¹ Nanena ivinthu ivi kukwinu ukuti mutakawe. Bazukubatayila kunzi kwa nyumba zya kwiputilamo. ² Loli akabalilo kakwiza ku wensi yo akubakoma umwe azukulinga ngati akubomba imbombo ya Chala. ³ Bazukubomba ivinthu ivi chifukwa chakuti batamumenye u Tata pamo nune. ⁴ Nanena ivinthu ivi kukwinu ukuti nanthi akabalilo kabo kiza, muzukukumbuka pakuti nkababuzya inkhani zyabo. Nthakababuzya ivinthu ivi pabwandilo chifukwa chakuti nkhaba numwe. ⁵ Loli ulu nkubuka kwa yo akanthuma, loli nayumo mwa umwe yo akundalusya ukuti, 'Ka ukuya kwiyi? ⁶ Loli chifukwa chakuti nanena ivinthu ivi kukwinu, ichitima chizulu mu myoyo yinu. ⁷ Loli naloliloli nkubabuzya, chiza kukwinu ukuti une mfumepo. Pakuti nanthi nthafumapo, umuhobosyu bo te ize kukwinu, loli nanthi nabuka, nkwiza ukubatumila umwe. ⁸ Nanthi iza, umuhobosyu akuzukusimikizya ichisu ukuba chinanzi, ukuyana nu bugholosu, sona nu bulongelo---- ⁹ ukuyana ni mbibi, chifukwa batansubile une,' ¹⁰ ukuyana nu bugholosu, chifukwa nkuya kwa Tata, ukuti te mukandingepo sona,' ¹¹ sona ukuyana nu bulongelo, chifukwa umulamulili wa chisu ichi alongiwe. ¹² Indi ni vinthu ivinji ivyakunena kukwinu, loli mutangavivwisya akabalilo kano. ¹³ Loli nanthi umwene, u Muzimu uwa Bwanaloli, iza, akwiza ukubalangizya ku vya bwanaloli, pakuti ghutakuzukunena pa wene. Loli azukunena vyonsi vyo ivwile, sona nukubabuzya ivinthu vyo inthi vizenge. ¹⁴ Akuzukuntchindika une,chifukwa azukusenda vyo vyane nukubabuzya ivyo umwe. ¹⁵ Vyonsi vyo u Tata ali navyo vyane. Polelo, nkunena ukuti u Muzimu ghukusenda vyo vili kukwane sona nukubabuzya umwe. ¹⁶ Mukabalilo akanandi bwaka te mukandinge sona une, mukabalilo sona akanji akanandi bwaka muzukundinga.'' ¹⁷ Po bamo mwabamanyili bache bakanena kwa weka nu yunji, ''Ka chochoni ichi cho akunena kukwitu, 'Akabalilo akanandi bwaka te mundingepo, sona akabalilo akanji akanandi bwaka inthi mundinge,' sona, Chifukwa nkubuka kwa Tata'?'' ¹⁸ Polelo bakati, ''Ka chochoni ichi cho akunena,'Pakabalilo akanandi bwaka'? Tutakuchumanya cho akunena.'' ¹⁹ U Yesu akabalinga ukuti bakulonda ukumulalusya, po akati kukwabo, ''Ka ivi vyovyo mukulalusania cho nkung'anamula pakunena, 'Mu kabalilo akanandi bwaka te mwize mundinge nukuti sona mukabalilo akanandi bwaka inthi mwize mundinge'? ²⁰ Naloli, naloli, kubabuzya, muzukulila nukwilumbusya, loli ichisu chizuhoboka. Muzukaba mwe ba chitima ichikulu, loli ichitima chinu chizunyoka ukuba lusekelo. ²¹ Nanthi po umwanakazi akupapa akuba ni chitima chifukwa akabalilo kache kakwana, loli nanthi apapa umwana,atakukumbukila sona ububavu bwache chifukwa cha kuhoboka pakuti u munthu apapwa mu chisu. ²² Po umwe ulu muli ni chitima, loli nkuzukubalinga sona, po ni myoyo yinu yizukuhoboka, sona patalipo nayumo yo akuzukufumya ubuhobosu mu mwinu. ²³ Mwisiku ilyo te mukandalusye nachimo. Naloli,naloli nkubabuzya, nanthi mukulalusya chimo kwa Tata mwi zina lyane, akwiza ukubapa. ²⁴ Mpaka ulu mutalalusizye nachimo mwizina lyane. Lalusya inthi mupokele, ukuti ukuhoboka kwinu kufisiwe.'' ²⁵ ''Nanena ivinthu ivi kukwinu mu mazwi amakulu, loli akabalilo kakwiza ko nthazukunena sona mu mazwi amakulu, mumalo mwache nkwiza pakubabuzya pabwelu ukuyana ni vya Tata. ²⁶ Mwisiku lyo mukwiza ukulalusizya mwizina lyane sona nthakuzukunena kukwinu ukuti nkhuzukubiputila umwe kwa Tata, ²⁷ pakuti u Tata umwene abaghanite umwe chifukwa umwe munganite une sona munsubile ukuti nkafumila kwa Tata. ²⁸ Nkhafuma kwa Tata, sona po niza pa chisu. Po sona, nkuchileka ichisu sona nkuya kwa Tata.'' ²⁹ Abamanyili bache bakanena, ''linga, ulu uli pakunena pabwelu sona utakunenela mu mazwi amakulu. ³⁰ Ulu tumenye ukuti umenye ivinthu vyonsi, sona utakulonda nayumo ukuti alalusye chifukwa cha ichi, tukusubila ukuti ufumite kwa Chala.'' ³¹ U Yesu akabalalusya, ''Ka po ulu mwasubila? ³² Linga, akabalilo kakwiza, inga, sona naloli iza, po mukwiza ukunyampania, wensi pa nyumba yache, sona muzukundeka ne mwene. Loli te imbe nemwene loli u Tata alipoka nune. ³³ Nanena ivinthu ivi kukwinu, umwakuti mube nu mutende mu mwane. Mu chisu muli inthamyo, loli mujimbe, une napota ichisu.''