¹ Bo u Yesu amalizya chilichonsi cho akanenanga kubanthu, akinjila mu Kaperenawumu. ² Po usongo wabwite akaba nu muzya yo umwene akamuchindikanga, po akalwala akaba papipi nukufwa. ³ Bo usongo wabwite ivwa izya Yeso, akatuma abasongo baba Yuda kukwache, ukuti bamulenge ukuti abuke aye amupozye uwambombo wache. ⁴ Bobiza kwa Yeso, bakamulambilizya, nukuti, '' abaghilile ukuba nuwe mumbombele ichi, ⁵ chifukwa achighanite ichisu chitu, sona weyo akatuzengela i sunagogi. ⁶ Po u Yeso akapululizya inzila nabo. Loli bo ataba pabutali ninyumba, usongo wabwite akatuma abanyanche ukuti banene nawe bati, '' Mwene utakitamyenge papo nthabaghilile nukuti ungiza pansi pa musonje wane. ⁷ Pachifukwa ichi nthibikite napakuti mbaghilile pakwiza kukwako, loli nena bwaka amazyu po uwambombo wane akwiza pakupola. ⁸ Pakuti nune ne munthu yo ali pansi pa bulaghili, nabalwabwite bobali pansi pane, nune nkhunenanga, ' buka' sona akubuka, nakumunyabo ' zaa' po akwiza, nakubambombo, ' bomba ichi,' po akuchibomba. ⁹ Bo u Yesu azivwa zinonyene, akaswigha nukung'anamukila kuchilundilo chochikamukonkhanga nukunena ukuti, '' Nkhubabuzya, na mu Yerusalemu bwaka nthalubweni lumo ulwitiko ngati luno.'' ¹⁰ Bobala babo bakatumiwa banyokela kunyumba, bakagha uwambombo yula apolite. ¹¹ Mwalubilo ufuma apo, u Yeso akaya ku kaya ka Naini, na bafundiwa bache sona ubwnji bwa bumba likabuka nawe. ¹² Bo akwiza ku pipi na pa bwinjililo bwa kaya, lingizya, umunthu yo akafwa akanyamuliwa, yo akaba mwa mwene wa yo akaba wa nyina ( yo akaba mufwilwe), po ubwinji bwa bumba ubunji bukaba nawe. ¹³ Bo u Mwene amulinga akamwivwila ichibabilizi po akati kukwache, ''Utakalilenge.'' ¹⁴ Po akabuka nukuya pakukola ichitabwa cho bakanyamulilapo umubili, nabo bakanyamula bakimilila tasi. Akati, ''We mwana uwe, nkukubuzya ukuti, nyamuka.'' ¹⁵ U muntu wakufwa akanyamuka nukwanda pa kunena, sona u Yeso akamupa u nyina. ¹⁶ Po ubogha bukabagha bonsi bwaka, po bakbukilila ukumuchindika u Chala ukuti, ''U mukunguluka umukulu anyamuka pakasi pa pitu'' sona u Chala alingisya pa bantu bache.'' ¹⁷ Inkhani iya Yeso yikivwika akaya konsi aka Yudeya nu twaya to bapalamanite nato. ¹⁸ A bafundiwa ba Yohani bakamubuzya ivinthu vyonsi ivi. ¹⁹ Po u Yohani, akitizya abafundiwa bache babili nukubatuma kwa Mwene ukuti baye bati, ''Ka we wa yumo yo akwiza, pamo tulindilile uyunji?'' ²⁰ Bo biza kupipi kwa Yeso, abantu bakati, ''U Yohani uwa lozyo atutuma kukwako ukuti tuti, ''Ka we wa yumo yo akwiza, pamo tulindilile uyunji?''' ²¹ Pakufuma pakabalilo kalanyene akapozya abinji ku ndwala zyabo sona nivyakupinga poka ni mphepo imbibi sona na bafwa maso abinji bakulolela. ²² U Yeso akamuka nukuti kukwabo, ''Nanti inti munyokelenge, muye mu mubuzye u Yohani cho mwalolela nukwivwa. Abafwa maso bakulolela, abalemazu bakwenda, aba ma mbombo bakuswepiwa, abakutwi bakwivwa, abakufwa bakuzusiwa ku bumi sona na bantu bakusoba bakubuziwa amazwi amiza.'' ²³ Umuntu yo atakuleka ukusubila mu mwane chifukwa cha mbombo zyane musayiwa.'' ²⁴ Bo ababombi ba Yohani bafumapo, u Yeso akanda ukunena ku bantu ivya Yohani, ''Ka choni cho mwafumitepo nukuya pakulinga ku chipalamba? Itete lyi likanang'eniwa ni mphepo? ²⁵ Loli ka mwabukite pakulinga ichoni? Umunthu yo avwete imyenda imiza? Linga, bo bavwete imyenda iya pamwanya sona abakwikala