¹ Uvu vwe vwandilo uvwi vangeli ilya Yesu Chilisiti, umwana uwa Mulungu. ² Inza she izyene zyasimvilwe mwa Yesaya umukuvwi, ''Yenya, Ine nkumutuma umutumwa wane pilongolela ilya vyeni vyinyu, wuyo we aliyananya idala lyinyu. ³ Izwi ilya wumo likuholela mulugwa, 'senganya idala ilya Mwene; gomba amadala gakwe gagoloshe.''' ⁴ U Yohani ahinza, ukozya mulugwa nu kulumbilila ulozyo ulwa lupinduho ulwa kutetela imbivi. ⁵ Insi yonti iya Yudeya na vantu vonti ava Mu Yelusalemu vahafuma nukubala ku kwakwe. pe vahozelwa na wuyo mwi jenje ilya Yolodani lwe vakuyilata imbivi zyavo. ⁶ U Yohani azwaye ishizwalo isha masepe aga ngamila nu lamba uwi kwela ukulivilila umutenzi wakwe, pe uwene ahalyanga ava makanta nu vushi uvwa mu ntundu. ⁷ Uwene ahakumusya, ''wumo akwinza mwisinda mu mwane we ali na maha ukundusya ine, nu tukusa utwa nsapato zyakwe ntahondeye ukwinama pansi nu kusatula. ⁸ Ine nkuvozya imwe na minzi, loli uwene alivozya imwe nu Mupepo uMufinjile,'' ⁹ Izi zihavombwa mu masiku ge gala ge U Yesu ahinza ukufuma mu Nazaleti uwa mu Galileya, pe ahozelwa nu Yohani mwi jenje ilya Yolodani. ¹⁰ Lye u Yesu akufuma mu minzi, pe ahenya imwanya zyigusile pe nu Mupepo ahiha ukwinza pa wuyo ngati nkunda. ¹¹ Pe izwi lihinza ukufuma kumwanya, '' Iwe we Mwana wane umuganiwa. Ine nkuseshela nkani niwe.'' ¹² Pe uMupepo amutumile uwene ukuvala mulugwa. ¹³ Pe uwene ali mulugwa amasiku 40, lwe akulingwa nu satana. pe uwene ali ni vinyamana ivya mwi sole pe na vahavizya vahamuvombelaga wuyo. ¹⁴ Ishi lwe u Yohani vamupinyile, u Yesu ahinza ku Galileya pakulumbilila ipangwi ilyinza ilya Mulungu. ¹⁵ Uwene ahati, ''ahavalilo hafishiye, pe ishinamwene isha kumwanya shili papipi. Pindushi nu kusuvila ipangwi ilyinza.'' ¹⁶ Lwe uwene akujenda muluvazu mwa sumbi uwa mu Galileya, pe ahamwenya u Simoni nu Andireya uwamwavo uwa Simoni vakusumbila ishilepa mwa sumbi, she avene vali vantu vakulema inswi. ¹⁷ Pe u Yesu ahati kuvavo, ''Nzaji, ndandata ine, pe nandi imbapele imwe ukuva mwe avakulema avantu,'' ¹⁸ Pe umwaluvilo avene vahavileha ivilepa vyavo nu kumulandata wuyo. ¹⁹ Lwe u Yesu akujenda pavutali hansi, uwene ahamwenya u Yakovo umwana wa Zebediya nu Yohani uwamwavo; avene vamile mwi voti vahagambihaga ivilepa vyavo. ²⁰ Uwene ahavitizya venevo pe avene vahamuleha uyise u Zebediya mwi voti na vambombo ve avalanjiye, pe avene vamulandite wuyo. ²¹ Pe avene vahinza ku kapelinamu pisiku lya Sabata, u Yesu ahavala mwi sinagogi pe avamanyisizye. ²² Avene vahasukumila pa hamanyisizye hakwe, she uwene ahavamanyisyaga avene ngati wumo we ali nu vulamulili havili te ngati vasimbi. ²³ Pe pala umuntu we ali mwi sinagogi