¹ Kweni umanye chii; Umumanda ya wumalilo kuliya insita izikome. ² Muno ayantu yaliya aya kuyikunda wonga, ayakukunda imphiya, ayakuyuvwa, ayakuyikuzya, ayachilumba, ayakunthuvwila ayakwasi, ayakunthatayizya, na yakandamane. ³ Yaliya ayawula ulukundo lwakupapwa nalo, ayawula ulutetelo, ayalili, ayawula ukuyilema, ayalombwa, na yakunthakunda ivizima. ⁴ Yaliya ayakupita ukumbali, ayakaka, ayakututumuka, ayakukunda ivya kusechelesya umunthu ukuchila Leza. ⁵ Yaliya ni milolechele iyawu Leza, kweni yalikana amaka yakwe. Yifumyeko uku yanthu yaa. ⁶ Apakuti yamwi muli woliwo awonsi yano yandi yasochelela umuzyang'anda nukulema ayanachi ayatumphe. Yaa ayanachi yano yatwisilwe katundu wa luyembu lwawo nukuti yakatungululwa na malunkhumbwa ayapusanepusane. ⁷ Ayanachi yaa ayakasambilila insita yonsi, kweni yakavilwa ukufika ku wumanyi wa wuchumi. ⁸ Umunzila yiyokwene Janesi naJambulesi yiminkhine na Mozesi, yakasambilizya yawufi yano nawo yiminkhine nu wuchumi. Ayanthu yano ayononeke umumelengwi, nukuti ukuyana nukwisuwilo yasimichilwe ukuti ayawufi. ⁹ Kweni yatandi yaye apatali. Apakuti uwutumphe wawo wulilolechela kuli wonsi, ngati ukutumpha ukwa yanthu yaya. ¹⁰ Kweni ngati kuli wewe, wetukonkha ukusambilizya kwane, imichitile, ukusimichila, isuwilo, ukuchula kwa nsita iyitali, ulukundo, ukufuka, ¹¹ Ukuvwa ivyakuwa, amachuzi, navino vyanchitichile mu Anthiyoki, mu Ikoniyamu, numu Lisitiliya. Nachuzile umuvivule. Muli vyonsi, Leza wamphuswisye. ¹² Wonsi yano yakulonda ukwikala muwu leza ngoza muli kilisitu Yesu alichulika. ¹³ Ayanthu ayayipe na yachawufi yalifuma apawuyipe ukuya apawuyipisye, ukutungulula ayawuze na woliwo wonga ukuwuponge. ¹⁴ Kweni kuli wewe, wikale umuvinthu vino wasambilila nukuti uvisuwile sana. Umanyile kuli wino wasambilila. ¹⁵ Umanyile vii ukufuma ukuwanche wako wamanya amawaliko ayapawulwe. Yano yalingine yakupe amano apakupusuka ukupitila umwisuwilo muli Kilisitu. ¹⁶ Iwaliko lyonsi yaputililwa na Leza. Ilyakwavwa apisunde, apakususyanya, apakuyanya, na pisambilizyo lya wulungamane. ¹⁷ Chii chili vii ukuti umunthu wakwe Leza angaya umutiswe, uwakuyipekanya ukuwomba umulimo wonsi uwuzima.