mu bwikazi bwa lwangalo bobobali muchipinda cha bamwene. ²⁶ Loli ka po mwayile pakulingako ichoni? Umughonela? Eeee, Nkukhubuzya, ivinji pakulusya umughonela. ²⁷ Uyu weyo ivi visimbiwe, 'Lolela, nkutuma umubomvi wane panthazi papinu, yo akwiza ukubayanizya inzila panthazi papinu.' ²⁸ Nkhubabuzya, pa bonsi bo bakapapiwa mu mwanakazi atalipo nayumo yo mukulu ukupota u Yohani. Po wensi yo munandi mu bumwene bwa Chala weyo mukulu ukupota umwene.'' ²⁹ (Bo abanthu bonsi bivwa ivi, na basonkhezya musonkho bwaka, bakitikizya ukuti u Chala muswepu, chifukwa boziwe nu lozyo lwa Yohani. ³⁰ Loli abafalisi sona na bamanya indaghilo bakakana imbombo ya Chala pabene, pakuti batoziwe nu lozyo lwa Yohani.) ³¹ Ka chochoni, polelo, ningafwanikizya na banthu ba mphapo iyi? Ka po bobawenu? ³² Bali ngati bana bo bakwangala pa buyo ubwakughulizizyapo ivnthu, bo bakwikala nukwitizania sona nukuti, 'Nukukulizizya amalonji, loli utakwimba. Tukwimba inyimbo zya pa mpungo, loli utakulila.' ³³ Pakuti u Yohani uwa lozyo akiza loli atakalyapo ichibama pamo ukung'wapo ivinyo, sona nukuti, ' Koti cho chimphepo ichibibi.' ³⁴ U mwana wa Munthu akiza ukulya sona nukung'wa, nukuti, ' Linga, munthu wa bwaka sona we ching'wela, umukamu wa basonkhezya musonhko sona munanzi!' ³⁵ Loli ubunthu bukukweziwa na bana bache bonsi.'' ³⁶ Po ulu yumo umu Falisi akamwitizya u Yesu ukuti alye nawe. Po bo u Yesu injila mu nyumba yila iya mu Falisi, pa tebulo ukuti alye. ³⁷ Lolela, pakabapo umwanakazi yumo mu chikaya yo akaba munanzi. Bo agha ukuti ikalite pa tebulo mu nyumba ya mu Falisi, akiza nakachipale ka mafuta aghapakala. ³⁸ Bo imilila kunsizi kwa matamba ghache, akulila, akanda pakunyesya amatamba ghache na mansozi ghache, po akaghapupulanga ni sisi lyache nukufympa amatamba ghache sona nukughapakazya na mafuta. ³⁹ Bo u mu Falisi yo akamwitizya u Yesu alinga ivi, akinong'ona pamwene, nukuti, " Nanthi umunthu uyu akabanaga mughonela, nge amumenye sona nakabela ka mwanakazi uyu yo akumukola, ukuti munanzi,'' ⁴⁰ U Yesu akamula sona nukunena kukwache akati, ''Simoni, indi nazimo izyakuti nene kukwako.'' Akati, ''Nena uti, Manyisi!'' ⁴¹ U Yesu akati, ''Umunthu yumo uwakongolesya indalama kaba nabakongoloa babili. Yumo akakongola amadenali fayivi handilede (500), sona uyunji fifite (50). ⁴² Bo agha batakumulipila, akabahobokela bonsi. Po ilelo, Ka wewenu mu aba yo angamughana nkhani?'' ⁴³ U Simoni akamwamula akati, ''Nkhwinong'ona ukuti yo akamuhobokela izinji.'' U Yesu akati kukwache, ''Wamula ubwanaloli.'' ⁴⁴ U Yesu akang'namuka ku mwanakazi nukunena kwa Simoni, ''wa mulinga u mwanakazi uyu. Nkhinjila mu nyumba yako. Utakampha aminzi ghakusukusula mu vinama, anyesya ivinama vyane na masinzi sona ampuphuta ni sisi lyache. ⁴⁵ Utakamfyomphapo, loli ukufuma mu kabalilo ko twinjilile muno atalekitepo pakumfyompha. ⁴⁶ Mutapakitepo umutu wane amafuta, loli umwanakazi uyu apaka ivinama vyane na mafuta. ⁴⁷ Polelo nkhunena kukwinu, imbibi zyache, zyo zyali zinji, zyahobokeliwa---pakuti angana nkhani. Loli yumo yo ahobokeliwa panandi, angana panandi.'' ⁴⁸ Po akanena ku mwanakazi, ''Imbibi zyako zyahobokeliwa.'' ⁴⁹ Bonsi bo akalyanga nabo bakanda pakunenanena bene, ''Ka wewenu uyu yo akuhobokela imbibi?'' ⁵⁰ Po u Yesu akanena ku mwanakazi, ''Ulwitiko lwako lwakupoka. Buka mu mutende.''