¹ Ia ni eitou sa daini edra, eitou sa varewa a vue waqe i Kosa, a ena roaroa i Roti, a mai ene i Patara. ² Ia ni eitou sa igavia e tila a waqa ni sa soo waqe i finaisi, eitou sa vodoia a soo waqe. ³ Ia ni eitou sa igavi Kipiro, eitou sa soo baleta ena mawi, a eitou soo i Siria a uru i Taia, ni sa sobu ina usana ni waqa. ⁴ Ia ni eitou sa unei edra sa lotu, eitou sa no tu ina a bogi vitu: ia ni sa vavuna a Yalo tabu, edra sa tovelee vei Paula, me ua ni lao i yata o'oya i Jeruisalemi. ⁵ Ia ni eitou sa vadevusia a veisiga a na, eitou a cavutu a lao waqe: a sa talatala vei eitou o'dra taucoo ga ei edra a watidra, ei edra a luvedra, eitou sa yoco mada i nai bili ni oro, eitou sa qai teiduru e matasawa, a masu. ⁶ Ia ni eitou sa veitatau, eitou sa vodo i waqa, a dra sa sua leqa ina odra dui vale. ⁷ Ia ni eitou a soo, mai Taia, eitou sa yaco i Toleme a vei davai ei edra a veiweani, a no vata ei edra a bogi tila. ⁸ Ena nodroa eitou sa lao vata ei Paula, a yaco i Sisaria i ia eitou sa rusu i vale i Filipi ai vavuvuli, o ya sa tila ve'edra a lewe vitu, a eitou sa no vata aya. ⁹ O'dru sa lewe va a luvena, edru sa goneyalewa, edru sa dau parofisai. ¹⁰ Ia ni eitou sa bogi vuqa mai ene, sa lao sobu mai Jutia e tila a parofita, o Akapo a ona yasa. ¹¹ Ni sa rusu mai vei eitou o oya, sa tari a i vau ni sulu oi Paula, a vesu a a ona liga ei aona la a aya. Sa ve ai a vosa ni yalotabu, edra na vesua ve ai a tauei ni vau ni sulu ia i odra a ai Jutia edra sa no tu mai Jeruisalemi, edra na solia i na odra liga o'dra edra sa maqa ni lotu. ¹² Ia ni eitou a rogo a veia ai, oi eitou ei edra leqa ga a tauei, eitou a vamasuti oya me ua ni lao i yata i Jeruisalemi. ¹³ Sa qai tovele o Paula, a sava dou sa velee ni dou sa tagii a vadatuvutainia a lomaqu? Niu sa maqa ni varau meu vesu walega, meu mate leqa ga mai Jeruisalemi ena vuu ni yasa ni Turaga o Jisu. ¹⁴ Ia ni sa rita i rogo o'oya, eitou sa ua Soti, a tovelee, Me yaco ga a ona lewa a Turaga. ¹⁵ Ia ni sa devu a veisiga ai, eitou sa vasosolo mai ena veia e oitouk, a lao cadra i Jeruisalemi. ¹⁶ Eso leqa ga edra sa lotu mai Sisaria, edra sa lao vata ei eitou, adra sa dia e tila sa ltu maawa o Nasoni, a ai Kipiro, me eitou mose ena ona vale. ¹⁷ Ia ni eitou sa yaco i Jeruisalemi, edra sa vacegi eitou, ena rei o dra a vei eani. ¹⁸ Ia ni sa cadra mai a roaroa sa lao vata ei eitou o Paula ei Jemesa, a dra sa rotu ina o'odra taucoo ga a matua. ¹⁹ Ia ni sa veildavai ei edra o oya sa qai tovelee yatila taucoo ga a veia sa velee a alou ena edra maliwa a veimatanitu ena ona vunau no. ²⁰ Oa mo dra sa rogo, edra sa vavinavinaa ve'eya a Alou, adra sa tovelee ve'eya, o io a weai eitou, osa igavia edra sa lewe vica a udolu a Jiu edra sa vabauta, adra sa gumatua taucoo ga medra muria a vunau. ²¹ Ia eso tovelei io ve'edra, ni o sa vavulici edra taucoo ga a Jiu, edra sa notu era edra maliwa a veimatanitu tani medra daini Mosisi, ni o sa tovelee medra ua ni cilivi o'dro driadria se muria ai valavala