¹ Uwe polelo, mwana wane, ube wakughoma mu chisa cho chili mwa Kilisitu Yesu. ² Ivinthu vyonsi vyo ukivwa ukufuma kukwane mukasi mwa bukamboni ubwinji, mubasubalile ku banthu abagholosu bo babaghile ukumanyisya sona abanji. ³ Tamiwa poka nune ngati wa nkhondo umwiza uwa Kilisitu Yesu. ⁴ Atalipo nayumo uwa nkhondo yo angabomba nanthi atanganikwa mu bumi ubu, umwakuti ahobosye ubwana wache usongo. ⁵ Sona, nanthi yumo akulwisya munyangalo, atakupota mpaka afisye indaghilo. ⁶ Chibaghile ukuti umulimi uwa kulimbikila weyo akuba wabwandilo pakupokela ichigaba cha vyakupokela. ⁷ Mwinong'one pa cho nkhunena, pakuti u Mwene inthi ize abape umwe ukwivwisya mu vyonsi. ⁸ Mukumbuke u Yesu Kilisitu, ukufuma ku lunyungu lwa Devedi, yo akazyusiwa ukufuma ku bufwe. Ichi chikuyana nu bulumbilili bwane, ⁹ cho chifukwa nkhutamiwa nukupinyiwa ni mpingwi ngati ne chigabenga. Loli izwi lya Chala litapinyiwe. ¹⁰ Polelo nkhwaghana na vyonsi ivi chifukwa cha bo basebiwe, ukuti bope bize bakabe ubupoki bubo buli mwa Yesu Kilisitu, nubuchindamu bwa bwile na bwile. ¹¹ Ubu bo bwanaloli ukunena ukuti: ''Nanthi twafwa poka nawe, po tukwiza ukuba bumi nawe. ¹² Nanthi twalimbikila, po tukwiza ukulamulila sona nawe. Loli nanthi twamukana, wepe akwiza ukutukana. ¹³ Nanthi tute nu lwitiko, umwene ali nu lwitiko, pakuti atangikana mwene.'' ¹⁴ Ubaghile ukubakumbusya ivinthu vyonsi ivi. Ubachenjezye pamaso gha Chala ukuti manye babe bakudalinkhana pa mazwi ; pate ichakwandulapo, sona chikutangwanisya bo bakwivwa. ¹⁵ Bomba ubwiza bwako ukwifisya wemwene kwa Chala ngati we mubombi wakubaghila, yuyo akumanyisya izwi lya bwanaloli. ¹⁶ Leka ukunena amazwi amabibi, ghagho ghangakutwala nkhani kunzila zisita u chala. ¹⁷ Ineno zyabo zikwiza ukusata ngati bo bulwale bwa cancer. Mukasi mumwabo muli u Hymenaeus sona nu Philetus, ¹⁸ bo basobelite nu bwanaloli. Bakuti ubuzyuke bubombiwe kale, sona bakunangania ulwitiko lwa bamo. ¹⁹ Napo buli, ulufula lwa Chala lukwimilila. Luli ni chimanyisyo ichi: '' U Mwene abamenye bo bache'' sona ''Wensi yo akutambula izina lya Mwene abaghile ukufumako ukwa kusita ubwelu.'' ²⁰ Pachikaya ichikabi mutalimo ivililo vya golide pamo u siliva. Muli bwaka ivililo vya makomo sona ni vyalyongo. Vimo mu ivi vibombelo vya muchinzi, vimo visita muchinzi. ²¹ Nanthi yumo akwiswefya mwene ukusita muchinzi, bo chililo cha muchinzi. Akubikiwa pa mbali, wakubaghilila kwa bwana wache, nukuti wakubaghiliwa pa mbombo inyiza. ²² Fumako ku vya lwangalo lwa vya chilumendo. Londa ubuswepu, ulwitiko,ulughano nu mutende ku bo bakumwitizya u Mwene ni myoyo imiza. ²³ Loli ukane ublunkhanu nukusita ukumanya amalalusyo. Mumenye ukuti vikupapa amadali. ²⁴ Umubombi wa Mwene atabaghile ukudalika. Mubuyo bwache abaghile ukwichindika mu vyonsi, abe wakumanyisya, sona uwa mutenga moyo. ²⁵ Abaghile abe mololo ukumanyisya bo bakumususya. U Chala lumo akubapa ukung'anamuka kuvya mahala gha bwanaloli. ²⁶ Babe nubwikazi ubwiza sona nukuleka ichipingo cha mulwani, po bakoziwe na yuyo chifukwa cha bwighane bwache.