¹ Vikabombiwa bo u Yesu anda pakwenda pavyungulila amalo agha pambanapambana mukaya akakulu sona namukaya uukulumbilira sona nukufisya ubunthenga ubwiza ubwakufumamila ku chinamwene cha kwa Chala. Bala 12 bakaba nawe. ² Ngati moumwanakazi yumo yo akapoziwa numuzi umubibi sona amatenda, Umary yo bakatingi magadalena, ukufuma ku vibanda seveni vikafumamo. ³ U Johani umukazi wa chuza, ubwana wa Helodi u sana nabanji sona nabo vyovikulondiwa. ⁴ Ibumba lya bantu likiza, kukwache ukufuma mutwaya utwakulekanalekana, akanena ichili: '' ⁵ Umulimi akabuka pakupesa imbeyu. bo akupesa, zimo zikawanga mnzila mumo zikakanyiwanga nivinama sona niviyuni vyakumwanya vikasebanga. ⁶ Zimo zikawanga mumabwe, loli bo zikumera, zikumilanga chifukwa zitakaba pa muvundo. ^{7 8} Yimo yikawanga muminga, sona imyunga yikanda pakukulila poka nimbeyu po imbeyu yika fyululuka. Yimo yikawa pilyongo iliza sona yikakula nukupapa ka handiredi '' Bo uyesu amazwi akitizya, '' yuyo ali namakutu ivwe.'' ⁹ Abamanyili bakamubuzikizya vyo ichili chikung'anamula. ¹⁰ Akati, ''Nukumanya kwa chinsinsi cha buchinamwene bwa Chala abapile umwe, loli ku bamo nkunena mu vili, bakulolela loli batakulinga, bakwivwa loli batakwivwisya.' ¹¹ Chino chocho ching'anamulo cha chili: Imbeyu gho mazyu gha Chala. ¹² Bala aba munzila bo bala bo bakwivwa, loli po u satana akwiza nukusenda amazyu mu myoyo yabo,po tebasubaliwa sona nu kupokiwa. ¹³ Iya mu mabwe bo bala, bo bivwa amazyu, bakaghapokela nu kusekelela. Loli ghate ni misisi; bakusubalila panandi bwaka, pa kabalilo kakuyeziwa bakuwa. ¹⁴ Imbeyu yo yikawa mu minga bo bantu bala bakivwa amazyu, loli bo bakwenda, bo bala bakukumbukila ni vyabomba, bali ngati babaponola sona basubalila ivya kabalilo kano, sona ni chikomwa chitakwela. ¹⁵ Loli imbeyu yo yikawa mu lyongo iliza, aba bo bala bo, bakivwa amazyu nubwanaloli sona ba myoyo imiza, nukughakola akiza nukupapa ivikomwa iviza nu kwikola. ¹⁶ ''Nayumo yo akukozya ukoloboyi nu kuyikupikila pamo ukuyibika ku ntende kwa bedi. Nukulusya, ukubika ukoloboyi po akubanga nukuti wensi yo akwnjila alingenge ubwelu. ¹⁷ Pakuti pate nachimo ichakufisiwa chikwiza ukuvumbukwa, nachimo cho chifisamite chitangapangiwa ukuti chimanyikwe sona chize pa bwelu. ¹⁸ Mwivwisye hee, ku bo bali navyo ivinji, bakwiza ukumupa umwene, loli kwa yo ate navyo, napo vyo atakwinong'ona vikwiza pakusendiwa ukufumia ku kwache.'' ¹⁹ Po umama wache na ba wamwabo bakiza ku kwache, loli batakayanga papipi nawe chifukwa cha bumba. ²⁰ Akabuziwa ukuti,'' Umama wako na ba wamwinu bimilile panzi, bakukulindilila.'' ²¹ Loli u Yeso akamula nukuti ku kwabo, '' Umama wane na ba wamwitu bo bala bo bakwivwa amazyu gha Chala sona nukughabomvya.'' ²² Po isiku limo akakwela mu bwato na bamanyili bache, sona akati kukwabo, '' Twende tubuke ku mbali iyinji iya nyanja.'' Bakanozya ubulendo. ²³ Loli bo bakwenda akaghona utulo. Imphepo iybibi yikafika pa nyanja, sona nu bwato bukanda pakwizula na minzi, sona vitakaba ichete. ²⁴ Po abamanyili ba Yeso bakiza kukwache nukumunyamusya,''Songo! Songo! Tuli pakufwa. Akanyamuka nukuyimika imphepo sona nukubandamisya inyanja yikaleka sona kukaba umutende. ²⁵ Po akati kukwabo, ''Ka ubwanaloli bwako buli kwi?'' Loli bakoghopa sona nukuswigha, sona bakabuzikizania,''Ka po wewenu uyu, yo akulamula imphepo na minzi sona vikumwivwa?'' ²⁶ Bakabuka ku kaya aka Gerasenes, ko kali ukupululila ukufuma ku Galileya. ²⁷ Bo u Yeso isika pansi, akakomana nu muntu yumo yo akafuma mukaya akakulu yo akaba nivimphepo ivibibi. Pakabalilo akatali atakavwalanga imyenda, sona atakikalanga mu