¹ Pe uYesu ahinjila havili mwi sinagogi, mwe mwali umuntu we ayumiye inyove. ² Avantu vamo vahamwenyelezya nkani inga uwene angamupozya pisiku ilya sabata ukuti avene vave nizya kumususya wuyo. ³ U Yesu ahamuvuzya u muntu we ayumiye inyove, ''Nyamuha havili uyimilile pakasi pa vonti.'' ⁴ Pe uwene ahayanga ku vantu, ''Lungava lulajilo ukuvomba inyinza pisiku ilya sabata pamo ukuvulazya; ukupoha uvulanzi pamo ukugoga?'' Loli avene vapumile. ⁵ Uwene ahavenyelezya pa pavo nu vuhalazu, havili ahayilizania pa mulandu uwa vugomu uvwa moyo gavo, pe uwene ahati ku muntu, ''golosya inyove yaho,'' Uwene ahayigolosya, pe inyove yakwe yihapola. ⁶ Ava Falisayi vahafuma pe umwaluvilo vahanda ukumulondola ni mpuga iya Herodi mwe avene vangamugojela. ⁷ Pe uYesu, nava sundikwa vakwe, vahavala kwa sumbi, pe impuga impiti iya vantu yihamulandata ukufuma mu Galileya na mu-Yudeya ⁸ na mu-Yerusalemu na mu-Idumeya na mwisyila ilya Yolodani ukuzyungulila u Tilo nu Sidoni. Lwe avene vivuye izya vintu vye uwene ahavombaga, impuga impiti yihinza ku kwakwe. ⁹ Uwene ahavavuzya ava sundikwa vakwe ukuti vasenganie nzila ivoti ilinsi pa mulandu uwa mpuga, ukuti avene vatahatutanaje nawo. ¹⁰ She uwene avapozizye avinji, kwe kuti na wonti wula we ali nu vuvavu ahayikungulaga ukufiha pa pakwe ukuti amupalamansye. ¹¹ Ahavalilizyo honti he impepo inkandamanu zyamwenya, zihagwanga pansi pilongolela lyakwe nu kuholela, pe izyene zihati, ''Iwe we mwana uwa Mulungu.'' ¹² Uwene ahazilajila nkani ukuti zileshe ukumutambula. ¹³ Uwene ahazuva kwi gamba, nu kuvitizya vala ve ahavanzaga, pe avene vahinza ku kwakwe. ¹⁴ Pe ahavasala 12 (ve uwene avisite vapositili) ukuti avene vangava nawope havili angavatuma venevo ukulumbilila izwi, ¹⁵ nukuti vave nu vulamulili uvwa kupilila impepo inkandamanu. ¹⁶ Pe ahavaseva 12: U Simoni, wula we amupiye izina u Peteli; ¹⁷ U Yakovo umwana uwa Zebediya, nu Yohani umukulu uwa Yakovo, wula we amupiye izina uBonajezi, lye likuti, avana ava kujilima; ¹⁸ nu Andireya, nu filipu, nu Batolomeyo, nu matayi, nu Tomasi, nu Yakobo umwana uwa Alufeyo, nu Tadeyo, nu Simoni umu Ziloti, ¹⁹ nu Yudasi isikalyoti, we akwinza ukumulonjelela wuyo. ²⁰ Pe uwene ahavwela kuhaya, ni mpuga yihinza poka havili, she zyali zyakuti avene vatahalye nawe mukate. ²¹ Lwe ava munyumba yakwe vivuye izi, vahafuma kunzi ukumulema, she avene vatili, ''Apungine.'' ²² Pe ava simbi ve vafumile ku Yelusalemu vatili, ''Uwene ali nu Belizebuli'' havili ''ukujendela kwa mulongozi uwa mpepo akuzifumya impepo inkandamanu.'' ²³ U Yesu ahavitizya venevo nu kuvavuzya ku viholanio, ''Buzye u Satana angamupilila u Satana?'' ²⁴ Nanti ishinamwene shingagavinkana nuku vushilana sheka, ishinamwene shila shitangimilila. ²⁵ Nanti inyumba yingagavinkana nukuvushilana yeka, inyumba yila yitahondeye ukwimilila. ²⁶ Nanti u Satana angayivushila wuyo weka pe akugavinkana, uwene atahondeye ukwimilila, loli kwe kuti asila. ²⁷ Loli nawumo we anginjila mu nyumba iya muntu uwa maha nuku mwivila ivyakwe nanti atangandila amupinye uwa maha uyo, pe uwene akumufyula ivya mu nyumba yakwe. ²⁸ Nalyoli ine nkuvavuzya imwe, uvutalamalandu vonti uvwa vana ava vantu vulitetelwa,na zila zyonti izya musamu zye vahazitambulaga, ²⁹ ''loli uno wonti we akumusamula u Mupepo u Mufinjile we atalitetelwa nalumo, loli aliva nuvutalamalandu uvwa shima na shima.'' ³⁰ U Yesu ahayanga ishi pa mulandu avene vahatinji, ''Uwene ali ni mpepo inyazu.'' ³¹ Pe u mama wakwe na vamwavo vinzile nu kwimilila kunzi. Avene vahatuma ku kwakwe, pa kumwitizya. ³² Impuga yihaye ukumuzyungulila wuyo pe avene vahati ku kwakwe, ''Umama waho na vamwinyu vali kunzi, avene vakukulondola iwe.'' ³³ Uwene ahavamula venevo, ''Ve vawenu veve vamama havili vamwitu?'' ³⁴ Uwene ahenyelezya pa vala ve vihaye ukumulivilila wuyo pe ahati, ''Yenya, apa pe pali umama wane na vamwitu! ³⁵ She wonti we akuvomba ukwanza ukwa Mulungu, umuntu we wula we wamwitu, muyemba, havili wu mama.''