¹ Pakabalilo bo u Yesu anena amazwi agha, akafumapo na bamanyili bache nukuya ku mbali iyinyabo iya chikombe cha Kidiliyoni, ko kukaba umughunda gho u Yesu na bamanyili bache bakikalangamo. ² Po u Yudasi, yo akaya pakumupeleka mu balwani, wepe akaghamanya amalo, pakuti akabalilo akinji u Yesu akakomananga kulanyene na bamanyili bache. ³ Pala u Yudasi, akatanjilila abasilikali aba nkhondo na bamo mwa basongo ukufuma ku baputi abasongo na ba Falisi, bakabuka kula banyamwile inyale , ivikoka ni vilwilo. ⁴ Po u Yesu, akamanya ivinthu vyonsi vyo vikamuchitikilanga, akimilila pabwelu nukubalalusya, ''Ka mukulonda uwenu?'' ⁵ Bakamwamula bakati, ''U Yesu uwa ku Nazaleti.'' U Yesu akanena kukwabo, ''une.'' U Yudasi, yo akamupeleka ku balwani, wepe akimilila papipi na ba silikali. ⁶ Bo anena kukwabo ati, ''Une,'' abene bakanyokela mwisinda nukuwa pansi. ⁷ Akabalalusya sona akati, ''Ka mukumulonda uwenu?'' Bakamula sona bakati, ''U Yesu wa ku Nazaleti.'' ⁸ ' U Yesu akabamula akati , ''Mbabuzizye kale ukuti unee.Po nanthi mukundonda, baleke aba babukenge.'' ⁹ Akati vileke vibombwe ukuti amasimbo ghafisyike gho akanena: ''Pa bonsi bo mukampha tatayitepo nayumo.'' ¹⁰ Po u Simoni Petulo, yo akaba nu Panga, akamufumya nukudumula ikhutu lya kunyobe iya ndyelo iya mubomba mbombo wa muputi usongo. Izina lya mubomba mbombo yula akaba we Malikusi. ¹¹ U Yesu akanena kwa Petulo akati, ''Nyosezya mumo u Panga mo abaghile ukuba. Ka nthakang'we u komeji yo u Tata amphile?'' ¹² Ichubukatila cha basilikali ba nkhondo poka nuwa kutanjilila wabo, na basongo ba ba Yuda, bakamukola u Yesu nukumupinya. ¹³ Pabwandilo bakabuka nawe kwa Anasi, pakuti akaba we wisevyala wa Kayafa, yo akaba we muputi usongo umwaka ghula. ¹⁴ We Kayafa yo wabamo yo akababuzya aba Yuada ukuti chizapo umunthu weka afwe mubuyo mwa banthu bonsi. ¹⁵ U Simoni Petulo akamukonkha u Yesu, na yumo umumanyili. Umumanyili yula akaba wakumanyikwa kwa muputi usongo, bakinjila nu Yesu mumalo aghakulongela inongwa kwa muputi usongo; ¹⁶ loli u Petulo akimilila kunzi pa mulyango. Umumanyili uwakumanyikwa nu muputi usongo,akafuma kunzi nukunena nu malonda wa pamulyango, ukuti amwinjizye mukasi u Petulo. ¹⁷ Po umulindu uwa mbombo, umalonda wa pamulyango, akati kwa Petulo, ''Ka te we wabamo wabamanyili ba munthu uyu?'' Akamula akati, ''Tenene awe.'' ¹⁸ Po abambombo nabasongosongo bakimilila pamalo ghala, bakapemba umoto wa malasha, pakuti kukatalala, bakilungizyanga bene. U Petulo akaba nabo, akimilila palanyene nukwilunguzya mwene. ¹⁹ Po umuputi usongo akamulalusya u Yesu ivya bamanyili bache navyo akamanyisyanga. ²⁰ U Yesu akamwamula akati, ''Une nkhanenanga pabwelu ku chisu. Nkhamanyisyanga utubalilo utwinji mumalo ghakwiputilamo na mu ma tempeli mo aba Yuda bonsi bakabungananga. Nthakanena nachimo ku bufisamu. ²¹ Ka