¹ U Yahweh akanena kwa Aaron, '' uwe, na bana bako abalumendo, sona nuluko lwaba sekulu bako muzu kusenda imbibi zyonsi izya pa buyo ubuswepu. Loli uwe wemwene poka na bana bako abalumendo bako bakwiza ukusenda imbibi zyonsi zyo anangite wensi mu buputi. ² Kubanyankho bo uli nabo poka naku luko lwa Levi, uluko lwa basekulu bako, ubaghile wize nabo poka ukuti bakwavwe po uwe na bana bako abalumendo bakubomba pachitembe chalilaghano lya ndaghilo. ³ Babaghile babombe imbombo zyako sona nimbombo zya chitembe. Napo buli, batabaghile pakwiza ku pipi nachimo icha mu buyo ubuswepu pamo ichakukwamfania ni chighemo, po abene sona nuwe mukwiza pakufwa. ⁴ Babapghile babe poka nuwe pakubomba imbombo izyakukwamfania ni chitembe ichakomanilamo, izya mbombo yonsi iyakwamfyania ni chitembe. Umulendo atakize kupipi numwe. ⁵ Mubaghile mubombe imbombo zya buyo ubuswepu sona nizya chighemo ukuti ubukalale bwane butakize sona pa banthu baku Isreal . ⁶ Lolela, une nemwene nasala abanyinu abaluko lwa Levi ukufuma ku lunyungu lwa Isreal. Chabupi kukwinu, bapeghiwe kukwane ukuti mbombe imbombo iyakwamfania na mu chitembe chalukomano. ⁷ Loli uwe na bana bako abalumendo mubombe izya buputi bwa chonsi ichakukwamfania ni chighemo sona na chonsi ichamukasi mwa mwenda uwa kwighalila pa mulyango. Umwe mwe benecho mubaghile mukwanilisye imbombo izyo. Nkhubapa ubuputi ngati chabupi. Umulendo wensi yo apalamila ku pipi abaghile akomiwenge.'' ⁸ Po u Yahweh akanena kwa Aaron, '' Linga, nakupa imbombo iyakola ivyabupi vyo vyabikiwa kukwane, po ni vyabupi iviswepu vyonsi vyo abanthu ba ku Isreal bampha une. Nakupa ivyabupi ivi ngati chigaba ichiswepu sona na ku bana bako abalumendo ngati chigaba chakupewa akabalilo konsi. ⁹ Ichi chikwiza ukuba chako ukufuma ku ku vinthu iviswepu nkhani vyo vikusenguliwa kubutali nu moto. Ukufuma ku vyabupi vyabo vyonsi---- ichabupi icha chakulya chonsi, ichabupi cha mbibi chonsi, sona ni chabupi icha bunanzi bonsi---visaliwe ukuba vyako sona na bana bako abalumendo. ¹⁰ Ivyabupi ivi viswepuwe; umwanalume wensi abaghile alye, pakuti viswepu ku kwinu. ¹¹ Ivi vyakusangula vyo vinu, ivisaliwa ukufuma ku vyabupi vyonsi ivyakusunga ivya banthu aba Isreal. Une nakupa uwe, na bana bako abalumendo, sona na basungu, ngati chigaba chinu cha bwile na bwile. Wensi yo muswepu mu mbumba yako bangalyapo choka mu ivyabupi ivi. ¹² Amafuta ghonsi aghiza, uvinyo wensi umwiza sona ivyakulya, ivikomwa ivya bwandilo vyo abanthu bakumpha---ivinthu vyo ivi nabapa. ¹³ Ichakwinula ichinyone ichabwandilo icha vinthu vyonsi icha mu chisu chabo, chobakwiza nacho kukwane, chikwiza pakuba chinu. Wensi yo muswepu mwibumba muno angalya ivinthu ivi. ¹⁴ Ivyakusaliwa vya ba Isreal vizukuba vyako. ¹⁵ Chonsi icha kubwandilo ichanthumbo, abana aba bwandilo bonsi bo abanthu bakubika kwa Yahweh, bonsi abanthu pamo ivinyamana, vikwiza ukuba vinu. Napo buli, babaghile baghombole abana abalumendo ababwandilo, sona babaghile baghombole ichinyamana ichabwandilo ichanalume nacho techiswepu. ¹⁶ Vyo inthi vibombiwe na banthu vibaghile vibombiwe po vyaba nu mwezi ghoka. Po abanthu banga vighombola pamutengo wa mashekelo agha siliva fayivi, ukuyana nukug'wama kwa ma shekelo