dou odra i vatawa, mo dou vaania nai soqosoqo lewe ni lotu ni Alou, o'odra sa volia o'ya ena ona dra. ²⁹ Niu sa ila ai, niu sa lao tani ei, ena qai rusu mai ve emudou eso a wolifa ca sara, edra na maqa ni lomani edra a qele ni sipi. ³⁰ Ena tubu cadra a tamata ve emudou, edra na vosatainia a a veivacalai, me mari edra ina edra sa lotu medra muri ina. ³¹ O'oya mo dou qai vatawa, a nanuma ni sa tolu a yabai au a maqa ni mudu ina vunauci emudou taucoo ena siga ei na bogi a tonawanawa a wai ni oqu mata. ³² O mudou a veiweani, au sa qai tataunai ni emudou ve'eya alou, ei na ona vosa ni loloma oya sa rawatia me vatatataini emudou a solia ve emudou a omudou i votavota vata ei edra sa vasavasa vatai. ³³ Au sa maqa ni ocova a siliva, se a loula, se e tila ai sulu ni tamata. ³⁴ Dou sa ila leqa ga ni sa daucaacaa a oqu liga iai eso a a me yaga vei au, ve'edra leqa ga edra sa no tu vei au. ³⁵ Ena veia taucoo au sa varaitainia ve emudou, ni sa iliili mo dou caacaa veai mo dou vuei edra ina a malumalumu, mo dou nanumia leqa ga a vosa ni Turaga o Jisu ni a tovelee o'oya, A ani veivaalougatatai valevu me soli a val'ailai' ga me tauria a a. ³⁶ Ia ni sa vosa devu veai o'oya sa teiduru, a masu va tila ga ei edra. ³⁷ Adra sa tagi taucoo, sara ga, a mooti Paula, a reguci oya. ³⁸ A sa rarawa valevu a lomadra ena vuu ni vosa a tovelee o oya, ni dra sa na maqa ni igavi eya leqa. A dra sa talatala ve'eya i waqa.