nyumba loli mukasi mu tuma pumpha. ²⁸ Bo amulolela u Yeso, akalila nukuwa pansi sona nukuti, na mazyu aghakukola, ''Ka ukulonda ukuti umbombele ichoni, Yeso, Mwana wa Chala umukulu? Nkukulenga, utakamvulazye.'' ²⁹ Pakuti u Yeso akalamula umuzimu umubibi ukuti ghifumemo mwa muntu. Pakuti utubalilo utwinji vikamuleka, napo buli bakamupinya nu cheni nukumubika mu gadi, akadumula u cheni sona akwiza ukusendiwa ni vimphepo ivibibi nukuya mu nkholongo. ³⁰ Po u Yeso akamulalusya, ''Ka izina lyako wewenu?'' Akati, ne ''Legion,'' pakuti ivibanda vikamwnjila. ³¹ Bakamupepeka ukuti manye abatume ku chisi. ³² Ichimo ichikulu icha ngulube chikabako chakalyanga mu mbali mwa chipili. Po ivibanda vikamulenga ukuti viye mulanyene, po akavitikizya. ³³ Po ivibanda vikafuma mu muntu yula nukuya mu ngulube, po ichimo chila chikasamala ukughulumuka ichipili ukuya mu nyanja sona zikadwiba ³⁴ Po bala bo bakadimanga ingulube balinga ivi vikubombwa, bakasamala nukuya pakubabuzya abanthu mu chikaya na kukaya. ³⁵ Po abanthu bakabuka nukuya pakulinga cho chabombwa, bakiza kwa Yeso sona bakamwagha nu munthu yo ivibanda vyafuma mu mwache. Ikalite ku vinama kwa Yeso, avwete sona na minong'ono amiza; po bakaba nu bogha. ³⁶ Po ku bo bakalinga ivi bakababuzya mo umnthu wa vibanda apolela. ³⁷ Po abanthu bonsi aba mu chikaya cha Gerasenes bakamubuzya u Yeso ukuti afumepo papabo, pakuti bakiza bakoliwa nu bogha ubukulu. Po akakwela mu bwato nukunyokela. ³⁸ Umunthu yula yo ivibanda vikafuma mumwache akamulenga ukuti abukenge nawe, loli u Yeso akamubwezya,nukuti, ³⁹ ''Nyokela ku nyumba kwako sona uye unene namaka pa vyo u Chala akubombela.'' Umunthu akabuka kukwabo, nukunena vyonsi mu chikaya vyo u Chala amubombela. ⁴⁰ Po bo u Yeso anyokela, ichilundilo chikamupokela, pakuti bonsi bakinong'onanga yuyo. ⁴¹ Linga, umunthu yo we Yayilo, yo akaba we yumo wa balingilili ba mu ma sinagogi, akiza nukuwa pansi mu vinama vya Yeso nu kumulenga ukuti abuke ku nyumba kwache ⁴² chifukwa umwana wache mwene umwanakazi, umulindu wa myaka twelovu, akaba papipi ukufwa. Bo u Yeso ali munzila, ibumba likamuzyungulila nukuvigana nawe. ⁴³ POumwanakazi yumo akaba palanyene yo akafumanga idaba ku myaka twelovu nukutaya indalama, po atakapozyekapo nu munthu yumo. ⁴⁴ Akiza kwisinda kwa Yeso nukukola ku bumalilo bwa lilaya lyache, aponyene idaba likaleka ukufuma. ⁴⁵ U Yeso akati, ''Ka wewenu yo ankhola?'' Bo bonsi bakana, u Peteli akati,''Songo, ibimba lya banthu bakuzyungulile nukuti bakukuviga.'' ⁴⁶ Loli u Yeso akati, ''Yumo ankhola, pakuti namanya amaka ghafumamo mumwane.'' ⁴⁷ Bp umwanakazi amanya ukuti atangatoloka, akanda pakutetema nukuwa pa nthazi papache. Pa banthu bonsi bo balipo nukunena cho amukolile sona namo apolela. ⁴⁸ Po akanena kukwache, ''Mwanakazi, ubwanaloli bwakupanga ukuti ube akiza. Bukanga mu mutende.'' ⁴⁹ Bo achili akunena, yumo akafuma mu sinagogi mu nyumba ya mulingilili, nukuti, ''Umwana wako umwanakazi afwa. Utakamutamyenge u Yeso.'' ⁵⁰ Loli bo u Yeso ivwa ivi, akamwamula u Yayilo, '' Utakoghope; subila, inthi apole.'' ⁵¹ Bo afika pa nyumba, atakitikizya nayumo ukuti injile nawe, mwene u Peteli, Yohani nu Yakobo, sona nu tata wa mwana nu mama wache. ⁵² Po bonsi bakalilanga, loli akati, ''Mutakalilenge; atafwile loli aghonite bwaka.'' ⁵³ Bakamusekela, abene bamenye ukuti afwile. ⁵⁴ Loli akamusenda pakumukola pa nyobe nukupunda, nukuti, ''Mwana, nyamuka!'' ⁵⁵ Umuzimu wache ghukanyokela, po akanyamuka aponyenaponye. Akabatuma ukuti bamupe chimo ichakuti alye. ⁵⁶ Abapapi bache bakaswigha, loli akababuzya ukuti manye bamubuzye nayumo.