i mada. ²² Ena ena i vei bea e ve ai? ni cita na rogoca ni o sa tadu mai. ²³ O'oya mo qai velee a a ai eitou sa tovelee vei io: E lewe va a tamata sa no tu vata ei eitou, edru sa bubului. ²⁴ Mo di edru, a vasavasavataini io vata ei edru a volia a odru madrali, me dru tasia a uludru, me dra ila taucoo ina ni sa maqa ni dina a a taucoo ga o sa tovelee ve'edra a ni o sa muria leqa ga ai vunau ie na omu i valavala. ²⁵ Ia ena vuudra a veimatanitu tani edra sa vabauta, eda sa vola devu ina a lewa, medra maroroi edra ga mai na a sa cabo ina veimatakau, mai na dra leqa ga, ei na a sa kuna, ei a daudara. ²⁶ Sa qai di edru a tamata o Paula, ia ni sa asavasavatai oya vata ei dru ena roaroa, sa rusu i vale ni soro, me tovelee a siga ena devu ina veivasavasavatai, a me cabori ai madrali ena vuudru yatila. ²⁷ Ni sa devu e bogi vitu, a dra sa igavi oya ena vale soro odra Jiu mai Esia, edra sa varuqeti a tamata taucooga, a tari oya. ²⁸ A dra sa qoqolou, O mudou a Iireli, dou veivuke mai o'oya ai a tamata sa dau vavulici edra a tamata taucoo ena veiya sana taucoo ga, me ra cati edra a ai noda, ei na vunau, ei na tiina ai a sa dia leqa a eso edra sa matanitu tani ina vale ni soro, a sa vadualialitainia a tiina tabu ai. ²⁹ Ni dra a igavia i mada sa no vata ena oro o Tirofimo na ai Epeso, a dra sa nanumia ni sa dia o Paula, ena vale ni soro. ³⁰ Adra sa u taucoo ga a lewe ni oro, E dra sa ovu vata ei edra a tamata. Adra sa tauri Paula, a yaratainia mai na vale ni soro i tautuba a sa sogo sara a taari. ³¹ Ia ni dia sa retia me dra sa vamatei oya sa yaco ve eya a turaga levu ni mata sotia ai tuutuu, ni sa ue o Jeruisalemi taucoo. ³² A sa dia sara ooya eso a sotia a so a turaga lalai, a ovu sobu ve'edra. Ia ni dra sa igavia turaga levu, ei edra sotia, a dra sa mudu ni usolaini Paula. ³³ Sa qai lao volea a turaga leu, a tauri oya, a sa tovelee me vesui ina senicodo e rua; a sa taroga se o sei o'oya, a sava leqa e mai velee. ³⁴ Adra sa dui taro vainia a a tani o odra lewe vuqa: ni sa maqa ni ila oya a ena dira ena vuu ni ne, e na qai tovelee, me di o'oya ina bure ni valu. ³⁵ Ia ni sa yaco o oya ina i abaaba, sa yaco ni rra sa veibitiyaki oya waqe odra a sotia ena vuu ni odra i valavala vakaukauwa a lewe-vuqa. ³⁶ Ni dra sa lewe vuqa a tamata edra sa muria, a qoqolou, a sa dia tani waqe. ³⁷ Ia ni sa tuberi no o Paula ina bure ni valu sa tovelee ve'eya a turaga levu ni valu, E tara meu vosa mada ve emuceu? Sa qai tovelee o'oya, osa ila li a vosa va-kirisi? ³⁸ E maqa li ni ooya a na a ai Ijipita, o oya a vere ena gauna sa devu, a sa di edra ina veiacu edra sa lewe va a udolu a dau-laba? ³⁹ Sa qai aya o Paula, oi au a Jiu a ai Tarisu mai Silisia, sa maqa ni oro aisi a opu oro, ia au sa masuti emiau mo mi au daini au mada meu vosa ve edra a tamata. ⁴⁰ Ia ni sa vatara o'oya sa tucadra o Paula enai abaaba, a vaatabataba ve edra a tamata. Ia ni dra sa no tu ga varorogo, sara, a sa vosa ve edra o oya ena vosa, vaa Iperiu, a tovelee,