¹ Po u Pilato akamusenda u Yesu nukumusyempa. ² Aba silikali bakaluka ichisote cha minga. Bakachibika ku mutu wa Yesu nukumuvwika amalaya gha pepo. ³ Bakiza kukwache nukunena ukuti, ''Tukulinge,Mwene wa ba Yuda!'' sona nukumuma na mapi. ⁴ Po u Pilato akafuma sona kunzi nukunena kukwabo, ''Lolela, nkhubafumizya kunzi ukuti mumanye ukuti nthakuchaghamo ichifukwa nachimo ichibibi mumwache.'' ⁵ U Yesu akafuma kunzi,avwete ichisote cha minga na malaya gha pepo. U Pilato akababuzya akati, ''Lolela, umunthu yula uyu!'' ⁶ Bo abaputi abasongo bamulinga u Yesu, bakakolomoka nkhani bakati, ''Mupayike, Mupayike!'' U Pilato akati kukwabo, ''Musende mwebene nukumupayika, pakuti une nthakumwagha ni chifukwa nachimo.'' ⁷ Aba Yuda bakamwamula bakati, ''Tuli ni ndaghilo, ukukonkha indaghilo abaghile pakufwa chifukwa akisenda mwene ukuti mwana wa Chala. ⁸ Bo u Pilato ivwa amazwi agha, akaba nu bogha nkhani, ⁹ sona akinjila mu nymba inkulu iya boma nukuti kwa Yesu, ''Ka ukufumila kwiyi?'' Loli u Y esu atakamwamula. ¹⁰ Po u Pilato akanena kukwache akati, ''Ka utakunamula? Utazimenye ukuti indi nu bwabuke bwakukusatula, sona indi na maka aghakukupayikila?'' ¹¹ U Yesu akamwamula akati, ''Utangaba na maka naghamo papane, ukulusya ukuti upeghiwe amaka agho. Pa chifukwa ichi, yo ampelekite kukwako weyo ali nukunanga ukukulu.'' ¹² Akamulile aka, u Pilato akalonda ukuti amusatule, loli aba Yuda bakakolomoka nkhani nukuti, ''Nanthi ukumusatula umunthu uyu bo te we munyantche wa Kesali. Wensi yo akwisenda ukuti we mwene akususania nu Kesali.'' ¹³ Bo u Pilato ivwa amazwi agha, akamufumya u Yesu kunzi nukwikala pa chitengo icha kulongela inongwa cho chikwitiziwa ''Ichitengo cha bulongelo,'' loli mu neno ya Chilamayiki ghakwitiziwa ''Gabata.'' ¹⁴ Likaba lisiku lya kunozyekela ulusekelo lwa Pasa, akabalilo ka i awala lya nambala sikisi. U Pilato akababuzya aba Yuda akati, ''Linga, Umwene winu uyu!'' ¹⁵ Bakakolomoka, ''Mufumyepo, Mufumyepo; nukumupayika!'' U Pilato akati kukwabo, ''Kamupayike uMwene winu?'' Umuputi usongo akati, ''Tu te nu mwene loli u Kesali.'' ¹⁶ Po u Pilato akabapa u Yesu ukuti bamupayike. ¹⁷ Bakamusenda u Yesu, nukufumapo nawe, anyamwile i mphinjika yache, nukuya ku malo gho ghakwitiziwa ukuti ''Malo gha lifupa wa mutu,'' muneno ya chi Alamayiki ghakwitiziwa ''Gologota.'' ¹⁸ Bakamupayika uYesu palanyene, na banthu abanalume babili, yumo ku mbali iyinyabo, po u Yesu pakasi. ¹⁹ U Pilato akasimba ichikwangwani nukuchipamanthila pamwanya pa mphinjika. Akasimba ukuti: U YESU WA KU NAZALETI, UMWENE WA BAYUDA. ²⁰ Abinji aba Yuda bakabelenga amazwi gho ghakasimbiwa pa chikwangwani chifukwa amalo gho u Yesu akapayikiwa pakaba papipi na kaya akakulu. Ichikwangwani chikasimbiwa mu chi Alamayiki, mu chi Latini, sona na mu chi Giliki. ²¹ Usongo uwa baputi waba Yuda akamubuzya u Pilato akati,''Utakasimbe, ukuti 'UMwene waba Yuda,' loli uti, 'Uyu akatinji, ''we Mwene waba Yuda.''''' ²² U Pilato akamula