¹ Lwe uwene agalusile ku kapelinamu lye gajenzite amasiku mansi, zihivwiha ukuti uwene ali pa haya. ² Avinji vavungine kwe kula pe patali nu vuzilo navumo, nape pa mulyango vwelele, pe uYesu ahayanga izwi ku kwavo. ³ Pe avantu vahinza ku kwakwe ve vamunyamuye umuntu we ahataliye, avantu 4 vamunyaye uwene. ⁴ Lwe avene vapositwe ukupalamila pa pakwe mulandu wa mpuga iya vantu, avene vahapangula pa musonje pa mwanya pa Yesu, lwe avene viguye vahisya ishitanda she umuntu we ahataliye agoneye papo. ⁵ Lwe ayenyizye ulwitiho lwavo, uYesu ahati ku muntu wula uwakumilila, ''mwana, imbivi zyaho zyatetelwa. ⁶ ''Ishi vamo ava Simbi vihaye pe pala, vahanda ukusivilila mu mwoyo gavo, ⁷ ''Umuntu uno angayanga vuli vuli uvunye? Akusamula! Wunanu we angatetela imbivi wu Mulungu weka?'' ⁸ Umwaluvilo uYesu ahazyagania mu Mupepo wakwe zye vahasivaga mumwavo. Uwene ahati ku kwavo, ''shoni she mukusiva izi mu moyo ginyu? ⁹ Shoni she shipepusile, ukuyanga ku muntu uwa kumilila, 'Imbivi zyaho zyatetelwa, ' pamo ukuyanga ukuti, 'nyamuha, senda ishitanda shaho, jendaga'? ¹⁰ Loli ukuyana nu luvatiho izi mwamile muzimanye ukuti umwana uwa muntu ali namaha munsi iya pansi aga kutetela imbivi, ''ahayanga kwa we ayumiliye, ¹¹ ''Ine nkuyanga kuliwe, nyamuha, senda ishitanda shaho, jendaga ku nyumba. ¹² ''Ahayamuha mwaluvilo ahasenda ishitanda, nu kufuma pantanzi pa vonti, pe ponti vahasukumila nu kumupa uvupiti uMulungu, vahati, ''tutahatela twenye zimo inza vwevulo.'' ¹³ Ahajenda havili muluvazu ulwa sumbi, pe impuga yonti yihinza ku kwakwe, pe ahanda ukuvamanyisya. ¹⁴ Lwe akushilingania ahamwenya u Levi umwana wa Alufeyo ayihaye pi hema ilya vasonchezya musonko, pe ahamuvuzya, ''ndandata. ''ahanyamuha nu kumulandata wuyo. ¹⁵ UYesu lwe akulya ishakulya mu nyumba iya Levi pe ava sonchezya musonko na vatalamalandu vahalyanga poka nava sundikwa vakwe, she vali vinji ve vamulandite wuyo. ¹⁶ Avene ava simbi ve vali va falisayi lwe vamuvonyi ukuti akulya nava sonchezya musonko na vatalamalandu, vahati kuva sundikwa vakwe, ''shoni she ukulya nava sonchezya musonko na vatalamalandu?'' ¹⁷ Lye uYesu ayivuye zinizi uwene ahati ku kwavo, ''Avantu ve tevavinu vatakumwanzaga umuganga; loli veka avantu ve vavinu. Ine ntahinza ukuvita avantu avavagolosu, loli avatalamalandu.'' ¹⁸ Ishi lelo ava sundikwa ava Yohani nava falisayi vahafungaga. Pe avantu vahinza nu kuyanga ku kwakwe, ''shoni she ava sundikwa ava Yohani nava sundikwa avava falisayi vakufunga, loli ava sundikwa vaho vatakufunga?'' ¹⁹ UYesu ahati ku kwavo, vuzye ve visitwe kuvu kwati vangafunga lwe umwenesho uwa vukwati ashili ali navope? Pe umwenesho uwa vukwati ashili ali navope, avene vatangafunga. ²⁰ Loli amasiku gakwinza ge umwenesho uwa vukwati alisendwa ukufuma ku kwavo, pe mu masiku ago, avene valifunga. ²¹ Nawumo we akusonaga ahenda ahapya pa mwenda umukali. Lumo ishigamba ishipya shingazepula umwenda umukali, pe ukuzepuha kukuva kukuvipa nkani. ²² Nawumo we akuvihaga ipele ipya mu mafuku aga makwela amakali. Lumo inga zingava uvo ipele ilya mampensya lingapunsya amakwela pe vyonti ipele ilya mampensya na mafuku aga makwela vikunanjiha.Muvuzilo vwakwe, ipele ilya mampensya ipya vakuviha mu mafuku aga makwela amapya.'' ²³ Pisiku ilya sabata uYesu ahadumunsania mu magunda aga nsanga , pe ava sundikwa vakwe vanzite ukuseva amatwe aga nsanga. ²⁴ Pe ava Falisayi vahayanga vahati ku kwavo, ''Yenya, shoni she vakuvomba zye te lulajilo pisiku lya sabata?'' ²⁵ Uwene ahati ku kwavo, ''mutahatela muvelenje zye u Devedi avomvile lwe uwene asovelilwe havili ali ni nzala - wuyo na vantu ve ali navo- ²⁶ mwe uwene ayinjiliye mu nyumba iya Mulungu lwe u Abiyatha ali muputi umupiti, nu kulya umukate uwa kuvoneshela, lwe lutatali lulajilo ku wonti wula ukulya veka avaputi, havili ahavapa wumo vala ve ali nawo?'' ²⁷ UYesu ahati, ''Isabata lihagombwa ku mulandu uwa muntu, te muntu ku mulandu uwa sabata. ²⁸ Pe lelo, Umwana uwa muntu wu Mwene , nakwa Sabata vwelele.''