choni cho mukundalusya? Balalusye bo bakivwanga vyo nkhanenanga. Lolela, abanthu aba bamenye vyo nkhanena.'' ²² Bo u Yesu anena ichi, uwa bamo waba songosongo yo akimilila pala akamung'apa u Yesu ulupi nukunena ukuti, ''Ka momo ungamulila umuputi usongo?'' ²³ U Yesu akamwamula akati, ''nanthi namula ,akabibi, nena ububibi bwache loli nanthi namula akiza, choni cho ukung'apa?'' ²⁴ Po u Anasi akamutuma u Yesu kwa Kayafa umuputi usongo mo bamupinyile ²⁵ Bo u Simoni Petulo imilile nukwilunguzya. Abanthu bakanena kukwache, ''Ka te we wabamo wa bamanyili bache?'' Akakana nukunena ukuti, ''Awe tenene.'' ²⁶ Yumo uwa babomba mbombo ba muputi usongo, yo akaba mukamu wa munthu yo u Petulo akamudumula ikhutu, akati, ''Ka nthakakulinga mu munda nawe?'' ²⁷ Loli Petulo akakana sona; aponyene umukolwe akakokolika. ²⁸ Po bakamusenda u Yesu ukufuma kwa Kayafa nukuya nawe ku nyumba inkulu iya boma. Pakaba pandabindabi batakinjila mu nyumba inkulu iya boma ukuti batakakomanie umuteto wabo ukuti balye ulusekelo lwabo ulwa pa Pasa. ²⁹ Po u Pilato akafumila kunzi nukunena kukwabo nukuti, ''Ka chibibi buli cho mukumwagha nacho umunthu uyu?'' ³⁰ Bakamwamula bakati, ''nanthi atakabomba nachimo ichibibi, nge tutizite nawe kukwinu.'' ³¹ U Pilato akababuzya akati, ''Musende mwebene, nukumulonga kwakuyana ni ndaghilo zinu.'' Aba Yuda bakanena kukwache bakati, ''te chakubaghila kukwitu pakukoma u munthu.'' ³² Bakanena ichi ukuti amazwi gha Yesu ghakwanilisiwe gho akanena pakulangizya umutundu wa bufwe gho akwiza ukufwa nabo. ³³ U Pilato akinjila sona mu nyumba inkulu iya boma nukumwitizya u Yesu nukunena kukwache nukuti, ''Ka we mwene wa ba Yuda?'' ³⁴ U Yesu akamula akati, ''Ka ukunena ivi pa wemwene, pamo bamo bakubuzizye izyane?'' ³⁵ U Pilato akamula akati, ''Te ne mu Yuda, ka pamo nene? Abanthu baluko lwako na baputi abasongo bobo bakakubika kukwane. Ka ukapanga ichoni?'' ³⁶ U Yesu akamula, ''Ubumwene bwane te bwa pa chisu ichi. Nanthi ubumwene bwane bukabanga bwa chigaba cha chisu ichi, abambombo bane nge balwile ubwite ukuti nthakabikiwe ku ba Yuda. Loli ubumwene bwane te bwapano.'' ³⁷ U Pilato akanena kukwache, ''Ka we mwene ulu?'' U Yesu akamwamula akati, ''Ukunena pakuti ne mwene. Pa chifukwa ichi nkhapapiwa, sona pa chifukwa nkhiza pa chisu, ukubika ubu kaboni ubwa bwanaloli. Wensi yo ali mu bwanaloli akwivwa amazwi ghane.'' ³⁸ U Pilato akamulalusya, ''Ka ubwanaloli chochoni?'' Bo alalusya amazwi agha, akafumila sona kunzi nukuya ku ba Yuda nukunena kukwabo nukuti, ''Une nthakuchaghapo ichibibi nachimo mumwache. ³⁹ Loli muli nakasolo kinu akakuti mbasatulile umunthu yumo mwa bapinyiwa pa kabalilo ka lusekelo lwa Pasa. Ka po mukulonda ukuti une mbasatulile umwe umwene wa ba Yuda?'' ⁴⁰ Bakakolomoka nkhani nukunena ukuti, ''Uyo awe , loli u Balaba.''Yo akaba wakukoma.