¹ Paulo, umutumiki wa yesu kilisitu ukwendela mu bwighane bwa Chala, ku banthu aba Chala abaswepu mu efeso, babo ba lwitiko mwa kilisitu Yesu. ² Ichisa ku kwinu sona nu bufwase ukufuma kwa Chala u Baba sona na kwa mwene yesu kilisitu. ³ Leka u Chala sona u Baba wa Mwene withu Yesu Kilisitu apaliwenge, yo atusayite uswe ni nsayo zya muzimu nu buyo bwa kumwanya mwa Kilisitu. ⁴ U Chala akatusala uswe mu mwache ukufuma pabwandilo bwa chisu, ukuti tube ba swepu sona basita kafukwa pa maso ghache mu lughano. ⁵ U Chala akatusala uswe bo achili atatufumizye ukuba bana ukwendela mwa Yesu Kilisitu, ukuyana nu bwiza bwa kuhobosya kwa bwighane bwache. ⁶ Ilyamuko lya kusenyiwa mu mapalo gha buchindamu bwachisa bubo atupile uswe pa bwaka mu weka mo atughanite. ⁷ Mwa Yesu Kilisitu tupokiwe ukwendela mwa daba wache sona nuluhobokelo lwa mbibi, ukuyana nu bukabi bwa chisa chache. ⁸ Akongolezya ichisa chache papitu na mahala ghonsi sona nukwivwisya. ⁹ U Chala akatumanyisya uswe ivyakufisiwa mu bwighane bwache, ukuyana navyo vikamuhobosya, sona navivyo akabonesyela mwa Kilisitu, ¹⁰ nulubatiko lwa kasenganizye mu bwinji bwa kabalilo, pakuleta ivinthu vyonsi poka, ivinthu vyonsi ku mwanya sona na pansi, pansi pa mutu ghoka, nayo Kilisitu. ¹¹ Mwa Kilisitu tukasaliwa ukuba ba mphyana.tukinong'oneliwa ukuba munyobe zyache ukuyana nimbatiko zyache yo akabomba ukuyana nukulonda kwa bwighane bwache. ¹² U Chala akatusala uswe ukuba ba mphyana ukuti uswe, ukuba ba bwandilo ukusubila mwa Kilisitu, mwakuba ba kumupala mu buchindamu bwache. ¹³ Mwa Kilisitu, nuwe bwaka, nanthi wivwile izwi lwa bwanaloli, ubulumbilili bwa bu pokwa bwako, usubile mu mwache sona nukwighaliliwa nu lufingo lwa muzimu ughuswepu, ¹⁴ ghugho chikole cha kuphyana kwitu mphaka tusende ubwabuke bonsi ubwa ichi, ku mapalo gha buchindamu bwache. ¹⁵ Pa chifukwa ichi, mwisinda monsi nkhivwa izya lwitiko lwako mwa Mwene u Yesu sona nu lughano lwako mu banthu bonsi aba Chala aba swepu, ¹⁶ Nthakulesizye pa kumupalizya u Chala ku kwako po nakutambula uwe mu nyiputo zyane. ¹⁷ Nkwiputa ukuti u Chala wa Mwene witu Yesu Kilisitu, u Baba wa buchindamu, azukupa uwe umuzimu wa mahala sona nu wa buvumbuzi mu bumanyi bwache. ¹⁸ Nkwiputa ukuti amaso gha moyo wako ghabe nu bumanyi, ukuti umanye mukusubila muyuyo akwitizizye uwe mubukabi bwa buchindamu bwa mphyana pakasi pa banthu ba Chala abaswepu. ¹⁹ Munyiputo zyane nkulenga ukuti mumanye ukupambania kwa bukulu bwa maka ghache panthanzi pa pitu bo bakusubila, ukuyana nakabombelo ka bukulu bwa maka ghache. ²⁰ Agha ghomaka ghakuyana bwaka gho u Chala akabomba mwa Kilisitu Yesu po akamuzusya ku bufwe nukwikala nawe ku nyobe yache iyandyelo kumalo gha kumwanya. ²¹ Akalite u Kilisitu pamwanya pa mabalamulili sona naba mazaza na ba maka naba kubomba ivinthu pa maka, sona nizina lyonsi lyo litambuliwe. U Kilisitu azkulamulila, temomukabalilo kano kene awe, loli na mu kabalilo ko ka kwiza. ²² U Chala abikite ivinthu vyonsi munthende mu vinama vya Kilisitu sona nukupeleka ku chipanga ukuba we songo mu vinthu vyonsi. ²³ I chipanga gho mubili wache, ubwizule bwa yuyo yo akwizuzya vyonsi mu vyonsi.