akati.'' cho nasimba nasimba.'' ²³ Po abasilikali bakamupayika u Yesu, bakasenda ivyakuvwala vyache nukuvigba pa folo, wensi ichigaba ichache; Bakasenda sona umukanjo gho ghutakabapo nulusono, gho ghukaba nu lusono loka ukufuma pamwanya. ²⁴ Bakanenezania, ''tutakazepulanie loli tupange amayele tulinge yo inthi ghube wache.'' Ivi vikachitika ukuti amasimbo ghafisiwe aghakuti, ''bakagabana ivyakuvwala vyane nukupanga amayele pa malaya ghane.'' Ivi vyovyo abasilikali bakabomba. ²⁵ Pambali ni mphinjika ya Yesu pakimilila umama wache, umunyabo wa mama wache, u Maliya umwanakazi wa Kilewopasi nu Maliya Magadalena. ²⁶ Bo u Yesu alinga u mama wache akati, ''Mwanakazi, linga, uyu mwana wako!'' ²⁷ Akanena sona ku mumanyili, ''linga, Uyu we mama wako!'' Pakufuma pakabalilo kala umumanyili akamusenda umwanakazi yula nukuya nawe ku nyumba yache. ²⁸ Po pala, bo amanya ukuti vyonsi vyamala po vibombwe vyo amasimbo ghakanena, u Yesu akati, ''Indi ni nyota.'' ²⁹ Palanyene pakaba ichivugho cha bala yo asasite, bakadwibika i sipanchi mu bala uwakusasa yula nukuyikulunga kwi tete nukuyikwezya nukumubika pa mulomo wache. ³⁰ Bo u Yesu ang'wa u bala uwa kusasa yula, akanena akati,''Kwamala.'' Akinamila u mutu nukupeleka kumwanya u muzimu wache. ³¹ Pakuti aba Yuda, chifukwa likaba lisiku lya kunozyekela, nukuti imibili yila yitangaba pa mphinjika pi siku lya Sabata (pakuti Sabata likaba lisiku lya kuchindikiwa) bamulenga u Pilato ukuti bapyole ivinama vyabo nukubafumyapo. ³² Po abasilikali bakiza nu kupyola ivinama ivya munthu uwabwandilo sona ni vya munthu uwa bubili bo bakapayikika poka nu Yesu. ³³ Bo bafika pa Yesu, bakagha ukuti afwile kale, po bakapotwa pakupyola ivinama vyache. ³⁴ Loli, umusilikali yumo akamulasa u Yesu mulubazu ni mphalala, sona aponyene idaba na minzi vikapololoka. ³⁵ Yumo yo akalinga ivi vikabombiwanga akabikila ubukaboni, ukuti ubukaboni bwache bwa bwanaloli. Akamanya ukuti vyo akanena vya bwanaloli ukuti nuswe twivwile. ³⁶ Vyonsi ivi vikabombiwa ukuti amasimbo ghafisyike, ''Te pakabepo ifupa lyache lyo inthi likapyoliwe.'' ³⁷ Sona,amasimbo aghanji ghakuti, ''Bakwiza ukumulinga yo akamulasa.'' ³⁸ Pisinda pa vyonsi ivi, pakiza u Yosefe wa ku Alimateya, yo akaba mumanyili wa Yesu( mwabufisamu pakuti akoghopanga aba Yuda) akamulenga u Pilato nanthi angamwitikizya ukufumyapo umubili wa Yesu. U Pilato akamwitikizya po u Yosefe akafumyapo umubili ghula. ³⁹ Pakiza sona u Nikodemu, yo isiku limo akabukapo ubusiku kwa Yesu. Akanyamula amafuta aghakongania agha mure nu alosi, ghakukwana pamo amalita wanu handiledi. ⁴⁰ Po bakasenya umubili wa Yesu nukuvunga mu myenda po nivyakununkhila, pakuti ghukaba muteto wa ba Yuda pakasilile ka mivimba. ⁴¹ Papipi napo bakamupayika pakaba umunda; Mu munda ghula mukaba iphumpha limo ilipya lyo batakasilamo nu munthu nayumo nayumo. ⁴² Chifukwa chakuti likaba lisiku lya ba Yuda lyakunozyekela sona iphumpha lyope likaba papipi, bakamusila u Yesu mulanyene.