uwa pabuyo ubuswepu, gho ghakuyana na ma gerahs twente. ¹⁷ Loli umwana wa bwandilo uwa ng'ombe, pamo umwana wabwandilo uwa nang'onzi, pamo umwana wabwandilo uwa mbuzi ---mutakavighombole ivinyamana ivi; visayiwa kukwane. Mubaghile mukupulile udaba wabo pa chighemo sona nu kocha amafuta ghabo ngati chabupi chakupangiwa nu moto, umununsi uwiza uwakuhobosya u Yahweh. ¹⁸ Inyama zya ivi zikuzuba zinu. Ngati lidaba sona ni mpatapatapa iyandyelo vyo babikite ngati chabupi, inyama zya ivi yizuba yako. ¹⁹ Ivyakusangula vyonsi vyo abanthu ba ku Isreal bakubika kwa Yahweh, une na kupa, poka na bana bako abalumendo sona na bana bako abasungu, ngati ku gaba ukwakupululila. Lo lulaghilo ulwa mbeya ulwa bwile na bwile, ululaghilo ulupinyiwa ulwa bwile na bwile, kwa Yahweh kwa mwensi umwe na bana ba lunyungu lwako.'' ²⁰ U Yahweh akanena kwa Aaron, '' Te ukabe nichakubyala mu chisu cha banthu, pamo te wize ube na chimo mu banthu ichakuti bakugabile. Une ne chigabo sona impyana mu banthu ba Isreal. ²¹ Ku ba lunyungu lwa Levi, linga, napeghiwa akachigaba ka teni aka vyakwinula ni vinyamana mu Isreal ngati chakupyana pakunyosezya imbombo yo bakubomba mu chitembe chakomanilamo. ²² Ukufuma pano na kunthanzi abanthu ba ku Isreal batabaghile ukwiza ku pipi kuchitembe chakomanilamo, po inthi basende imbibi iyi sona nu kufwa. ²³ Aba Levi babaghile babombe imbombo iyakwamfania ni chitembe ichakomanilamo. Inthi basende ubutula nongwa bulibonsi ubwa ichi. Ulu lukwiza ukuba lo lulaghilo lwa bwile na bwile. Kunkhulile zya banthu bako zyonsi, mukasi mu banthu ba Isreal batabaghile pakuba nimpyana. ²⁴ Aka chigaba ka teni aka vyakwinula pamo ivinyamana ivya banthu ba Isreal, vyo bakubika ngati vyakusengula kwa Yahweh--vyovinonye vyo na bapa aba Levi ngati chakupyana chabo. Cho chobene nkhanena kukwabo, ' Batakabe ni chakupyana mu banthu aba Isreal.''' ²⁵ U Yahweh akanena kwa Moses ukuti, ²⁶ '' Ubaghile unene kuba Levi nu kubabuzya ukuti, ' Nanthi mukupokela ukufuma ku banthu aba Isreal ichanambala teni cho nabapa ukufuma kukwabo ukuba chakupyana chinu, mukwiza pakubika kwa Yahweh ichakusangula ukufuma ku ichonyene, ichigaba cha teni ichakwipa. ²⁷ Ichakusangula chinu chibelengiwe numwe ngati chanambala teni icha vyakulya vyakufuma pachaniko pamo ngati uvinyo we afuma mu chakukamilamo. ²⁸ Po mubaghile sona musangule kwa Yahweh ukufuma ku vyanambala teni vyonsi vyo mupokela ukufuma ku banthu ba ku Isreal. Ukufuma kukwabo mubaghile mubike ichakusangula kwa Aaron umuputi. ²⁹ Ukufuma ku vyabupi vyonsi vyo mupokela, mubaghile mubike ichakusangula kwa Yahweh. Mubaghile mubombe ichi pakufuma ku viza vyonsi sona ni viswepu vyonsi vyo vyapeghiwa ku kwinu.' ³⁰ Polelo ubaghile unene ku kwabo, ' Pomukubika ichiza, po chipeghiwe kuba Levi ngati chakwinula chakufuma kuchaniko sona nu vinyo uwakufuma mu chakukomanilamo. ³¹ Mungalya vyonsi ivyabupi mu buyo bonsi, uwe na ba mbumba yinu, chifukwa muvwalo winu pakunyosya pa mbombo yo mu kubomba mu chitembe chakomanilamo. ³² Temukabe ninongwa nayimo pakulya sona nukung'wa, pala mwiza nacho kwa Yahweh ichiza chamu vyo mwapokela. Po mutabaghile pakufisya ichabupi ichiswepu icha banthu ba ku Isreal, pamo inthi mwize mufwe.'''