¹ Mumasiku gala, hamili kwamile impuga impiti, vatamile ni shakulya. Uyesu ahavit ava sundikwa vakwe pe ahati, ² ''Nkuyivwila uvwila impuga she vihala insiku 3 she vatalihye nashimo. ³ Nanti nava vwezya kumwavo pe vataliye,vagaziliha mwidala. Vamo vafumile kuvutali.'' ⁴ Avasundikwa vahamula, ''Kwekwi kwe tugagaga amakate munkaya iya lugwa aga kuvalela vonti vanava?'' ⁵ Ahavavuzilizya, ''galinga amakate ge muli nago? Pe vahati, ''7.'' ⁶ Ahavavuzya avantu impuga yonti simutendame pansi. Ahasende amakate 7, ahasalifya, nukumensula tunsi tunsi. Ahavapa avasundikwa vakwe pe vahinza kwilongolela kwavo, pe vahatwala kumpuga. ⁷ Havili vamile nutuswi utunsi, lwe aputila pe ahavuzya avasundikwa ukuti vavape avantu. ⁸ Avene vahalya nukwikuta, pe vahaseva nu kulundiha ivimensule, vihizula iviseje ivipiti 7. ⁹ Kwamile avantu kushimbilila 4,000. Pe ahavavwezya. ¹⁰ Mwaluvilo ahinjila muvwato poka navasundikwa, nukujenda mu shigavo sha Dalimanuta. ¹¹ Pe ava Falisayivahafiha kuli wuyo vahadalinkana nawo. Vahamulinga ukuti avapelele ishimanyilo shimo isha kumwanya. ¹² Pe ahaswimililwa nkani mumupepo ahati, ''Shoni she impapwa ino yikwanza ishimanyilo? Nalyoli nkuvavuzya imwe, nashimo ishimanyilo she shiliva kumpapwa ino.'' ¹³ Ishi pe ahavaleha, nukuyipashila mu vwato, havili nukuvala isyila ilyamwavo. ¹⁴ Lelo avasundikwa valuvizye kunyatula amakate.vatali nape woka umukate mu vwato. ¹⁵ Ahavalinganya ahati, ''Mwenyelezyaje nkani mushevaje niviluzizyo vyava Falisayi nu Herodi.'' ¹⁶ Avene avasundikwa vahasiva vahavizilizyanya veka, ''Pamo pe tutali nu mukate.'' ¹⁷ Uyesu azimanyile pe ahati kuvavo, ''Mukusiva zyashizye mutali nu mukate? Mushili mutakujimba? Mutakuzimanyisanya? Amoyo ginyu gashili magomu? ¹⁸ Mulinago aninso, loli mutakwenya? Muli nago amakutwi , loli mutakwivwa? Mutakukumbuha? ¹⁹ Lwe Ine mensuye amakate 5 pakasi pa 5,000? Viseje vilinga ivyizule ivya vimensusu ivya makate vye imwe mwanyamuye?''Avene vahati kuli wuyo, '' 12'' ²⁰ ''Pala pe nkamensulaga amakate 7 kugava ku vantu 4,000, vili vilinga iviseje vye muhizuzya pe vilinga ivimensule muhizuzya iviseje vilinga? Pe vahati kuli wuyo, ''7'' ²¹ Pe ahati, ''Pe mushili nishi pakuzyaganya? ²² Vahinza ku Bwtesayida. Avantu vahamuleta untonko pe vahalava uYesu ukuti amupalamansye. ²³ Uyesu ahamulema untonko pa nyove, kufuma kuvala kunsi mu haya yila. Lwe amuswilila amati muminso ahamuviha ninyove, ahamuvuzilizya ahati, ''Ukwenya shimo?'' ²⁴ Ahenya kumwanya, pe ahati, ''Nkwenya avantu vali fwe ngati makwi gakujenda.'' ²⁵ Pe ahavili inyove zyakwe pa minso gakwe, ishi pe umuntu wula ahiguha aminso ukwenya kwakwe kuhanda, pe ahanda kwenya vyonti. ²⁶ Uyesu, ahamutuma kuvwela ku nyumba yakwe pe ahati, ''utahinjile muhaya hala.'' ²⁷ yesu ahafuma poka navasundikwa ukufuha muhaya ha kayesali Filipu. Mwidala ahavuzilizya kuvasundikwa, ''Avantu vakuti ine ne nanu?'' ²⁸ Pe vahamula vahati, ''Uyohani we ahozyaga. Avanji vahati, ''Eliya; Navavwavo vahati, 'We wavamo avakuvwi.'' ²⁹ Ahavavuzilizya, ''Pe imwe muti ne nanu?'' Upeteli ahayanga ahati, ''We chilisiti.'' ³⁰ Uyesu ahavahomeshezya kuti vatamuvuzyaje nawumo izyakwe. ³¹ Pe ahanda kuvasambilizya ahati umwana wa muntu kwe vamuyimve mu vintu ivyinji, pe valimuhana avasongo nave vapiti avapiti pe navasimbi, havili valimugoga, Lwe gasila amasiku gatatu alizyuha. ³² Ahaliyanga izwi linili umwa kwivyila. Pe upeteli ahaseguha nawo paluvazu nu kwanda kumupilila. ³³ Nkandi uYesu ahagalunkana nu kwenyelezya avasundikwa vakwe pe ahamuhalipila u Peteli ahati, ''Galuha mwisinda kuline, satana! Utavisile insivo zyaho pa vintu vya Mulungu, nkandi pa vintu vya vantu.'' ³⁴ Ahitizya impuga nave vasundikwa poka, pe ahayanga kulivavo, ''Nanti we akwanza ukundandata ine, pe azihane wuyo werka, avegale ishihovenkanyo shakwe pe andandate ine. ³⁵ She uno we akwanza ukupoha uvulanzi vwakwe we alivusovezya wonti we akuvutaga uvulanzi vwakwe mulandu wane nizwi we alivupoha. ³⁶ shingamwavwa shoni umuntu nape alonka insi yonti pe alisovezya uvulanzi vwakwe? ³⁷ Shintu vuli she shingapoha uvulanzi vwaho? ³⁸ Uno we ngakuva ninsoni kuline na mazwi gane mumpapwa iya luvembu nu vutala malandu mu mpapwa ino, umwana wa muntu wope aliva ninsoni nawo lwe inga ayinza kuvushindamu mwa Tata wakwe poka navahavizya avafinjile.''