¹ Nkhukubuzya pa maso gha Chala sona na gha Kilisitu Yesu, yo akwiza ukulonga ivyabumi ni vya kufwa, sona ni chifukwa cha kwiza kwache sona nu bu mwene bwache: ² Lumbilila amazwi; mube bakwisengania na pakabalilo akabibi. Ubikusye, ubasusye, ubakazye, mu bololo bonsi sona na mukubamanyisya. ³ Pakuti akabalilo kakwiza ko abanthu bakwiza ukukana pakwivwisya ku vimanyilo ivyenecho. Mu malo mwache, bakwiza ukwibunganikila bene abamanyisi umwakuyana nu bwighane bwabo, bo bakunena vyo amakutu ghabo ghakunyenyela ukuti ghivwe. ⁴ Bakwiza ukuleka ukwivwa kuvya bwanaloli, sona bakwiza ukwivwilanga ku vili. ⁵ Loli uwe, ube wakunozyekela mu nyinong'ono mu kabalilo konsi. Ujimbe mu nthamyo; bomba imbombo ya bulumbilili; fisya imbombo yako. ⁶ Pakuti une mbaswefizye kale. Akabalilo kane akakufumapo kakwana. Nalwa inkhondo mubwiza nukwanilisya; ⁷ Namalizya umupikisano wane; Nasunga ulwitiko. ⁸ Imphumphu ya bugholosu yisenguliwe ukuba yane, yo u Mwene, umulongi umugholosu, azukumpha pi siku lila, sona te ko kukwane kwene hagha, loli na ku bonsi bo bakamughana mukuboneka kwache. ⁹ Bomba ubwiza nkhani ukuti mwize kukwane mwalubilo. ¹⁰ Pakuti u Demas andekite. Aghanite ichisu ichi icha ulu sona abukite ku Tesalonika. U Crescens ayile ku Galatiya, sona u Tito ayile ku Dalamatiya. ¹¹ U Luka mwene yo ali nune. Musende u Maliko ukuti mubuke nawe chifukwa chakuti wakulondiwa nkhani ku mbombo iyi. ¹² U Tychicus namutuma ku Efeso. ¹³ Ichakuvwala cho nkhachileka ku Troas nu Carpus, mwizenge nacho nanthi mukwiza sona na mabuku, nkhalinkhani ghala aghamakwela. ¹⁴ U Alikizanda umusyanaji asasizye ububibi ubwinji nkhani ubwa kukwamfania nune. U Mwene alimunyosezya ukuyana ni mbombo zyache. ¹⁵ Numwe sona muchebe nawe, chifukwa akususya pabukulu he amazwi ghitu. ¹⁶ Mukwitula kwane ukwabwandilo, atakabapo nayumo yo akaba nune. Mumalo mwache, wensi akandeka. Manye vize vibelengiwe pa kubasusya. ¹⁷ Loli u Mwene akimilila kumbali yane nukunkhazya ukuti, ukwendela mu mwane, amazwi ghabaghile ukuti ghalumbililiwe nkhani, sona ukuti bonsi abakunzi baghivwe. Sona nkhapokiwa ku mulomo wa nkhalamu. ¹⁸ U Mwene akwiza ukumpoka ku mbombo zyonsi izibibi sona akwiza ukunsunga mu bumwene bwa kumwanya. Kukwache kube ubuchindamu bwa bwile na bwile. Ameni ¹⁹ Ulamuke u Priscilla, u Aquila, sona ni nyumba ya Onesiphorus. ²⁰ U Erastus asyete ku Kolinti, loli u Trophimus nkhamuleka mulwale ku Miletus. ²¹ Bomba mwalubilo lubilo ukuti wize bo akabalilo aka lupepo katafikite. U Eulubus akubalamuka, wepe u Pudens, u Claudia, sona na bonsi aba wamwitu. ²² Leka u Mwene abe ni mizimu yinu. Leka ichisa chibe numwe.