¹ Mutakaleke imyoyo yinu yitamiwe. Mo musubile mwa Chala, musubile na mumwane. ² Mu nyumba ya tata muli amalo aminji. Nanthi chitakabanga ngati ulu, nge nababuzya, pakuti nkubuka nkuya pakubayanizya amalo umwe. ³ Nanthi nabuka pakuyania amalo ghinu, nkuzukwiza sona nukubapokela umwe kwa nemwne, mwakuti ko nkuya pakuba ko numwe mwize mubenge. ⁴ Muyimenye inzila yo unu nkuyako. '' ⁵ U Tomasi akati kwa Yesu,'' Mwene, tutamenyeko ko ukuya, ka tungayimanya bulibuli inzila?'' ⁶ U Yesu akamubuzya akati, ''Ne nzila, ne bwanaloli, sona ne bumi; Nayumo uwakwiza kwa Tata nanthi atendile mumwane. ⁷ Nanthi mukumanya une, nu Tata wepe mumumenye. Ukufuma ilelo ukuya kunthanzi mwamumanya sona mwamulimnga.'' ⁸ U Filipu akanene kwa Yesu, ''Mwene, tulangizye u Tata, mwakuti twikutisiwe.'' ⁹ U Yesu akamubuzya akati, ''Nalinji numwe akabalilo akatali hee kokuti nulu uchili utamenye une, Filipu? Wensi yo andinga une amulinga nu Tata. Ka unganena bulibuli, 'Tulangizye uswe u Tata?' ¹⁰ Ka mutasubilia ukuti indi mwa Tata sona u Tata ali mumwane? Amazwi gho nanena kwa umwe nthakunena kwakuyana namaka ghane, loli u Tata yo akwikala mumwane akubomba imbombo yache. ¹¹ Nsubila une ukuti indi mwa Tata, sona u Tata ali mumwane, munzila yimo musubile chifukwa cha mbombo zyene. ¹² Naloliloli, naloliloli, nkhunena ku kwinu, wensi yo akusubila mu mwane azukubomba imbombo zyo nkubomba, sona azu kubomba imbombo inkulu ukulusya zino chifukwa nkubuka kwa Tata. ¹³ Chonsi cho mungalalusya mwizina lyane, nkhuzukubabombela mwakuti u Tata ize achindikiliwemo mu Mwana. ¹⁴ Nanthi mukundalusya une chimo mwi zina lyane, nkuzukubomba. ¹⁵ Nanthi munganite, muzukusunga ikhomelezyo zyane, ¹⁶ sona nkuzukwiputa kwa Tata, azukubapa umuhobosu uyunji ukuti ize abenge numwe bwile--- ¹⁷ umuzimu wa bwanaloli. Ichisu chitangamupokela chifukwa chitakumulinga pamo ukumumanya. Loli umwe mumumenye, pakuti akwikala numwe sona inthi abenge mu mwinu. ¹⁸ Nthakuzukubaleka mwebene; NKuzukunyokela sona kukwinu. ¹⁹ Loli mukabalilo kakuchepa ichisu te chikandinge sona. loli umwe inthi mungandinge. Chifukwa nu mumi, numwe inthi mubenge bumi. ²⁰ Pisiku ilyo inthi mukamanye ukuti indi mwa Tata, sons ukuti umwe muli mumwane, sona nune indi mu mwinu. ²¹ Wensi yo ali nkhomolezyo zyane sona akuzisunga weyo anganite une, sona wensi yo anganiye une azukughaniwa nu Tata, sona nkhuzukumughana nukwilangizya nemwene kukwache.'' ²² U Yuda (ye te we Sikaliyoti) akati kwa Yesu, ''Mwene, ka vyaba bulibuli ukuti mwilangizye mwebene kukwitu kwene loli ku chisu hagha?'' ²³ U Yesu akamula sona akanena nawe, ''Nanthi yo anganite une, azukusunga amazwi ghane. U Tata wane azukumughana, sona tuyukwiza kukwache nukuzukupanga akaya kitu nawe. ²⁴ Yo atanganite une atakusunga amazwi ghane. Izwi lyo mukulivwa litakufuma mumwane loli kwa Tata yo akanthuma une. ²⁵ Nanena ivinthu ivi kukwinu, po nchili indi numwe. ²⁶ Nanga buli, u Muhobosu---u Muzimu Umuswepu gho u Tata inthi ize atume mwizina lyane---- yo akwiza pabambanyisya vyonsi sona azukubakumbusya vyonsi vyo nkanena numwe. ²⁷ Nkubalekela umutende; Nkubapa umutende wane. Nthakubapa ngati mo ichisu chikupela. Mutakaleke imyoyo yinu yitamiwe sona yitakoghope. ²⁸ Mukivwa ukuti nkanena kukwinu, ' Une nkufumapo, sona nkuyu kwiza sona kukwinu.' Nanthi mukangana , nge mwaghoboka chifukwa nkuya kwa Tata, pakuti u Tata mukulu ukulusya une. ²⁹ Ulu nababuzizya nzila bo chitabombiwe, ukuti nanthi chabombiwa muzukusubila. ³⁰ Tenene sona ivinji numwe, pakuti umulamuli wa chisu ichi akwiza. Ate namaka naghamo papane, ³¹ loli mumalo mwakuti ichisu chimanye ukuti une mughanite u Tata akandamulila une. Zanga tunyamuke twebonsi tufumepo pano.''