lyavo we ali ni mpepo inyazu ahaholela ahati, ²⁴ Iswe tuli ni shoni isha kuvomba niwe, Yesu uwa mu Nazaleti? Iwe winza ukutunanganya iswe? Ine nkumanyile mwe uveleye. Iwe we mufinjile uwa Mulungu!'' ²⁵ U Yesu ahayipilila impepo inkandamanu pe ahati, uve mya havili ufume mu mwakwe!'' ²⁶ Impepo inyazu zihamusumba pansi pe yihafuma mu mwakwe lwe yikuholela kwizwi ipiti. ²⁷ Avantu vonti vahasukumila, pe avene vahavuzilizyanya woka nu wamwavo, ''Shoni shinishi? Kumanyisya ukupya nu vulamulili! Uwene akuzilajila ni mphepo inyazu vwelele pe zyope zikumwivwila wuyo!'' ²⁸ Pe ipangwi ilya wuyo lihajenda monti na ku vigava vyonti ivya mu Galileya. ²⁹ Lwe vafuma mwi sinagogi, avene vahinza mu nyumba iya Simoni nu Andileya, vahalongozanya nu Yakovo nu Yohani. ³⁰ Pe unyinavwala wa Simoni agonile avinile inzegema, pe avene vahamuvuzya u Yesu izya kuyana nawo. ³¹ Pe uwene ahinza, ahamunyamula uwene pa inyove, nu kumunyamusya; pe inzegema yihamuleha uwene, nu kwanda ukuvavombela venevo. ³² Ilya hamazuva lila lwe izuva lyinjila, avene vavalesite ku wuyo vonti ve vavinile pamo vevizuye ni mpepo inkandamanu. ³³ Inkaya yonti yihavungana poka pa mulyango. ³⁴ Uwene ahavapozya avinji ve vavinile imbina izya ku lehana lehana nu kupilila impepo inkandamanu, loli atahazyitishizya impepo ukuyanga pa mulandu izyene zyamumanyile. ³⁵ Uwene ahanyamuha inzanchi nkhani, lwe kushili kuli ishisi; uwene ahepa nukuvala kuvuzilo uvwa weka nu kwanda ukuputa. ³⁶ U Simoni poka nave ali navo vahamulondolaga. ³⁷ Avene vahamwaga pe vahati ku wuyo, '' Wonti akukulondola Iwe.'' ³⁸ Uwene ahati, ''Leha iswe tuvale kuvunji, kunzi ku nkaya zye zituliviliye, kwe kuti Ine ningavala indumbilile kuko havili. We mulandu Ine ninzile uku.'' ³⁹ Uwene ahavala mushigavo shonti isha Galileya, ukulumbilila muma sinagogi gavo nu kupilia impepo inkandamanu. ⁴⁰ Uwa mambombo ahinza kuwuyo. Uwene ahamulavaga wuyo; Ahasugamila pansi pe ahati ku wuyo, ''Inga iwe ukasime, unganzelufya ine.'' ⁴¹ Ahamufwila uvwila, u Yesu ahagolosya inyove yakwe nu kumulema, ahayanga ku wuyo, '' Ine nkasime, Zelupaga.''' ⁴² Umwaluvilo, amambombo gahepa pa wuyo, pe uwene azelufile. ⁴³ U Yesu ahamusoha nkani pe ahamuvwezya. ⁴⁴ Uwene ahayanga ku kwakwe, ''Uve pa vwanaloli utahayanje nashimo ku wumo, loli valaga, uyilanjizye weka ku muputi, havili ufumye nisha kuyizelufizya shaho she uMose ahavahomeshezya, ukuva lusimishizyo ku kwavo.'' ⁴⁵ Loli uwene ahajenda pe ayanzite ukusasya amapangwi monti, pe isho shalesile ukuti u Yesu atahinjilaje mu nkaya apazelu loli uwene ahihalaga ku vuzilo uvwa kuvutali. Pope vwelele avantu vashili vakwinza ku kwakwe ukufuma monti.